Mataio 26
26
20. PAKANA MA 6.
1Ba Iesu i pira rapta a kum pirapira kumi, I wapua diat a nuna tara‐na‐wawera lenkumi, 2Muat nunurai lena dat a witamai na wan‐likai u logra, ma di taram‐aruai na Tu‐ra‐muana ba diat an akwati u ra kabai.
3Ma diat a kum tadaru na pinapet ma ra kum takana a nu ra tara, diat tolug ugai u ra ruma a nu ra tadaru na pinapet, a yana Kaiafa; 4ma diat pigit a maden an Iesu lena diat a pam i u ra walwalam ma diat a umpa i. 5Ma diat piri lena, Koniku mun u ra witamai kaduk diat a kum tara diat a rekereke uni.
6Ba Iesu i ki kubai Betania, u ra ruma a nun Simon a lepa, 7rā tebuan i wan tutuga i, ba i kip ta la na alabasita, a awakak na dagi ma i gala akit a matana i tana uni, ma i laboi u ra in a lorina ba i ki na winagan. 8A kum tara‐na‐wawera ba diat boboi diat pet na kămkămiak uni, ma diat lena, Di labo‐bia‐ruai ku urawa a lig bi? 9Kuma ba di wiurai a dagi bi, din rakani uni ta mogoro na utna, din tari korom diat a kum tara diat kanau. 10Ba Iesu i nunurai i piri ma ut ta diat, Lelawai kuma muat bilara a tebuan? kuma awakak a nuna pinapam i pami un iau. 11Kuma a kum kanau diat tana takum namuat; ma iau kai, pa ag tana takum namuat. 12Kuma i labo a polo bi u ra panig ba in pam tokono iau mai ba din punăg iau. 13Iau piri ligtatuna ta muat, U ra rakrakan wanua rap ba di wawera uni u ra wewapua awakak kumi, a lig kumi kai a tebuan bi i a petai kura din wapua uni, a naruina.
14Ma rā ko diat a winunu ma ruadi, a yana Iuda Isakariot, i wan korom diat a kum tadaru na pinapet, 15ma i tiri diat lena, Awa kuma muat ligna tari tag ba ag taramarua i korom muat? Ma diat pupulupai tana ma tul a no pakan a măni. 16Ma i tak u ra pupukai kuma i nunuk kup ta bug na kapkapana ba in taramarua i uni korom diat.
17U ra mukana bug u ra witamai na mandrai pa ta leven, a kum disaipel diat wan korom Iesu, ma diat tiri lena, U nemi awai miat pam tokonoi kup ui, ba un anpai iai a utna na wan‐likai? 18Ma i piri ta diat lena, Muat wan korom Tolig u ra taman, muat piri tana lenkumi, A Tenawawera i piri lena, i matiti ku a nug pupukai; miat ma ra nug tara‐na‐wawera miat a tolug ugai u ra wan‐likai u ra num ruma. 19A kum disaipel diat pet lenkuma Iesu i tula diat uni, ma diat pam tokono a utna na wan‐likai.
20Ba malurap ma i ki na winagan ma diat a winunu ma ruadi a tara‐na‐wawera; ma ba diat wagan kubai i wapua diat lenkumi. 21Iau piri ligtatuna ta muat, rā pa muat in ogopa iau. 22Ma diat tapunuk akit uni; ma diat rap diat tiri kabin i ma ut lena, Tadaru, iau duk, o oi duk? 23I wapua diat uni lena, Ia ba mira wadorog ugai a ru limamira u ra kupep, ia kuma in ogopa iau. 24Na Tu‐ra‐muana i wan lenkuma di timu‐a‐mukatai: ma akaina lig korom ia ba i ogopa na Tu‐ra‐muana! I ka akit korom a muana kuma ba pa di buta i. 25Ma Iuda, ia ba i ogopa i, i tiri lena, Tenawawera, iau duk, o oi duk? I uruniauot tana U ā piri.
26Ba diat wagan kubai, Iesu i rakanpa a mandrai, ma i pirawadanpai, ma i bikweran‐apai; ma i tari ta diat a kum disaipel, ma i piri lenkumi, Muat pami, muat an ani; a panig kumi. 27Ma i rakanpa a la kai ma ba i karikpa mun i tari ta diat ma i piri lena, Muat rap muat inimi: 28kuma a kapig kumi u ra wepak, i talabo kup ta mogoro ba din unuai mai a petakakai. 29Iau piri ta muat, pa ag inimi balet a uai‐na‐vaine kumi, un ta bug na wanua kuma dat inim a matakinai ma muat u ra matanitu a nun Tamag.
30Ma ba diat kelekelepa mun diat pari u na taman, ma diat wan u ra tagai na kum Olive.
31Ma Iesu i wapua diat uni lena, U ra marum kumi muat a tutukā rap un iau: kuma di a timutai lena, Ag rapu a tenawarua, ma diat rap a kăba sipi kura diat a wan weran. 32Ma ba ag lalaun balet ăg muka ta muat u Kalilaia. 33Ma Petero i piri tana, Ba diat tutukā rap un ui, iau pa ăg tutukā. 34Iesu i piri tana, Iau piri ligtatuna tam, U ra marum ku kumi, ba a kereke pai kurakurekatu utbai, Un weworo kon iau tul a pakan. 35Petero i piri tana, Ba dara irua ugai ma ui, pa ăg weworo kon ui. Ma diat rap a tara‐na‐wawera diat piri lenkuma.
36Ma Iesu diat, diat wan karai tau u ra bual a yana Ketsemane, ma i piri ta diat a nuna tara‐na‐wawera lena, Muat ki kumin, iau ăg wan urog iai ba ăg arig. 37Ma i ben ditul Petero ma diara ru na tunalik Sebedaio, ma i tapunuk kabin, ma i lăklăkon tau a balana. 38Ma i piriāta ditul, A niog i tapunuk akit, i pot na minat ma: mutul ki kumin, dat a ki lauma. 39Ma i wan karai tau kinalik na muka, ma i puka wowop ma ra matana, ma i arig lenkumi, Oi, Tamag ba di rakan larapai a la kumi, awakak ba in wan igen kon iau: ma koniku di pet a lig ku ba iau nemi, a lig ku kag ba u nemi. 40Ma i wan talili korom ditul a disaipel, ma i bobo ditul lena ditul inep dumăn; ma i piri tan Petero, Le, pa mutul ki lauma liranpa iau u rā pakan a marum ku? 41Mutul ki lauma ma arig kaduk mutul wan tau u ra wălwălam: pa i patut a niodi, i lumlum ku a panidi.
42I wan balet ru pakan ma i arig lenkumi, Tamag, ba a lig kumi i kana wan igen ba pa ag inimi, ui ma ku un nakokon. 43Ma i wan talili, ma i bobo ditul lena ditul inep dumăn, kuma i tutuai a mataditul.
44Ma i wan talura ditul balet ma i wan igen, ma i arig tul a pakan, ma i piri balet welara na muka. 45Ma i wan talili korom ditul a disaipel, ma i piri ta ditul lena, Mutul a inep ku kumari, mutul a go: boboi, i marawai ma ku a pakan a bug, ma di ogopa na Tu‐ra‐muana u ra limadiat a kum tena‐petakakai. 46Mutul turu, dat a wan ma: boboi, ia ba i ogopa iau i matiti ku.
47Ma ba i piri kubai, boboi, Iuda rā pa diat a winunu ma ruadi, i wan pat ma diat a tara‐na‐kaiya diat weuru ma i ko diat a kum tadaru na pinapet ma ra kum takana a nu ra tara, ma diat lo a kum pakat ma ra kum măden. 48Ma ia ba i ogopa i i tari mun a wakinilag ta diat, ma i piri lena, Ia ba ăg dum i, kuma ia, muat pampa i. 49Ma i wan tutuga Iesu ma ut, ma i lena, Tenawawera, un toka kaia ku: ma i dum i. 50Ma Iesu i piri tana, Tepag, un peti ku a lig kuma u wan urin uni. Ma diat wan urin, ma diat pampa Iesu ma diat ben igenpa i.
51Ma rā pa diat diat weuru ma Iesu, i alumpa a nuna in pakat ma i umi mai a wetula a nu ra tadaru na pinapet, ma i pakat‐kutuai in teligana. 52Ma Iesu i piri tana, Uu wakori balet a num in pakat u ra gaiana: kuma diat ba diat kip a pakat, kura diat a wirua u ra pakat. 53U kanapi duk lena iau kana arig larapai Tamag ma in tari tag kumari mogoro un ta noina ma ruadi a lekiono na agelo? 54Ba lenkuma din pet‐a‐we‐waot‐lelawaipa a buk lena, i ka ku ba din pet a lig kumi.
55U ra pakan a marum kuma Iesu i piri ta diat a tara‐na‐kaiya lena, Muat wan bakai urin lena muat pampa iau, ma muat lo a kum pakat ma ra kum măden lenkuma muat wan na maru ra tenaualog? U ra bugbug rap iau ki na wawera u ra ruma na wetu, ma pa muat pam iau. 56A kum lig kumi di peti ba din pet a wewaotpai uni a buk a nu ra kum parofita. Ma diat rap a kum disaipel diat kala talura i.
57Ma diat ba diat pampa Iesu, diat benpa i u ra ruma a nun Kaiafa, a tadaru na pinapet, kuma diat a kum tenatimtimu ma ra kum takana diat tolug ugai iai. 58Ma Petero i murumur i taka na welwelik, u ra ruma a nu ra tadaru na pinapet, ma i ruk iai, ma i ki ugai ma diat a kum wetula, ba in bobo a tintinipina.
59A kum tadaru na pinapet ma diat rap a kum tenanakokon diat auarekup ta magan lena diat a lok‐lukan Iesu, ba diat a umdokoua i uni: 60ma pa diat auarepai, ba mogoro na tenawelok diat wan pat. 61Na muru ruadi diara turu, ma diara lena, A muana bi i piri lenkumi, Iau ku ăg reg‐larapai a ruma‐na‐wetu a nu ra Kalou, ma ăg pami balet ta tul a bug ku.
62Ma ra tadaru na pinapet i turu, ma i tiri lena, Pa u pira ta lig? Awa kumi diara takuna ui uni? Ma Iesu i toka ki mut ku.
63Ma ra tadaru na pinapet i piri tana, Iau arig a mat ui nan Nara ia ba i lalaun, un wapua miat ba Karisito na Tun Nara ui, ba pate? 64Iesu i uruniauot tana, U ā piri: Kumi kai iau piri tam, Kura muat a bobo na Tu‐ramuana ba i ki tau u ra waot na liman ia ba i dekdek, ma in wan pat u ra bakut na lagit.
65A tadaru na pinapet i rabanuai ma ut a nuna kum malu, ma i lena, I pira ululi un Nara: diat ka balet urawa a kum tenawetakun? Boboi, kumari muat walogoropa a nuna pirapira na weuli un Nara: awa muat kanapi uni? 66Diat piri lena, i ka ku ba din umdokoua i. 67Ma diat kara matana, ma diat tibul i: rā magan kai diat pār i ma ra limadiat, 68ma diat tiri lena, Karisito, un wapua miat, O oi kuma i um ui?
69Ma Petero i ki na taman: ma rā taurara i wan korom i, ma i piri tana, Ui kai muru weuru ma Iesu a te Kalilaia. 70Ma i weworo na ra matadiat rap, lena, Pa iau nunura a lig kuma u piri. 71Ma ba i wan nara bonanaka, rā taurara bulug, i bobo i, ma i piri ta diat diat tana iai, A muana kai bi dara weuru ma Iesu a te Nasaret. 72Ma i weworo balet, ma i welimăn lena, Pa iau nunura a muana kuma. 73Kalikmaku bulug diat ba diat turu nana, diat wan korom i ma diat piri tan Petero, A ligtatuna, a te pa diat ui; kuma a num pirapira i pet a puanapa ui. 74Ma i welimăn kabin ma i weuli kai lena, Iau pa iau nunura a muana kuma. Ma ra kereke i kurakurekatu ma ut. 75Ma Petero i kodopo a pakan a pirapira kuma Iesu i piri tana, lena, Ba a kereke pa i kurakurekatu utbai, ui un weworo ko iau tul a pakan. Ma i pari u na taman, ma i tagidokopa i.
Zur Zeit ausgewählt:
Mataio 26: RAI
Markierung
Teilen
Vergleichen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Published by the British and Foreign Bible Society in 1896.
