2 Bitut 2
2
Ba̱nyet zzek dira
1I ba̱nyet nyyai ba ba̱yanyet a̱ yin ta̱za a̱ bvei diraa i diyrek Ka̱za; a̱mi meyang ba̱yanyet ba ma̱ nin ta̱za ka̱yat nyin a̱ yet ba̱malam diraa. Ba ni jik ba̱nyet a̱ tyyi zan di zzek diraa, a̱ ton a̱tuba nu a̱ ba̱ san a̱ wwon ni. Nkpa ni ba di dikwu mba ti ba ahwa. 2Hat yi ryi ba̱nyet ba̱gingang ba tssup a̱ka̱tuk na̱ta̱ryen mba nu. Rot na̱hywak a ba yya ni ba̱nyet ba̱gingang a̱ ni byyai Ryen ka̱ryong a. 3Rot cat bvwa maai, ba̱malam diraa bani a̱ ni cat tyyei nkhang diraa a̱ ga shya krum da̱ nyin. Ba ka̱n tyak shirya mba ji, A̱tuba nu a̱ ni ba̱ hywat ni a̱ yemi a̱ ka̱n dop a̱ tyak.
4Rot Ka̱za a̱ yin tun ba̱pfong nka ba a̱ yin kpa ni a̱ wwon ba. Ka yin ba̱ yrik a̱ tyyi i ka̱ryi ndong a̱ ba̱ rop di na̱nywa an dyin a̱n pfong Nom Shirya na. 5Ka̱za a̱ yin tun ba̱nyet nyyai ba a̱ wwon ba. Ka yin tyyi ba̱shekwot a̱ hywaai ba̱ka̱tuk ba̱nyet ba sa̱rei, se bu Nuhu bu ba̱nyet a̱tiyring ba̱yaan Ka̱za ka yin san. Nuhu a̱mi a̱ yin yya wa'azi tazwa a̱zizrak swat ji. 6Ka̱za a̱ yin yya na̱nkrang Saduma bu Gamurata shirya a̱ ba̱ hwwi di rong a̱ krok ntong. Kyang a yin ba̱ ba ni yin yet kyang a ba̱nyet ba a̱ rak tyong Ka̱za ba ni ryi a̱ hok ka̱wun ni. 7Ka̱za a̱ tun Lutu a̱ shot i, a̱tsatsak a̱yin nu a̱ yin wi hok ansham ka̱yat ba̱nyet ka a̱ yin wi tssup shirya ni. 8A̱tsatsak a̱yin a̱ywu a̱ yin swat ka̱yat mba, na̱kpot mba na a̱ssi nu na na̱ ryi ni a̱pfo nu a̱ hok ni a̱ yin ku yet hywu kozan ka̱tuk. 9A̱mi meyang A̱gwam Ka̱za a̱ bvwo ka̱sak ka ka nin tun ba̱nyet ba a̱ ka̱ tyong ni a̱ wwon i ka̱bvung ka ba sswa ni, bu ka̱sak ka ka nin breng ba̱ka̱tuk ba̱nyet bani ba sswa ka̱bvung a̱n pfong Nom Shirya na. 10Nnani yet ka̱ryong tazwa ba̱nyet ka a̱ rak ndwam mba na a̱ wwon i dira̱ntong ni a̱ byyai dityok Ka̱za ti ni.
Mba ba̱nyet bani a̱ yet ba̱nyet sang ka̱wun bu ba̱nyet yet diccu, di ba pfong ka̱wun ryat a̱ka̱tuk ba̱ryat di ba̱nyet cet Tazwa ba. 11Ba̱pfong Ka̱za ba ma a̱ ba̱ ran di cet ni a̱ ba̱ tyyi hywak a̱ta̱ssi A̱gwam Ka̱za ba. 12Ma ba̱nyet bani a̱ yya di nyam ka̱yit ji ba tyei zi gi pyyem hywaai ni; ba yya bu kyang a ndwam mba na na cat i. Kyang a ba bvwo ni ba ba kpo tok a̱ jing. Dolet ba ni ba̱ hywaai di nyam ka̱yit ji ni. 13Ba ni ba̱ tan di na̱kpot tazwa na̱kpot ka ba yya ni. Ba sook ndya mba a̱ tyyi bu i hok ansham ndwam bu ya bu sswa sa̱rei ka̱ta̱nom. Ba brak a̱ tyyi bu kyang nsum ka̱ram ka ba mon a̱ ya ba̱ nyin ni a̱ pfong ansham dira ti ba bvei ni. 14Ba cat cyang kyang yaan ba se bu ba̱nyring a̱ ga kan-a̱naan ba̱ mba. Ba swei bu yya a̱ka̱tukyya ba. Ba na tyyi ba̱nyet sang cet a grung. Ba myyam ndya mba na cat nkyang ka̱sa. Ka̱za a̱ ni ba̱ shyi! 15Ba wwon a̱tuntwang ryen nu a̱ brik a̱ sook ryen Balama a̱hwai Ba'ura, a̱tuba nu a̱ yin cat ssok i ryen na̱kpot ni. 16Ma ba ku kam na̱ wwon a̱ka̱tukyya nu nu, hat ba tyyi ka̱janki nu a̱ ku kam a̱ ryat ba̱ nu di diwan a̱neywu; a̱ kam a̱ntyok tyyei ba̱ryat Ka̱za a̱ywu na̱ wwon jyik nu ji.
17Ba̱nyet bani a̱ ryi da̱ a̱kwot ta̱ncen ni, ba ryi di a̱ninyyan na wun ku hywap ni. Ka̱za a̱ ka̱n jyi ka̱bvwa ndyin a̱ ba̱ sak i. 18Ba na ryat dikpam bu cat tyyei diset, a̱ me ba̱nyet ba a̱ kwan shot ka̱yat ba̱nyet ka a̱ shyi i brik a ni a̱ ba̱ tyyi ka̱grap a a̱ka̱tuk nkyang u ndwam mba na na cat i. 19Ba na ba̱ tyyei di ba ni shot i Truwang ji, ma mba ba̱nyet tyyei ba di ba shot a a̱ka̱tuk ka̱kpeyang u ban shyi ni ba; rot a̱yin a̱ yet a̱kwwa nkyang a yet a̱ntyok ka̱ryi nu ni. 20A̱yin nu a̱ ka̱n shot na̱hywak ka̱sa na ni rot a̱ shya bvwo Yesu Kristi A̱ntyok za san ni, ma ba si bo ku pyyem na̱ bu brek a̱ nwa taka̱i na̱hywak iya ni, a̱ na si byyan a̱ ra̱u kyang a na̱ yin yet ka̱son ka ni. 21Ku myim na̱ bvwo ba; ku ku ran bvwo na na̱ bvwo a̱zizrak ryen nu ni, a̱ si kaai truwang Ka̱za ji ba yin ku ryi ni a̱ rot. 22Kyang a ba yya ni ba ba̱cicrak bu gan ji hywa, “Ka̱bvwu a̱ kwei a̱ bo brek a̱ ryai.” “Ba sso a̱la̱de na̱ bo brek a̱ nat a̱ si kprang i dibvang.”
Zur Zeit ausgewählt:
2 Bitut 2: kaj
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2011, Wycliffe Bible Translators, Inc. All rights reserved.