2 Bitut 3
3
Ba̱ryat bai A̱gwam njit ba
1Ba̱kpondang nzuk, wasika a̱ni a̱mi a̱ yet a̱mba̱hwa nu n ya jem i ni. Ka̱yat mba sa̱rei n cat n ya yring i ka̱yat ndya nyin a̱zizrak a̱huhwa tazwa nkyang ka ni. 2N cat yi yring kyang a ba̱nyet tyyei ba̱ryat Ka̱za ba nyyai ndoson ba yin dyat ni, nta̱mak bu truwang ji A̱gwam Yesu A̱ntyok za san na̱ yin wrak ba̱pfong nyin ba ba bu ya tyyei ni. 3Kyang ka̱tsitsrang a yi ni bvwo ni nkpa yet, a a̱ngbom nom u ba̱yanyet a̱ ni hyok a̱ tyyi ndya mba na bu a nkyang a ndwam mba na cat i. Ba ni ya zzang 4a̱ yya, “Anye a̱ yin hywa da̱ a̱ bai o? Na̱ shyi ke? Nyyai ba̱tyyi a̱kwop njit ban kwi, kozan kyang a̱ ya ka̱son ka̱sak ka kun dyi ni nyyai ka̱ram ka ban yya ka̱sa ka ni.” 5Ba bring ba̱kpot ka̱sak ka Ka̱za ka yin hywa bu diwan a̱n yya tazwa bu ka̱byen ni. Ba̱shekwot mba ba yin bvwa a̱n yya ka̱byen ka. 6Ba̱shekwot iya a̱mi ba bo yin brak a̱n hywat a̱kukwo ka̱sa nu. 7Ma tazwa bu ka̱byen ji n shyi nani ni, bu diwan Ka̱za tiyring iya a̱mi a̱ za̱ sak a̱n pfong rong nom shirya. Ba sak a̱n pfong nom a ba nin yya ba̱ka̱tuk ba̱nyet shirya dikwu ni.
8Yi ryok bring ba, ba̱wumbeyang nzuk, nom yring ba̱ a̱rya ncyi kop ba yet bu kyang yring da̱ A̱gwam Ka̱za. 9A̱gwam Ka̱za a̱ byyan ka̱ram i yya kyang a na̱ rop a̱ ni yya ni ba, da̱ni di ba̱yanyet ban hwa ni. Ma a̱ yya bu hakuri a̱mi ba̱ nyin rot a̱ cat ko a̱tuba a̱yring a̱ kwu ba, seko koyan a̱ wwon a̱ka̱tukyya nu nu.
10Ma Nom A̱gwam Ka̱za na bu ba da̱ni da̱ a̱tang ni. Ka̱tuk iya tazwa ji bu nkyang nji ni ta̱wai ba̱ a̱ka̱tuk gwrak, nkyang a shyi tazwa ni i hwwi, nta̱mak ka̱sa ka bu sa̱rei nkyang a shyi ka̱yat nka ni. 11Ki sa̱rei nkyang ani ba ni na̱ byyan, to, a̱nzan taka̱i ba̱nyet a̱mi ku myim yi yet? Dolet yi wrak Ka̱za ndya nyin na i ka̱ tssup bu rya yring 12ka̱ram ka yin shyi i pfong Nom Ka̱za na ni, i bo yya koka̱ri tyyi ku ba ahwa, Nom a ba nin hwwi a̱ bo byyan tazwa ji ni, nkyang a n shyi ni wum ndong ni na̱ byyik. 13Ma zi shyi pfong kyang a Ka̱za ka rop a̱wwon ni: nkpa yet tazwa swai bu ka̱byen ka̱hwai, ka̱bvwa ka dizizrak tin swat i.
14Ba̱kpondang nzuk, da̱ni di yin pfong Nom iya ni yin tyyi ka̱ssi i yet ba̱zizrak ba̱nyet a̱ta̱ssi Ka̱za, ka bu ya shya yi byyi hywak ba i bu swat ansham ba̱ nka. 15Yi cyang hakuri A̱gwam Ka̱za njit u na̱n ya ryi ryen yi gi san sucet, da̱ni a̱wumba njit Bulut na̱n ya jem i da̱ a̱za̱ncyi na Ka̱za ka ku ryi ni. 16A̱mi na̱ nan hywa i ba̱wasika nu ba sa̱rei tazwa ba̱ryat kani. Nkyang nzaan ka̱yat ba̱wasika nu ka bvwa dikwu bvwo, ba̱gbyik ba̱nyet ba̱yaan bu ba̱nyet ba a̱ wi sseng ka̱rek ka̱yring ni ba na ryat a̱ tyei zan. A̱mi ban yya bu kpikpit ba̱ryat Ka̱za na. Ba ya kwak bu dikwu.
17Ma da̱ nyin ni, ba̱kpondang nzuk, yi ka̱n bvwo nkyang ani. Rot a̱mi se yi cong ta̱rwam yi bu nwa ka̱grap ba̱nyet ka a̱ rak zzek ka̱ryong ani hat i si wwon ryen sucet a yet nyiin ni. 18Yi ya ka̱son i rai ka̱yat a̱liheri bvwo ka yi shya tazwa A̱gwam njit Yesu Kristi A̱ntyok za san ni. Nu dityok ti yet tinuu, naani bu har a̱ba̱da. Amin.
Zur Zeit ausgewählt:
2 Bitut 3: kaj
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2011, Wycliffe Bible Translators, Inc. All rights reserved.