1 Bitut 4
4
Zi shya a̱hwai ndya
1Da̱ni di Yesu na̱ ka̱n sswa ka̱bvung ka̱yat rwam nu ni, a̱mi meyang se yi ma̱n sook taka̱i a̱huhwa iya. Rot a̱yin nu a̱ sswa ka̱bvung ka̱yat rwam ni, to, a̱ bo ssop diccu nu a a̱ka̱tukyya ba. 2Rot a̱mi se yi sook nyyai naanini i swat kpikpit sucet nyin na i ka̱sa ka da̱ni di Ka̱za kan cat i, ba nkyang a ndwam nyin na cat yya ni ba. 3Yi ka̱n swat maai i taka̱i a̱ka̱tuk swat iya ba̱nyet wi tssup ba ba swat i, i cong ka̱cyet dira̱ntong bu cat nkyang rwam bu byep bu hyong bu nwai a̱ka̱tuk a̱tswa ba̱nyet sswa, i tyyi a̱shishik rot yi tssup nkyang a wi yet Ka̱za ni. 4A̱ka̱tuk ba̱nyet u yi yin shyi ba̱ mba ni a̱ yya ka̱hat ji yi bun wi cong ba̱ mba ni i taka̱i a̱ka̱tuk ka̱cyet iya ni; rot a̱mi ba na ya pfwei. 5Ma sa̱rei mba koyan a̱ ni twang kyang a na̱ yya ni a̱ta̱ssi Ka̱za; nka a̱mi a̱ swat a̱ pfong a̱ ni yya shirya ba̱nyet ka̱n kwi bu ba̱nyet ri swat a̱cet. 6Nkpa yin byyi ba yin yya ba̱nyet ba a̱ ka̱n kwi naanini wa'azi Ka̱sham Ba̱ryat, rot ba ga ba̱ yya shirya di ba̱nyet rwam ni, ma ba byyi sucet ka̱yat ntswa mba ka da̱ni di Ka̱za ni.
Ba̱nyet cam za̱nang Ka̱za
7A̱ngbom kozan nkyang a̱ byya shishrek. Se yi ya cam, i breng a̱ccu nyin ansham, ka̱sak ka yi nin maai yya a̱duwa ni. 8A̱gba̱dang kyang u nu a̱ yet: yi ya gwai ba̱t, rot cat a na cii kozan a̱ka̱tukyya. 9Yi ssang ba̱yaan i na̱sa nyin, ba ba̱ a̱dyying ba. 10Ka̱za a̱ ka̱n wrak kozan a̱neyring nyin za̱nang ji bvwon ba̱nying koyan ni; se koyan a̱n yya pfong a̱n brang ba̱yanyet yi bu wrak ba̱yaan ka̱nu-a̱tan Ka̱za nu ba̱ zi ntaka̱i. 11Koyan a̱ yya wa'azi, na̱ yya wa'azi ba̱ryat Ka̱za. A̱ntyok yya pfong, na̱ yya di cet a Ka̱za ka ku ryi ni; rot a̱mi ka̱yat kozan kyang ba ga dyep Ka̱za ka̱yat diyrek Yesu Kristi. Nka a̱mi a̱ byyi shii bu cet sa̱rei har a̱ba̱da, amin.
Sswa ka̱bvung a̱ntyok tssup
12Ba̱wumbeyang, yi ryok yya ka̱hat ka̱bvung ji yi sswa i ka̱me ka ni ba. Yi ryok kpo sook da̱ a̱hwai nkyang a̱mi a̱ ya shya ni ba. 13Seko yi gwai yin sswa ka̱bvung ka Kristi na̱ ka̱n sswa ni; rot yi gi bu shya kyang gwai ka̱ram ka na̱n tyyei shii nu na ni. 14Ki ba̱nyet a̱ ya pfwei rot yi yet ba̱nyet tssup Yesu yi gwai, rot Tswa Ka̱za ji byyi shii ni nji swat ka̱yat ndya nyin. 15Ku myim a̱yin nyin a̱ sswa ka̱bvung a̱zi hywak da̱ a̱ hywat a̱yin, ko a̱ yet a̱tang, ko a̱ bvei kaat ko nwai ba̱nyet an zzwei ba. 16Ma ki yi sswa ka̱bvung rot yi yet ba̱nyet tssup, kyang sum n shyi ka̱yat ba; seko yi dyep Ka̱za rot ba ya yei i diyrek Yesu.
17Ka̱ram nwa shirya ka a̱ yya, kuma ba ni yet ka̱son a̱ yya ba̱nyet Ka̱za ba mi. To, ki ba sook da̱ njit, ku naat si tyak ni bu ba̱nyet ba a̱ rak san Ka̱sham Ba̱ryat Ka̱za ka ni? 18Da̱ni di ba̱ryat Ka̱za ban hywa ni,
“Ki ku bvwa dikwu a̱tsatsak a̱yin a̱ kaat,
to, ku bu ryi ni ba̱ a̱ka̱tuk a̱yin nu a̱ cyi Ka̱za ni?”
19Rot a̱mi, ba̱nyet ba Ka̱za ka ryi ku myim ba sswa ka̱bvung ni, se ba wwon a̱ccu mba mbvak Ka̱za ka a̱ ba̱ yya ni, a̱tuba nu a̱ na sseng i ba̱ryat nu ni.
Zur Zeit ausgewählt:
1 Bitut 4: kaj
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2011, Wycliffe Bible Translators, Inc. All rights reserved.