1 Bitut 5
5
Yi tsaai ka̱srong Ka̱za ka
1N ya naai, nyin ba̱nyet ba yet ba̱nekwo ba̱nyet tssup ba ni, nzuk n ma̱ n yet a̱yekwo da̱ nyin ni. N yet shaida ka̱bvung ji Kristi na̱ sswa ni. N bo ni nwa i shii a ba ni tyyei ni. 2N ya naai, yi tsaai bvon ji Ka̱za ka ya ryi ni ansham. Yi cam sa̱rei bu rya yring da̱ni di Ka̱za kan cat i, i ryok yya bu rya hwa ba. Yi ryok yya n cat ba ya tan bu zang ba, ma di ba̱nyet ba a̱ sook ka̱yat ndya mba a̱ ni yya Ka̱za dikwwa ni. 3Yi ryok tyyei ba̱nyet ba ba tyyi mbvak nyin ni cet ba, ma yi cong taka̱i ka̱cyet a myim ba̱nyet ba a̱n cong ni. 4Nom a A̱gba̱dang A̱ntyok A̱tsaai u na̱n ba ni koyan a̱ ni san rawoni nu nna ni ya a̱ssi ni, ku ni tyak shisham ji ba.
5A̱mi meyang nyin zam ji, yi pfong ba̱nekwo nyin ba. Koyan a̱ ryok yrek diccu nu ba; yi yya ba̱yaan dikwwa, rot ba̱ryat Ka̱za ba hywa, “Ka̱za a̱ cat a̱ntyok yet diccu ba, ma a̱yin nu a̱ wi yet diccu nu ni a̱yin a̱ywu a̱ ssang za̱nang Ka̱za.” 6Rot a̱mi yi ryok yrek a̱ccu nyin ba, yi ya tyyi a a̱gba̱dang mbvak Ka̱za, ka ga bu ya yrek tazwa a̱tsatsak ka̱ram nka nu. 7Yi ka̱ krok sa̱rei a̱huhwa nyin nu, rot ka ya cam.
8Yi cam i ta̱rwam, a̱ra̱ndwan nyin a̱gwam a̱ka̱tuk tswa na̱ yemi a̱ gwat a̱ kat di zaki ni, a̱ cat a̱yin nu na̱ ni ya ni. 9Yi sseng di cet i tssup nyin na i ku rak i, rot yi bvwo ba̱nyet tssup ba da̱ nyin ni ko ke i ka̱sa ka a̱ ma̱n sswa ka̱bvung da̱ nyin ni. 10Ma ki yi sswa ka̱bvung ka̱baram ba̱cincong, Ka̱za ka a̱ wwat sa̱rei a̱liheri ni, nka a̱mi a̱ ya yei yi bu nwa i dityok wityak nka ti i tssup Yesu Kristi, a̱ ni ya tyyi yet ba̱jyem a̱ ya ryi cet rya a̱ ya kpang yi sseng di cet. 11Sa̱rei cet yet nnu, har a̱ba̱da, amin.
A̱ngbom byet
12Sila, a̱tuba nu n ni sak rya da̱ a̱wumba ka̱ryong ni, a̱mi a̱ n brang n ni ya jem Kibukum wasika kani. N cat ya ta̱gbak n bo ya ryi shaida nzuk ji, nji a̱mi yet za̱nang Ka̱za ji. Yi sseng a nji di ka̱ryong.
13Ba̱nyet tssup ba a̱ shyi Babila Ka̱za ka tssa ba shyi ba̱ nyin ni a̱ ya byei, nta̱mak bu ka̱won nzuk ka Markut. 14Yi ya byei ba̱ a̱tsatsak ba̱gwai yet ba̱nyet tssup.
Nyin ba̱nyet ba yet ba̱nying Kristi ba ni, Ka̱za a̱ ya wwon nda.
Zur Zeit ausgewählt:
1 Bitut 5: kaj
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2011, Wycliffe Bible Translators, Inc. All rights reserved.