Matie 25
25
Terrta dɔ ngamandgt kɨkɨlah
1Kamla kõɓe kɨ dɔrãgt a i tit kɨ ngamandg kɨ kɨlahg'n ɔin lambag lod, na awɨn kad kɨ'n lan ta ngetaa dekɨdẽ kij. 2Kɨ mig kudt ĩn kurdeg, na kɨmi madg ĩn ngékumtɔgg. 3Kɨ kurdeg'n non ɔin lambag lod, na unɨn yib al, 4na ngékumtɔgg unɨn yib kam kugt lod nat kɨ lambag lod. 5Na lon ngetaa dekɨdẽ kij ndɨ kɔkɨ ɓaitɔ ye, ɓi tendɨ tube ad ɓin. 6Na denlot ndɔ, kah ndɨ de mad koo an: Oon ngetaa dekɨdẽ kij ɗe woi. I teen, i lan taa. 7Kamla ngamandg'n non tube ndoolɨn na ndɨ ɗan go lambag lod. 8Taa kɨ kurdeg elɨn kɨ kumtɔgg anan: Adjɨn yibt losɨ ngon sĩ, kɨta lambag loj ndɨ oin. 9Ngekumtɔgg turɨn anan: I rot al kɨta ɓood a ne a asɨj sesɨ al. I soot kad awɨn ro ngeɗawnyat i ndugon kɨ losɨ. 10Lon ndɨ awɨn ndugot ɓaitɔ ye, ngetaa dekɨdẽ kij ɗe; ĩgɨn ɗan rod woi ye, andɨn nat sia kuj ɗanah taa nat, na utɨn tabit. 11Goot gog ngamandg kɨ kurdeg'n non ɗen ho anan: Bɨraɓe, Bɨraɓe, i tee tabit adj. 12Na turd an: Rota la m'ndɨ m'elsɨ kɨ ndim dõ ye, m'gersɨ al. 13Kɨtɔ 'nten i ndɨn dɔgt, kɨta i gerɨn ndɔ, ke dɔkàd tel Bɨraɓe al.
Terrta dɔ de madt kɨ ɓerg loa mɨta
(Oo Luk 19:12-27)
14Kõɓe kɨ dɔrãt a i tit de mad'n ndɨ aw mbah dɔningt mad kɨ sãi, kun ɓerg lon na la nyamajg lon jidt. 15Ad kɨkɨɗa kudt nar talã mi, ad kɨmad joo, kɨmad tɔ ada kɨɗabe, ad dekɨɗen kɨgo tɔgat, na aw.
16Kanangbe, ɓer'n taa talã kɨmi ye, aw ɗan gat, na ngah talã madg mi dɔt. 17Titbe ĩn taa talã joo ye, ngah kɨmadg joo dɔt. 18Na ɓer'n taa talã kɨɗabe ye, aw urr ɓe dɔningt, ya nar lo ngen tit. 19Kaglo tɔi ngãibe got kamla ngeɓe lo ɓerg'n non ɗe, na da sed kɔr nyag lon. 20Ɓer'n taa talã mi ye, ɗe kɨ kɨmadg mi dɔt tɔ na an: Ngeem, nar talã kɨmi kan adɨm la, oo m'ngaa madg mi dɔt ten.
21Ngea ela an: Oiyo. Ĩ ɓer kɨmaj kɨ kɨro, ĩ de kɨro kam nyat kɨ tẽbe, m'a m'ndai dɔ nyagt kɨ ngãi, i ɗe, i ɗa ronel nat kɨ ngei.
22Ɓer'n taa talã kɨjoo ye ɗe an: Ngeem, talã kɨjoo kan adɨm la, oo m'ngaa madg joo dɔt ten.
23Ngea ela an: Oiyo. Ĩ ɓer kɨmaj kɨ kɨro, ĩ de kɨro kam nyat kɨ tẽbe, m'a m'ndai dɔ nyagt kɨ ngãi, i ɗe i ɗa ronel nat kɨ ngei.
24Na ɓer'n taa talã kɨɗabe ye ɗe an: Ngeem, m'ger, ĩ de kɨ ngang ngãi: i ndɨ i tet nya lot'n i dubt al, i ndɨ i kaw nya lot'n i najt al, 25la m'ɓool, ad m'aw m'ya talã loi kan adɨm nõ dɔningt; oo nya loi la ten, i taa.
26Na ngea tura an: Ĩ ɓer kɨmajal kɨ ngengẽ. Lon i ger kad m'ndɨ m'tet nya lot'n m'dubt al, na m'ndɨ m'kaw nya lot'n m'najt al ho ye, 27neni a aw kɨ nar lom nõ ro ngembel gidat kad kaglo'n m'ɗe a ne, m'a m'taa nar lom kɨ mana dɔt.
28Ɔrrɨn talã loa jiat kɔ, adɨn ɓer'n ndɨ kɨ talã kɨkɨlah nõ. 29Kɨtɔ dekɨɗen a ndɨ kɨ nya a ne, a adɨna dɔt, ad a ngah nya dɔt mbuj mbuj; na de'n nya loa goto a ne, kɨ ngon sĩ be'n to jiat nõ kaa a taan jiat kɔ. 30I lan ɓer kɨmajal nõ kɔ kam tilt kɨ tɨga, nõbe la i lo nõ kɨ dõ ngang ye.
Ngon de a ɗe kɨta gangta dɔ girrdegt kɨ dang dang
31Lon Ngon de a ɗe kam kunjt kɨ ɗangereng, nat kɨ malaikag lon tube nõ, kamla a ndɨ dɔ pong kɔsɨgont lon ye. 32A kawɨn girrdeg kɨ dang dang kɨ nõat, na a tɔrr deg kɨna nat, tit'n ngéngombatg ndɨ tɔrrɨn ne batg kɨna bĩãgt ye be. 33A nda batg ko kont, na bĩãg ko gelɨnt. 34Kamla Ngar a el ĩgɨn ɗan ko kont an: I ɗen, ĩn deg'n bɔwɨm njang dɔsɨ, õn nduba kõɓe'n i kɨ ɗago woi lo la girr dɔningt nu kɨtɔsɨ. 35Kɨtɔ ɓo õm la admɨn nyasa ye; kɨnda õm la admɨn nyakãi ye, mĩ mbah la i hɔmɨn kɨ rosɨt ye; 36mĩ rom kari la i lamɨn kub ye; mĩ mõi la i ɗe oomɨn ye; mĩ dangait la i ɗen romt ye.
37Kamla deg kɨdenesewg'n non a turɨna anan: Bɨraɓe, ɗɨngãt j'ooi kɨɓo hã jadi nyasa a? Ke kɨ kɨnda hã jadi nyakãi a? 38Ɗɨngãt tɔ j'ooi ĩ mbah hã kɨ hɔi kɨ rojt a? Ke kɨ roi kari hã kɨ lai kub a? 39Ɗɨngãt j'ooi ĩ mõi, ke kam dangait hã kɨ ɗe roit a?
40Na Ngar a turd an: Rota la m'ndɨ m'elsɨ kɨ ndim dõ ye, kaglot kɨɗen'n i ndɨ i ɗan nyag'n non kɨ kɨkɨɗa ku kɨdugt kɨ tɔi ku ngankomt'n non ye, i mĩ la i ndɨ i ɗan sem ye.
41Kamla a el ngé kɨ kogelɨnt an: I ɗan kɨgog nõ, ĩn deg kɨndɔl, awɨn kam horrt kɨ tokɨnõt'n i kɨ ɗago woi, kɨta Sɨtan kɨ malaikag loa. 42Kɨtɔ ɓo õm la admɨn nyasa al ye, kɨnda õm la admɨn nya kãi al ye. 43Mĩ mbah la i hɔmɨn kɨ rosɨt al ye; mĩ kɨ rom kari la i lamɨn kub al ye; mĩ mõi ho mĩ kam dangait ho la i ɗen romt al ye. 44Kamla ĩng kaa a turɨn anan: Bɨraɓe, ɗɨngãt j'ooi kɨ ɓo ke kɨnda, j'ooi ĩ mbah ke roi kari, ĩ mõi ke kam dangait, hã kɨ ɗa sei al a? 45Kamla a turd an: Rota la m'ndɨ m'elsɨ kɨ ndim dõ ye, kaglot kɨɗa'n i ndɨ i ɗan nyag'n non kɨ kɨkida ku kɨdugt kɨtɔi'n non al ye, i mĩ la i ɗan sem al ho ye. 46Na ĩgɨn ɗan, a awɨn lo koo kɨ wãiwãiat kɨ tokɨnõt, na dekɨdenesewg a awɨn kumkajirt kɨ mbãkɨnõt.
Zur Zeit ausgewählt:
Matie 25: MlL
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Mbai Bible Revision © Bible Society of Chad, 2015.
