Matie 24
24
Jeju elta tuj kuj ndub Luwah
(Oo Mrk 13:1-37; Luk 21:5-30; 17:22-37)
1Jeju tee kam kuj ndub Luwaht, ndɨ aw, na ngéndoog loa ɗen roat kɨ'n dana nyag'n ɗan ne kuj ndub Luwah. 2Na Jeju turd an: I ndɨ oon nyag 'nten tube ala? Rota la m'ndɨ m'elsɨ kɨ ndim dõ ye, a nyan mbal mad dɔ mbalt mad al; a tɔsɨ tɨland tube.
3Lon Jeju ndɨ ber dɔ mbal kag ɓirgt ye, ngéndoog loa ndɔt'n kɨ roat elɨna anan: Elj. Nyag'n non a ɗan nya ɗɨngãt a? Ɗi i nyakɔj kad deg gerɨn ne ndɔ ɗei kɨ dɔboi dunia a?
Yaɓood nyakɨto kɨ darondo
(Oo Mrk 13:3-13; Luk 21:7-19)
4Jeju turd an: Oon go rosɨ maj. Na ɓet de mad goolsɨ. 5Kɨtɔ deg ngãibe a unɨn tɔm dɔdt ɗen ne, na a anan: Mĩ la mĩ Krist ye. A goolɨn deg ngãibe. 6A oon hoi ɗɔɔg kɨ kah ɗɔɔg, oon go rosɨ maj, ot kadɨn kamsɨ gang man, kɨta sumba kad nyag'n non ɗan nya. Na a i dɔboia al ɓaitɔ.
7Kɨtɔ girrdeg mad a ɓai kɨ ɗɔɔ dɔ girrdegt mad, na kõɓe mad a ndoor kõɓe mad; ɓo a õ, dɔning a yee kɨ log dang dang. 8Na nyag'n non tube a i tit kɨ yaɓood tokooj be. 9Kamla a lasɨn ji ngéɗatakõt, a tɔlsɨn tɔ; deg kɨ ngéger Luwah al tube a ɔsɨsɨn ta tɔ; 10kamla deg ngãibe a tɔrrɨn jid girr kadkam Luwaht, a nden dɔ na, a ɔsɨn na ta tɔ. 11Ngékelta kɨ ta Luwaht kɨ ngomg a ɓai bɨlan ngãibe, na a goolɨn deg ngãibe. 12Kɨtɔ majal kɨ ɗa kɨ dɔnat nat, a taa lo, tar lo deg koosɨg a tel sɔl. 13Na de'n ndɨ hɔba mbã dɔboia a ne, ĩla a aj ye. 14A lan mber Hoita kɨmaj lo kõɓe 'nten dɔningt kɨtaagbe; kad deg ngéger Luwah al tube oon dɔ. Kamla dɔboia a ɗe ye.
Kamkɔl kɨbo a ɗe
(Oo Mrk 13:14-23; Luk 21:20-24)
15Lon a oon nyakɨkɔked lo ngetujɓe'n Daniel ngekelta kɨ ta Luwaht eltaa, a ndɨ kam lot kɨjaɓat a ne, maj kad de kɨ ngeɗa maktub 'nten ger girra maj. 16Kɨ ngendɨ dɔning Judet ãin kɨ kam mbalgt; 17de'n ndɨ dɔ kujt a ne, kɨ ot ɗisɨ kad nun nya lon kɨ kam kujt; 18de'n a i kam ndɔɔt a ne, ot tel kɨgog kad nun kubji lon. 19Dang a ɗa dekɨdẽ kokemg kɨ ngékad mba ngan kɨkasɨg kam ndɔgt'n non. 20I kɔn Luwah kad ndɔ kãisɨ i dɔnah kult ke kɨ ndɔ taakò al. 21Kamkɔl kɨbo ngãi a ɗe, ĩ kɨ tit sia goto lo yaɓood dɔningt nu mbã ɓola, kɨ tit sia a ɗe gog al ho tɔ. 22Ĩla Luwah gangta ndɔg'n non ad gɔj al a ne, de mad kɨ a aj goto na kɨta kɨ mbedg lo Bɨraɓe la a gangɨn ne ta ndɔg'n non ad gɔj ye. 23Kamla, ĩla de mad elsɨ an Krist i nẽbe ala i nube a ne, ot koon ta loa. 24Kɨtɔ Krist kɨ ngomg, kɨ ngékelta kɨ ngom na anan n'ndɨ nelɨn ta kɨ ta Luwaht a ɓain ngãibe, na a ɗan nyakɔjg kɨ bĩdang, kɨ nyag kɨ yaya, mbã kad ĩla i root a ne, kɨ n'adɨn kɨ mbedg lo Luwah kɨ dɔd kɨ ndomɨn. 25Oon m'elsɨ kete lon nyag'n non ɗan nya al ɓaitɔ.
Ngon de a tel ɗe
(Oo Mrk 13:24-31; Luk 17:23-24)
26Ĩla elsɨn anan: I dɨlalot nẽbe a ne, ot kawɨnt. Ga ron ndɨ nẽbe a ne, ot koon kɨtĩsɨt. 27Kɨtɔ, tit'n tel ndii a telɨn ko loɓakàdt mbã kɨ lo kudkàdt ye, tel Ngon de a i titbe ho. 28Lon nĩn to tit, nõbe la malg a kawɨn na kɨ tit ho ye.
29Gog go kamkɔlt kɨ kam ndɔgt'n non, kàd a diw til, nah a ɗa nda al, kɨmẽg kɨ dɔrãt a tuson kɨber, na tɔgg kɨ dɔrãgt a yeend yɨkɨtyɨkɨt. 30Kamla nyakɔj kɨ a ad deg gerɨn Ngon de a tee hɔi ko kɨ dɔrãt; kamla girrdeg tube kɨ dɔningt a gan gud, na a oon Ngon de ndɨ ɗe dɔ kilndiigt kɨ dɔrãt, kam tɔgt kɨ ngãi, kɨ kunj kɨ ɗangereng. 31Na a la malaikag lon kɨ towmand kɨbo, na a kawɨn kɨ mbedg ko dɔ kum dɔningt kɨsɔɔ mbã kɨ dɔboi dɔnint ko mad.
32I ndoon terr ta 'nten ro kag mbaiɓoodt, lon dɔjiag telɨn kɨ mbool, na mbiag ɓan a ne, i gerɨn kad ɓar kɨ kud i nderbe. 33Titbe, ĩng kaa ne, lon a oon nyag'n non tube ɗan nya ye maj kad i gerɨn Ngon de i nderbe, i tabitgt losɨ. 34Rota la m'ndɨ m'elsɨ kɨ ndim dõ ye, girr kaa deg'n ɗan a tɔi al ɓaitɔ, na nyag'n non a ɗan nya. 35Dɔrã kɨ dɔning a tɔin kɔ, tag lom a tɔin kɔ al bat.
De kɨ ger ndɔ ɗe Ngon de goto, i ndɨn dɔgt
(Oo Mrk 13:32-35; Luk 17:26-27)
36Na ta dɔ ndɔ ɗeat, ke dɔkàd ɗeat, de mad kɨɗa kɨ ger goto, malaikag kɨ dɔrãt al ho. Ngon al ho, de mad kɨ ger goto, na Bɔw kɨ kɨɗanbe koon. 37Nya'n ɗa nya gong Noet ye, i titbe ho la a ɗan nya ndɔ ɗe Ngon det ye; 38kɨta kam ndɔgt kɨ kete nõ man mbɔkɨt deg ndɨ san, ndɨ ãin, ndɨ taana, ndɨ adɨn ngandg ɗanɓe, mbã ndɔt'n Noe and kam toot kɨbo. 39Na gaan ta mad al bat mbã man mbɔkɨ ɗe tɔld pet, a i titbe ndɔ ɗe Ngon det ho. 40Kamla deg joo a ĩn kam ndɔɔt a ne, a unɨn kɨkɨɗa, na a nyan kɨmad. 41Dekɨdẽg joo a urrɨn nya lo kɨɗa a ne, a unɨn kɨkɨɗa na a nyan kɨmad. 42Kɨtɔ 'nten i ndɨn dɔgt kɨta i gerɨn ndɔ ɗe Bɨraɓe losɨ al. 43Kɨ i gerɨn maj, neni ngeɓe ger dɔkàd'n ɓog a ɗet a ne, neni a ndɨ dɔgt, na a nya ad mbutɨn kuj lon al. 44Kɨtɔ 'nten, ĩn kaa i ɗan rosɨ kɨ ndɔg kɨta dɔkàdt'n a i ndan kamsɨ dɔt al nõ la Ngon de a ɗe ye.
Ta lo ɓer kɨro kɨ ɓer kɨmajal
(Oo Luk 12:41-48)
45Nõ i ɓer kɨro kɨ ngekumtɔg'n ngea ndaa dɔ degt kɨ ɓe lon kad ad'd nyasa kɨ dɔ kada a? 46Ɓer'n non i ngeronel, lon ngea ɗe, na ngaha ndɨ ɗa kɨla'n non titbe. 47Rota la m'ndɨ m'elsɨ kɨ ndim dõ ye, ngea a ndaa dɔ nyamajgt lon tube. 48Na ĩla ɓer kɨmajal'n non el kamɨnt an: Ngeem a ndɨ kɔkɨ ɓaitɔ, 49na mbagɨr tɨnda ɓer namɨng, sa ho ãi ho nat kɨ gõkãikasɨg, 50ngeɓer'n non a ɗe ndɔt kɨ nda kamɨn dɔt al, kɨ dɔkàd'n ger al tɔ, 51a ga ganga nat joo, na ada lo ndɨ nat kɨ ngéndokumdeg, nu la a nõt kɨ dõ ngang ye.
Zur Zeit ausgewählt:
Matie 24: MlL
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Mbai Bible Revision © Bible Society of Chad, 2015.
