Matie 18
18
Nõ i kɨbo tɔi kam kõɓet kɨ dɔrãgt
(Oo Mrk 9:33-37; Luk 9:46-48)
1Dɔkàdat nõ la ngéndoog ɗen ro Jejut, na ndɨjena anan: Nõ i kɨbo tɔi kam kõɓet kɨ dɔrãgt a?
2Jeju kun ngon kɨdu mad, ndaa dandt, 3na an: Rota la m'ndɨ m'elsɨ kɨ tɨga wakɨsɨ ye, ĩla i telɨn kɨ ro Luwaht, na i telɨn tit ngan kɨdug al a ne, a andɨn kam kõɓet kɨ dɔrãgt al bat. 4De'n a sɔldɔn tit ngon'n ɗan a ne, ĩla a i kɨbo tɔi kam kõɓet kɨ dɔrãgt ye. 5De'n ndɨ hɔ ngon kɨdu mad kɨ tit'n ɗan kɨ ront kɨtakulɨm a ne, i mĩ kɨɓe la hɔm kɨront ye.
Ta i dɔ det'n kɨlaɗaa ad madɓea so kam majalt
(Oo Mrk 9:42-48; Luk 17:1-2)
6Na dekɨɗen a ad kɨkɨɗa ku ngan kɨdugt ngékadɨm kamd'n non, so kam majalt a ne, i sooat kad lan mbalkusɨ nya kɔat, lana ne ɓulbahbot. 7Beto lo deg kɨ dɔningt kɨta kad'n adɨn deg son kam majalt. Nyag kɨ kad deg son taa a ɗen yeen; na beto lo de'n nyag kɨ kad deg son ɗen kɨtakula. 8Ĩla jii a ke njai tel nya kɨ gai gigt kad i so kam majalt a ne, i gangd, i lad kɔ sãi roit; i soot kad and kumkajirt kɨ ro kɨ gind ke moot, tɔi kad lain kɨ jii kɨjoo, ke njai kɨjoo kam horrt kɨ tokɨnõt. 9Na ĩla kumi tel nya kɨ gai gigt kad i so kam majalt a ne, ɔrra, i laa kɔ sãi roit; i soot kad and kumkajirt kɨ kumi kɨɗa tɔi kad lain kɨ kumi kɨjoo kam horr jahanamat.
Terrta lo bat kɨ nãi
(Oo Luk 15:3-7)
10Oon go rosɨ maj, kad i kidɨn kɨkɨɗa ku ngangt'n non al, kɨta m'ndɨ m'elsɨ kɨndɔgbe malaikag lod kɨ dõ dɔrãt ndɨ oon takum Bɔwm'n hã i kam dɔrãt dõ. 11Kɨtɔ Ngon de ɗe kɨta kaj nya kɨ nãi. 12Tagahsɨ i ɗi a? Ĩla de mad aw kɨ batg ɓu, na kɨkɨɗa kudt nãi ye, a nya kɨ dɔjikɨɗa gidaijikɨɗa'n non kɨdɔ mbalt, na aw sah bat kɨ nãi ale? 13Na ĩla ngaha a ne, rota, m'elsɨ kɨ ndim dõ, a ɗa ronel dɔat tɔi kɨ dɔjikɨɗa gidaijikɨɗag'n nãin al nõ. 14Titbe la Bɔwsɨ'n i kam dɔrãt dõ ndig al kad kɨkɨɗa ku ngan kɨdugt'n non nujɨn.
Nyago majalg kɨ ngonkõi ɗa sei
15Ĩla ngonkõi ɗa majal a ne, aw i ngaha, i daa majal loa, ĩn sia dɔsɨ joo be. Ĩla oo dɔ ta loi a ne, i ngah ngonkõi. 16Ĩla oo dɔ ta loi al a ne, un de mad kɨɗa a ke deg joo nat sei, kɨtakad ta tube ndahn nat kɨgo takelt lo ngémanajg joo ke mɨta. 17Ĩla mbet koo dɔ ta lod a ne, el ngékawna, na ĩla mbet koo dɔ ta lo ngékawna ho a ne, ooa tit de kɨ ger Luwah al, i tit ngetaa lambo be. 18Rota la m'ndɨ m'elsɨ kɨ ndim dõ ye: Nya tube'n a i dɔn dɔningt, a dɔn kam dɔrãt dõ ho, ke nya kɨɗen i tutɨn dɔningt ne a ne, a tutɨn kam dɔrãt dõ ho. 19M'ndɨ m'elsɨ kɨ ndim dõ ɓaitɔ, ĩla deg joo kusɨt dɔningt la, adɨn kamd i nat kad kɔn ne nya mad a ne, Bɔwm'n i kam dɔrãt dõ a ad'd nyàa nõ. 20Kɨtɔ lot'n deg joo ke mɨta kawɨn na kɨ tit kam tɔmt a ne, mĩ dandt nõbe.
Ta lo ɓer'n nyàgo majal lo ɓer namɨn al
(Oo Luk 17:4)
21Kamla Pierr ɗe roat ela an: Bɨraɓe, lon ngonkom ɗam majal ye, nja bãi m'a m'nyago majal loa kɔ a? Mbã nja tanãimɨta a?
22Jeju ela an: M'eli m'an mbã nja tanãimɨta al, na nja dɔtanãimɨta mbã nja tanãimɨta.
23Titbe, kõɓe kɨ dɔrãgt i tit ta lo ngar mad'n ndig tɨda kɔr nyag lon kɨ ji ɓergt lon. 24Ɗen kɨ ɓer mad kɨ girra loa i ngãi dɔat, girra'n hã i dɔ ɓert'n non i nar kɨ ngãi, ĩla i nar loj kam ndɔt kɨ ɓone a ne, a i miliõ ngãi ngãi kɨ asɨ ba tube al. 25Na ɓer oo nya kɨ ban al, ad ngea un ndɨn kad ɗawɨna, kɨ nẽa, kɨ ngana, kɨ nyag loa tube, kad ban ne girra kɨ dɔat. 26Ɓer so kɨber nja ngeent, ɔsɨ dɔn ber nõat an: Bɨraɓe, i ndɨdɔt sem, na m'a m'bai tube. 27Ngeɓer oo kum ɓer lon kɨ lotondot, ad ɔrra, nya girra lon kɨ dɔat. 28Ɓer'n non tee aw, na ndɔd kɨkɨɗa ku ɓer namɨngt, ĩn girra loa to dɔat asɨ nar ɓu; so sia, hɔa kɨnyerkɔat an: I bam girra lom kɨ dɔit. 29Nama so kɨ njaat, kɔa an: Ɗoo wai, i ndɨdɔt sem, na m'a m'bai. 30Na ndig al, aw sia laa dangait mbã kad ba girra kɨ dɔnt kamtã. 31Lon ɓer namag oon nya'n ɗa nya ye, kamd il kɨ dumbit ad ɗe elɨn nged nyan da nya. 32Kamla ngea la kuna, na ela an: Ɓer kɨmajal, m'nyago girra loi kɨtaagbe kɨ dɔit kɨta nõ'n i nõ kɨ dɔmt, 33ye, sumba kad ĩ kaa oo kumtondo lo nami tit'n m'oon kumtondo loi ye ale? 34Ngea ɓawong ad laa ji ngéɗanyakɨtot, mbã kad kɨ ba girra kɨ dɔnt tube.
35Titbe la Bɔwm kɨ dõ dɔrãt a ɗan sesɨ ho ye, ĩla dekɨɗen kusɨt a nyàgo majal lo ngonkõ kɔ kɨ ngarkamɨn tube al.
Zur Zeit ausgewählt:
Matie 18: MlL
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Mbai Bible Revision © Bible Society of Chad, 2015.
