Matie 19
19
Jeju ndoo deg kad tuɓan nẽdg al
(Oo Mrk 10:1-12; Det 24:1-4; Mat 5:31-32)
1Lon Jeju eltag'n non tɨga woi ye, ɓai dɔning Galilet, na aw dɔning Judet gid bah Jurdẽt ko nu. 2Bakad koosɨg ndulon goa, na nõbe yoot ngémõig. 3Parisɨg ɗen roat, na elɨna ta, sahn ne hɔa kɨ gum ta kɨ taat, anan: I goɗobat kad de tuɓa nẽn kɨta ta mad kɨɗen e?
4Jeju tur an: I dan kam maktubt ale? Kad lo yaɓoodat nu, ngendahd ndah dekɨdɨngã kɨ dekɨdẽ, 5na el an: Kɨtɔ 'nten la dekɨdɨngã a nyan bɔwɨn kɨ kõ na tĩnyan na kɨ nẽn, na ĩn tujoo a telɨn dãro kɨɗabe. 6Titbe a ĩn joo gog al ta, na ĩn dãro kɨɗa. Kɨtɔ 'nten de ot gang nyan Luwah la nat.
7Elɨna anan: Kɨtɔɗi Moij ndangɨn kete kad adɨn maktub tuɓa dekɨdẽ, na kɨ tuɓana a?
8An: I kɨta kam kongkong losɨ la Moij nyan ta ɗob kad i tuɓan nẽsɨg ye; na lo yaɓoodat i titbe al. 9Na m'elsɨ: De'n tuɓa nẽn, na ĩla i kɨta sah ngaw mad al, na taa dekɨdẽ mad kɨɗang a ne, i ngesah dekɨdẽ ta sah.
10Ngéndoog loa elɨna anan: Ĩla ta lo dekɨdɨngã kɨ nẽa i titbe a ne, maj kad de taa dekɨdẽ al.
11Turd an: Deg tube hã gerɨn ta 'nten al, na ĩgɨn Luwah ad'd tã. 12Duba, deg madg teen kokɨla kam kõdgt asɨn taa dekɨdẽg al, na deg madg asɨn taa dekɨdẽg al kɨta deg hɔnd kɨ lo ngetɔgt ɔrrɨn gomd. Kamla deg madg awɨn nõ, ĩn kɨɓe kɨ dɔd telɨn rod degt kɨ ɔrrɨn gomd kɨta kõɓe kɨ dɔrãt. De'n asɨ ger girr ta 'nten a ne, kɨ ger.
Jeju njangdɔ ngankɨɗoig
(Oo Mrk 10:13-16; Luk 18:15-17)
13Kamla deg ɗen kɨ ngan kɨɗoig kɨ ro Jejut, kɨtakad ndajɨn dɔdt elɨn ta kɨ Luwah kɨtad. Na ngéndoog lo Jeju ɔsɨnd kɨgog kɨ kɔl. 14Na Jeju an: I nyan ngan kɨɗoig ad ɗen kɨ romt. Ot lan kag nõdt. Kɨtɔ kõɓe lo Luwah i lo deg kɨ titd.
15Lon Jeju nda jin dɔ ngankɨɗoig woi ye, ɓai nõbe aw lot kɨɗang.
Basa mad kɨ ngemaj sah kumkajir kɨ mbãkɨnõt ro Jejut
(Oo Mrk 10:17-31; Luk 18:18-30; 1 Tim 6:9-10)
16Na oon so, de mad ɗe roat, na ela an: Ngendoo deg, ɗi kɨmaj kaa m'ɗa kad m'ngan kumkajir kɨ mbãkɨnõt a?
17Jeju tura an: Kɨtɔɗi i ndɨjem ta dɔ nyat'n i kɨmaj a? Kɨ kɨɗabe la i kɨmaj ye, i Luwah. Ĩla i ge kand kam kumkajirt a ne, i ngomgo mberkɨndag.
18Basa, ela an: Mberkɨndag kɨɗa a?
Jeju tur an: A i tɔl de al, a i sah ngaw ke dekɨdẽ al, a i ɓoog al, a i manaj kɨ ngom al. 19Ɔsɨgon bɔwi kɨ kõi. A i tar madɓei tit roi be.
20Basan non ela an: M'ngom go tag'n non tube; ye ɗi maj kad m'ɗa ɓaitɔ a?
21Jeju ela an: Ĩla i ge kɨ i asɨnatap a ne, aw a kɨ i ɗaw nyag loi tube, i luɓo ngéndog, na a i ngah nyamajg kɨ kam dɔrãt dõ. Kamla i ɗe i ndulo gom.
22Lon basa oo dɔ ta'n non ye, tɔi aw kɨ kamkil, kɨta nyamajg loa i ngãi. 23Jeju el ngéndoog lon an: Rota, m'ndɨ m'elsɨ kɨ ndim dõ; lo gang lam kad de kɨ ngemaj a and kam kõɓet kɨ dɔrãt dõ. 24M'ndɨ m'elsɨ gog ɓaitɔ, õ al kad lukum and ta bulo libirt tɔi kad de kɨ ngemaj and kam kõɓet lo Luwah.
25Lon ngéndoog oon dɔ ta 'nten ye, yad kɨdumbit ad anan: Nõ a asɨ ngah kaj a?
26Jeju nda kumɨn kɨ dɔdt, eld an: I rot al ro degt, na ro Luwaht nyag tube i root.
27Kamla Pierr un ta ela an: Oo be. Jĩ kɨ nya nyag tube kɔ, na kɨ ndulo goi, ye nya ɗi a i ɗa kɨtaj?
28Jeju eld an: Rota la m'ndɨ m'elsɨ kɨ tɨga wakɨsɨ ye, i kaglo ɗa nyag tube gog kij, lon Ngon de a ndɨn dɔ pong kɔsɨgont lon, ĩgɨn hã i ndulon gom, ĩng kaa a i ndɨn dɔ pong kõɓet kɨ kɨlagidaijoo, a i gangɨnta dɔ girr Israelt kɨ kɨlagidaijoo. 29Na dekɨɗen a nya kujg lon kɔ, kɨ ngankõn kɨdɨngãg kɨ kɨdẽg, kɨ bɔwɨn, kɨ kon, kɨ nẽn, kɨ nganɨn, ke ndɔɔg lon kɨtatɔm a ne, a ngah dɔt nja ɓu, na a õ nduba kumkajir kɨ mbãkɨnõt ɓaitɔ. 30Deg ngãibe ku kɨdasagt a telɨn kɨ dɔboit, na deg ngãibe ku kɨdɔboigt tɔ a telɨn kɨdasa.
Zur Zeit ausgewählt:
Matie 19: MlL
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Mbai Bible Revision © Bible Society of Chad, 2015.
