MEEKYENA 13
13
Veesununda
(Nku 1:19-33)
1Naasa Nndumi Iruva karera na Mose, kammbia, 2“Ruma vandu vandesununda uruka lwa Kanaani, elo nsheningaa vana va Israeli. Wo ufyari lurumi nndu umwi eto avaa nsonguru waawo.” 3Naasa Mose kenndya unyanga elo, karuma vandu ewo vauka alya kasa ka Parani, indi.
4Ufyari lwa Ruben nsongoru alesauwa ni Shamua mwana wa Sakuri.
5Ufyari lwa Simon nsongoru alesauwa ni Shefti mwana wa Hori.
6Ufyari lwa Yuda nsongoru alesauwa ni Kalebi mwana wa Yefune.
7Ufyari lwa Iskari nsongoru alesauwa ni Igali mwana wa Yosefu.
8Ufyari lwa Efraimu nsongoru alesauwa ni Hoshea mwana wa Nuni.
9Ufyari lwa Benyaminy nsongoru alesauwa ni Palti mwana wa Rafu.
10Ufyari lwa Sablon nsongoru alesauwa ni Gadieli mwana wa Sodi.
11Ufyari lwa Manase nsongoru alesauwa ni Gadi mwana wa Susi.
12Ufyari lwa Dani nsongoru alesauwa ni Amieli mwana wa Gemali.
13Ufyari lwa Aseri nsongoru alesauwa ni Seturi mwana wa Mikaeli.
14Ufyari lwa Naftali nsongoru alesauwa ni Nabi mwana wa Wofusi.
15Ufyari lwa Gadi nsongoru alesauwa ni Geueli mwana wa Maki.
16Yewo mmbo vandu Mose alevaruma vandesaiya uruka. Hoshea we mwana wa Nuni, Mose alemfishya irina ni Yosua.
17Mose kavaruma vandesaiya uruka lwa Kanaani, kavavia; “Rwen ulaalu mwiire Negebu mundefika kulya uwe, 18mumanye shaasa uruka lukai na vandu va vayo, mumanye kwakooya vatiri finya ao m mbafwafwa ao vakee veengyi ao vaangu; 19na uruka lwawo ni usha ao ni ukasha, na kwakooya vakee maronda maronda ao n'turuveny vakai; 20na kwakooya lutiri shoonga ao mwa shaa, ao kwakooya Lutiri ngorosho. Kaaryen deny mulweenngye na nndunda ta uruka elo.” Nakyo kyekee kyeeri nndunda ta misabibu ta mbee itikeevira. 21Kyasia vakarwa indesaiya uruka uka kasa ka Sini fika Rehobu na Hamati 22Vakarwa fika Negebu, na Hebron, na Ahimani, na Sheshai, na Talmai, mfo vekee vana va Anaki. Na Hebron mmuri weesongoye soani wa Misri myaka mfungare uka untano. 23Vakashefika imungony lya Eshikoli, nang'u vakarummbwa-u kivale kya sabibu vandu vavii vakakikurika raare, na komamanga nato, na marwaa. 24Imungo yelyo mmbo lyevaangwa Eshikoli kyeendwa ni kivale kilya kya misabibu valeutau. 25Veekimaa isaiya uruka vakawuya vammaa mikonu makumi aana. 26Vakandekooya Mose na Aron na ironda lyoose lya vana va Israeli alya kasa ka Paran kulya Kadeshi, vakaveenngye mbony, wo na vandu woose vakawoora na ndunda ta uruka elo. 27Vakavavia, “Mmbo lulefika kulya muleluruma, ni uruka lwiishwe malela na uki, na yeti nto ndunda ta vayo. 28Lyo vandu va uruka yelo vatiri finya, na miri yaawo ni turuve niini, lukavelollya-fo na vana va Anaki. 29Vaameleki mmbo vakee urukeny lwa Negebu, na Valuti na Vayebusi, na Vaamori vakakaa mafumbuu na vakanaani wo vakakaa mbai ya yeeve na mbaambaa ya Yordan.” 30Naasa Kalebi kakaarisa vandu yoo Mose akai kavavia, “nndeny lusaame sere lundetira uruka, mashika kulakooye lushevingaa.” 31Lyo vandu valya valerwa nawe vakaamba, Llushidimaa irwa lundekabana na vandu yeva-fo, mashika vatiri finya ngota yese. 32Vakavia vana va Israeli mbony shuumu kya uruka elo valendelusaiya, vakavavia; “uruka yelo llutiri shoonga timaa vandu va vayo-fo, na vandu yewo mmbo vakee vaasha nnu. 33Nafo lukalollyafo Vanefili, vana va Anaki, mmbo vana va Vanefili, mbee yaawo lukava sha ngallya, ni indo valelulollya.”
Zur Zeit ausgewählt:
MEEKYENA 13: MAS2
Markierung
Teilen
Vergleichen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
The Holy Bible in Kimashami © Bible Society of Tanzania, 2016.