MEEKYENA 12
12
Miriamu Akapwa
1Kyasia Mariamu na Aron vakamina Mose kimaruma kya nka Nkushi eenrie, 2Wo vakaamba, A ndesa Nndumi Iruva mmbo alerera na Mose muni nalarere neese? Na Nndumi Iruva keeta marero awo. 3Naasa nndu yeto evangwaa Mose mmbo ekee nndu mfoo nnu ngota vandu woose kunu ulaniny, 4Nndumi Iruva karera swany na Mose na Miryamu na Aron, kavavia, Kwiibony mweende alya yeemeny yeele. Naasa vakeenda ve vararu vakasomuka. 5Nndumi Iruva kavasheya ekee ifishiny, kashesalala sha ngo alya mwaangony wa yeema, kavaanga-u Aron na Miryamu, vakasomuka ve vavii na alya boo, 6Kavavia, Aranyiny marero akwa, kwiifo nkisuku nnangani yaany, yeny Nndumi Iruva mmbo nshekooraa nawe yooryeny, shirere nawe, 7Lyo nshi indo kikai kwa Mose-fo, we mmbo akee nsaari kwakwa. 8We mmbo sharera nawe kisangu na kana kwa kana, sharera nawe paa kulaiyoo fyaaso; A nkikyi elyi yeni kulore mweereiye Imina ishinga lyakwa, we Mose?
9Nndumi Iruva karooyo nngoo kimaruma kyawo, naasa kookau. 10Ifishi lyilya lyikauka alya ulaleny, Mariamu kawaro niivave katefuka kava sha laura ya kyaamwi, Aron kallola kakooya amfwana sha laura ya kyaamwi, kimaruma kya ivave llya. 11Naasa Aron kavia Mose, “Woi nndumi wakwa shakutereva nnu kulalwekyerye ulyamari elu uwe yeeru-fo, mashika mmbo lwantana fya urunng'ani na ulyamari. 12Shakooshora nalave sha umwi alewonika efiiye nyama ya mwiili wakwe kyenga, kyeeri ekeewonika.” 13Mose kafuuya Nndumi Iruva, kaamba, “Shakutereva nnu woi Iruva Nshiise.” 14Nndumi Iruva kavia Mose, “A kukooye ndeeye alemmishya maare kyisanguny, eelollya-se usutu ando a mikonu mfungare? Kweekyo nsomute yefo pooya ulale na keefo mikonu mfungare.” 15Naasa Mariamu kafinngywa poo ya ulale ando a mikonu mfungare kulaore vandu valeenda kyaaro kutani llya Mariamu aatwa mmba lyingyi. 16Naasany llyo vandu valeepo kyaaro wooka Haserothi vakandevika ulale kulya kasa ka Parani.
Zur Zeit ausgewählt:
MEEKYENA 12: MAS2
Markierung
Teilen
Vergleichen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
The Holy Bible in Kimashami © Bible Society of Tanzania, 2016.