Valevi 27
27
Uramba lwa Iinutya Kyaasa
1Naasa Nndumi Iruva karera na Mose kammbia, 2“Rera na vana va Israeli kuvavie, kyeeri nndu ashiinutyaa kyaasa kyakwe, vandu yewo mmbo vashesalaa mbee ya Nndumi Iruva shaasa kusheworaa yewe.” 3Na yeekyena lyafo nlya womi, kupookya wa myaaka makumi avii kufike wa makumi arindaru; yeekyena lyafo lyive lya fesa makumi araanu, fesa ya ando eele. 4Kwakooa ni nndu nka yeekyena lyafo lyive fesa makumi araru. 5Na kwakooya ni myaaka iraanu kufike makumi avii, yeekyena lyafo lyive fesa makumi avii kwa nndu nndumi na fesa ikumi kwa nndu nka. 6Na lyingi yeto wa mwiiri umwi fika myaaka iraanu, yeekyena lyive fesa isaanu kwa yeto wa kyuumi, na fesa isaru kwa yeto wa kika. 7Kaamba mmwasi ya makumi arindaru, yeekyena ni fesa ikumi.
8Kwakooya ni vakiduva wo veendwa kwa nkohani, nawe nambikye kyeeso kidu, kiinani na kyaasa kyakwe, niindo nkohani ashemweesyaa.
9Na kwakooya ni kindo kyeevikya yekyo vandu vautaa kive kiraso kyeekora, wo kindo ekyo kisheutyoo Nndumi Iruva ni nndu moose mmbo kivaa kyeele. 10We nalaalashwafo, yeto nsha neeto nkasha, ao nsha na nkasha-fo, llyo kindo kyeevikya na kindo, yee, lyo fyoose five fyeele. 11Na kwankooya nkindo kilakee kyeele, na kilautwaa kwa Nndumi Iruva, naasa kindo ekyo kyeendwa kwa nkohani; 12na nkohani namweesye wuuru, kyikava kisha ao kikasha, kyeeso ekyo nkohani ashambaa niindo kivaa. 13Lyo kwakooya nndu akundye ikiviira naasa neengerye-u kyenga kya karaanu kya vayo.
14Na kwakooya nndu aniingya mmba ive kiraso kyakwe kwa Nndumi Iruva, llyo nkohani ashevikaa kyeeso kya wuuru lwa vayo, ikava shisha ao shikasha, niindo kivaa. 15Na nndu yeto aniingya mmba yakwe kwa Nndumi Iruva kwakooya akunda yiivira, neengera-u kyenga kya karaanu kya wuuru lwa vayo, llyo iveny yakwe. 16Na kwakooya nndu aniingya Nndumi Iruva irema lyakwe, llyo yeekyena lya vayo lyishevaa sha lya findo filya firemwaau, kibaba kimwi kya nganu kyeekennyo fesa makumi araanu. 17Kwakooya aniingya Nndumi Iruva nrema yakwe kupookya mwaaka wa yubile, lyikae indo shaasa yeekyena lya vayo lyikai. 18Lyo kaniingya nrema yakwe yubile yimiira, llyo nkohani ashemweekennya fesa ya vayo kiinani na myaaka isaayeu kufikye mwaaka wa yubile, yeekyena lya vayo lyiveangwaa-u. 19Na yeto aleniingya Nndumi Iruva nrema yakwe kwakooya akundye yiivira, llyo neengeryeu kyenga kya karaanu kya fesa ta vayo, kiirikyo indo. 20Lyo anra nalakunda ilyiviira, ao kwakooya akumbya nndu ungyi nrema yeyo, llyikivaa iviira-fo; 21nrema yeyo mmbo ivaa sheele kwa Nndumi Iruva elyi yammira mwaaka wa yubile, kwankooya ni shiniingye kwa Nndumi Iruva deny, mmbo ivaa ya nkohani. 22Na kwakooya aniingya Nndumi Iruva nrema aleyuura, lyikee lyakwe uka elyo; 23llyo nkohani ashemweekenyaa yeekyena lyakwe tana kwafika mwaaka wa yubile, na nkonu yeto asheniingya yeekyena lya vayo, kive nkindo kyeele kwa Nndumi Iruva. 24Mwaaka wa yubile nrema yeyo mmbo iwuiya muni yeto alelyikumba. 25Na yeekyena lyafo lyive lya fesa ya ando kweele, shaasa fyeeso fikai.
26Kindo kiwonikye kya mbee, mmbo kyikee kyeele kya Nndumi Iruva, kulave nndu akivika kyeele lyingi-fo; kwakooya nng'umbe ao mburu, ao suva, yekyo nkya Nndumi Iruva. 27Na kwakooya nkya kindo kitefusu, llyo ashekiviraa shaasa yeekyena lyakwe lyikai, neengerye-u kyenga kya karaanu kya wuuru lwa vayo, ao kikanra kilaviirwa, kikumbwa wuuru lwa vayo.
28Kindo kikee kivike kwa Nndumi Iruva kilakumbwa nta kilaaviirwafo, kwakooya ni nndu, ao kindo, ao irema, wo kindo kikee kyuute kwa Nndumi Iruva mmbo kikee kyeele deny kwa Nndumi Iruva. 29Naakwa nndu akee mwaate mashoreny a Nndumi nnyavirwaa-fo nkuti nawaawa.
30Kyenga kya ikumi kya fimu, mbeu ya uruka, ao ndunda mfya Nndumi Iruva, mmbo fikee fyeele. 31Na kwakooya nndu akunda iviirau kindo kyengeny yekyo kya ikumi, mmbo asheengeryau kyenga kya karaanu kya vayo. 32Na kyenga kya karaanu kya ng'umbe na moonri, findo fyoose fishiiswaa, kyenga kya karaanu kya ng'umbe na moonri, findo fyoose fishiiswaa, kyenga kya ikumi mfya Nndumi Iruva. 33Kilaveswa vai nkisha ao kikasha-fo, nta kilaala shwa-fo kwakooya kyaalashwa, naasany, fyoose fii fivii fivikwa fyeele; filaviirwa-fo.
34Yaa nng'u mavavasyo, Nndumi Iruva alevavasya Mose kimaruma kya vana va Israeli alya ifumbuny lya Sinai.
Zur Zeit ausgewählt:
Valevi 27: MAS2
Markierung
Teilen
Vergleichen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
The Holy Bible in Kimashami © Bible Society of Tanzania, 2016.