उत्पत्ति 4
4
कैनो रे जरीये हाबिलो री अत्या
1जेबे आदम आपणी लाड़ी हव्वा साथे रया तो तेबे तेसे गर्भवती ऊई की कैन#4:1 कैन कैनो रा मतलब ए आसिल कित्तेया रा नाओं रे पाऊए खे जन्म दित्तेया ओर बोलेया, “मैं यहोवे री मतादा ते एक पाऊए खे जन्म देई राखेया।” 2तेबे तेसे तेसरे पाई हाबिलो खे बी जन्म दित्तेया। हाबिल पेडा-बाकरिया खे चराणे वाल़ा बणी गा, पर कैन जमीना पाँदे जिम्मीदारा करने वाल़ा जिम्मीदार बणीगा। 3कुछ दिना ते बाद कैन यहोवे गे जमीना री फसला बीचा ते कुछ पेंट ली आया। 4ओर हाबिल बी आपणियां पेडा-बाकरिया बीचा ते सबी ते अच्छे बच्चे पेंट चढ़ाणे खे ली आया ओर तिना री चर्बिया री पेंट चढ़ाई। तेबे यहोवे हाबिल ओर तेसरी पेंट तो ग्रहण कित्ती, 5पर यहोवे कैन ओर तेसरी पेंट ग्रहण नि कित्ती। इजी खे केनो खे बऊत गुस्सा आईगा ओर से बऊत दु:खी ऊईगा। 6तेबे यहोवे कैनो खे बोलेया, “तैं गुस्सा कऊँ कित्तेया? ओर तू दु:खी कऊँ ऊईगा? 7जे तूँ पला करे, तो तेरी पेंट ग्रहण कित्ती जाणी ओर जे तूँ पला नि करो, तो पाप तेरे नेड़े ईए ओर तेस पापो री इच्छा तेरिया तरफा खे ऊणी ओर तां तेस पापो पाँदे राज करना।” 8एक दिन एड़ा ऊआ की जेबे सेयो मैदानो रे थे तेबे कैने आपणे पाई हाबिलो खे बोलेया कि आओ आसे डोरूआ खे चलिए ओर कैने आपणा पाई हाबिल काईता। 9तेबे यहोवे कैनो ते पूछेया, “तेरा पाई हाबिल केयी ए?” कैने बोलेया, “माखे निया पता, आऊँ क्या आपणे पाईए रा रखवाल़ा ए?”#4:9 इब्रानी 12:24 10यहोवे बोलेया, “तैं क्या करी राखेया? देख, तेरे पाईए रा खून जमीना ते मेरी तरफा खे चींगी की मेरी दुहाई देणे लगी रा। 11इजी री खातर एबे जमीन, जेसे तेरे पाईए रा खून तेरे आथो ते पीणे खे आपणा मूँ खोली राखेया, तेसारी तरफा ते तूँ स्रापित ए। 12चाए तूँ जमीना दे कितणी बी तागत लगाए, तेबे बी ताखे पूरी मईणता रा फल़ नि मिलणा ओर तूँ तरतिया पाँदे पटकणे वाल़ा ओर जगा-जगा रिंडणे वाल़ा ऊणा।” 13तेबे कैने यहोवे खे बोलेया, “मेरी सजा सईणे ते बारे ए। 14देख, तैं आज आऊँ एते जगा ते निकयाल़ी राखेया ओर मां तेरी नजरा ते दूर रणा ओर तरतिया पाँदे पटकणे वाल़ा ओर रिंडणे वाल़ा रऊँगा ओर जेस केसी खे आँऊ मिलणा, तेस आऊँ काई देणा।” 15इजी बजअ ते यहोवे तेसखे बोलेया, “जो कोई ताखे काओगा, तेसते सातगुणा बदला लया जाणा।” तेबे यहोवे कैनो रे शरीरो पाँदे एक चिह्न् लगाया ताकि कोई तेसखे काओ नि।
कैनो रा खानदान
16तेबे कैन यहोवे रे सामणे ते निकल़ी गा ओर नोद नाओं रे प्रदेशो रे, जो अदनो रे पूर्वो री तरफा खे ए, रणे लगेया। 17जेबे कैन आपणी लाड़िया साथे रया तो तेबे से गर्भवती ऊई ओर तेसा रे हनोक जम्मेया। तेबे कैने एक शईर बसाया ओर तेस शईरो रा नाओं तिने आपणे पाऊए रे नाओं पाँदे हनोक राखेया। 18हनोको ते ईराद जम्मेया, ईरादो ते महूयाएल जम्मेया, महूयाएलो ते मतूशाएल ओर मतूशाएलो ते लेमेक जम्मेया। 19लेमेके दूई जवाणसा साथे ब्या कित्तेया, तिना बीचा ते एकी रा नाओं आदा ओर दूजिया रा नाओं सिल्ला था। 20आदा रे याबाल जम्मेया। से तम्बूए रे रणे वाल़ेया रा ओर डांगरा खे पाल़ने वाल़े, इना दुँईं रा बाओ ऊआ। 21तेसरे पाईए रा नाओं यूबाल था, तेसरी ल्वाद बीणा ओर बंसरी बगैरा बाजे बजाओ थे। 22ओर सिल्ले बी तूबल-कैनो खे जन्म दित्तेया। से पीतल़ ओर लोए रे सारे पइने अथियारो खे कअड़णे वाल़ा ऊआ ओर तेसरी बईण नामाह थी।
23लेमेके आपणियां दुँईं लाड़िया आदा ओर सिल्ला खे बोलेया,
“मेरी सुणो; ओ मेरी लाड़ियो मेरी गल्ल त्यानो साथे सुण!
मैं एक नौजवान माणूं काया कऊँकि तिने आँऊ कायल करी राखेया।
24जेबे कैनो रा बदला सातगुणा लया जाणा,
तो लेमेको रा सतहतर गुणा लया जाणा।”
शेत ओर एनोश
25ओर आदम आपणी लाड़िया गे फेर गया ओर तेसा रे एक पाऊ जम्मेया ओर तेसरा नाओं ये बोली की शेत राखेया कि परमेशरे माखे हाबिलो रे बदले, जो कैने काया था, एक ओर ल्वाद दित्ती।#4:25 उत्प. 5:3,4 26ओर शेतो रे बी एक पाऊ जम्मेया ओर तिने तेसरा नाओं एनोश राखेया। तेस बखतो तेई लोक यहोवे ते प्रार्थना करने लगे।
Zur Zeit ausgewählt:
उत्पत्ति 4: BGH
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
This work is licensed under Creative Commons Attribution-ShareAlike 4.0 License.
