उत्पत्ति 3
3
पापो री शुरूआत
1परमेशर यहोवा जितणे बणो रे डांगर बणाए थे, तिना सबी बीचा ते साप चलाक था। तिने तेसा जवाणसा खे बोलेया, “क्या ये सच्च ए कि परमेशरे बोली राखेया एस बगीचे रे केसी बी डाल़ो रा कोई बी फल़ नि खाणा?”#3:1 प्रकाशित 12:9, प्रकाशित 20:2 2जवाणसे सापो खे बोलेया, “एते बगीचे रे फल़ आसे खाई सकूँए। 3पर जो डाल़ बगीचे बीचे ए, तिजी रे फल़ो रे बारे दे परमेशरे बोली राखेया कि ना तो तुसे से खाणा ओर ना ई से छूँणा, नई तो तुसे मरी जाणे।” 4तेबे सापे जवाणसा खे बोलेया, “तुसे पक्का नि मरने। 5बल्कि परमेशर आपू बी जाणोआ कि जेस दिने तुसा तिजी रा फल़ खाणा, तेस दिने ई तुसे समजदार ऊई जाणे ओर तुसे खरे ओर बुरे रा ज्ञान पाई की परमेशरो जेड़े ऊई जाणे।” 6इजी खे जेबे तेसे जवाणसे देखेया कि तेस डाल़ो रा फल़ खाणे खे अच्छा ए ओर देखेणे खे सुन्दर ए ओर अक्ल देणे खे चाणे जोगा बीए, तेबे तेसे तिजी ते तोड़ी की खाया ओर आपणे लाड़े खे बी दित्तेया ओर तिने बी खाया।#3:6 1 तीमुथि 2:14 7फेर तिना दुँईं रिया आखी खुली गिया ओर तेबे तिना खे पता लगेया कि आसे नांगे ए, तेबे तिने दाऊगल़े रे डाल़ो रे पत्ते जोड़ी-जोड़ी की लंगोटिया बणाई तिया।
पापो रा नतीजा
8परमेशर यहोवा दिनो रे ठण्डे बखते बगीचे रे कूमो था, तेसरी आवाज तिना खे सुणी। तेबे आदमी ओर तेसरी लाड़ी बगीचे रे डाल़ा बीचे परमेशर यहोवे ते लूकी गे। 9तेबे परमेशर यहोवा आका पाई की आदमिए ते पूछेया, “तूँ केयी आ?” 10तिने बोलेया कि आऊँ तुसा री आवाज बगीचे रे सुणी की डरीगा, कऊँकि आऊँ नांगा था, इजी बजअ ते लूकी गा। 11परमेशर यहोवा बोलेया, “ताखे किने बताया कि तूँ नांगा ए? जेते डाल़ो रा फल़ मैं ताखे खाणे खे ना कित्ती थी क्या तैं तिजी रा फल़ खाई राखेया?” 12तेबे आदमिए बोलेया, “जो जवाणस तैं मां साथे रणे खे दित्ती तेसे ई तेस डाल़ो रा फल़ माखे दित्तेया ओर मैं खाया।” 13तेबे परमेशर यहोवा जवाणसा खे बोलेया, “तैं ये क्या कित्तेया?” जवाणसे बोलेया, “सापे आऊँ बईकाईती, तेबे मैं खाया।”#3:13 रोमी 7:11; 2 कुरिन्थ 11:3; 1 तीमुथि 2:14 14तेबे परमेशर यहोवा सापो खे सजा देंदे बोलेया, “तैं जो एड़ा करी राखेया, तूँ सारे करेलू डांगर ओर सारे बणो रे जानवरा ते जादा स्रापित ए, तूँ पेटो रे पारे चलेया करना ओर तां पूरी जिन्दगी माट्टी चाटेया करनी; 15ओर मां तेरे ओर एसा जवाणसा बीचे ओर तेरे वंशो बीचे ओर एसा जवाणसा रे वंशो बीचे बैर पैदा करना। तिना तेरा सिर केसेया करना ओर तां तिना री आडिया रे डंग बाया करना।” 16तेबे परमेशरे तेसा जवाणसा खे बोलेया, “मां तेरी पीड़ ओर तेरा गर्भवती ऊणे रा दु:ख बऊत बढ़ाणा। तेरे पीड़ा साथे बाल़क जम्मेया करना ओर तेरी इच्छा तेरे लाड़े कनारे ऊणी ओर तेस तां पाँदे अक्क राखणा।”#3:16 1 कुरिन्थ 11:3, इफिसि 5:22, कुलु. 3:18 17परमेशरे आदमो खे बोलेया, “तैं जो आपणी लाड़िया री गल्ल सुणी ओर जेस डाल़ो रे फल़ो रे बारे दे मैं ताखे आज्ञा दित्ती थी कि तैं से नि खाणा, तैं से खाया, इजी खे जमीन तेरी बजअ ते स्रापित ए। तां तिजी री फसल पूरी जिन्दगी दु:खो साथे खाणी।#3:17 इब्रानी 6:8 18जमीना ताखे कांडे-चीअट जमाणे ओर तां तिना डोरूआ री उपज खाणी 19ओर तां कड़ी मईणत करी की रोटी खाणी ओर अन्तो रे माट्टिया रेई मिली जाणा, तूँ तिजी बीचा तेई निकयाल़ी राखेया ओर तूँ माट्टी ई तो अए ओर माट्टिया रेई फेर मिली जाणा।” 20तेबे आदमे आपणी लाड़िया रा नाओं हव्वा राखेया सबी माणूंआ री आम्मा सेईए। 21ओर परमेशर यहोवा आदमी ओर तेसरी लाड़िया खे चामड़े रे चोगे बणाई की तिना खे पन्याईते। 22तेबे परमेशर यहोवा बोलेया, “माणूं खरे ओर बुरे रा ज्ञान पायी की आसा बीचा ते एकी जेड़ा ऊईगा रा। एड़ा ई नि ओ कि से केथी आथ बढ़ाई की जिन्दगिया रे डाल़ो रा फल़ बी तोड़ी की खाई लो ओर सदा जिऊँदा रओ।”#3:22 प्रकाशित 2:7; प्रकाशित 22:2,14, 19; उत्प. 3:24; प्रकाशित 2:7 23इजी री खातर परमेशर यहोवा सेयो अदनो रे बगीचे ते निकयाल़ी ते, ताकि सेयो तेसा जमीना पाँदे जिम्मीदारा करो जेते बीचा ते से बणाया था। 24इजी खे परमेशर यहोवा आदमी तेथा ते नठाईता ओर जिन्दगिया रे डाल़ो री बाटा रा पईरा देणे खे अदनो रे बगीचे रे पूर्वो री तरफा खे करूबा खे, ओर चऊँ कनारे कूमणे वाल़ी लूपिया वाल़ी तलवार बी ठराईती।
Zur Zeit ausgewählt:
उत्पत्ति 3: BGH
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
This work is licensed under Creative Commons Attribution-ShareAlike 4.0 License.
