ROMA 3
3
Allahn sali ibahon pisan isa fug teg ulug hiyag isibag ane
1Ihi ane aru tem toho ihi halug Yahudi inap palimu welam teg? Enembilahap paltuk ane ariyen ap inindi fano am teg? 2Nori, anggolo palimu welam teg peruk lahiyon alem eke hag eke hag palimu wereg peruk lahi. Atam iminon tu: Allahn An nawene Yahudi inaben fano seneg lamuhup ulug ininggikmu imbibag. 3Ininggikmu imbibag angge famen it winonen oho fano roho seneg latusa fug. Iren sali pisan isarusa ulug ayeg waroho Allahn oho sali pisan isahu? 4#Mzm 51:4Eleg-o nori. Allahn uruk ane tem toho eneg uruk angge famen ap kinangmon obog toho atam haharoho imbibahon hikit toho si ane eneg uruk:
”Haren wene uruk lahenon obog toho tem toho uruk lahenma fag aruhu.
Alem hubam umbuhup halug
Hat eneg palimu welaruhun.”
5Niren si ane uruk laheyon ariyen Allahn tem ane urukon ino inam atuk halug niren nungge ehe ha reg? Allahn olok ane nunubam emberuk halug At indi sohu reg lit emberuk ano? Ihi ane aru ap kinangmonen peruk ane fahet uruk lahi. 6Eleg-o nori, indi sohu reg lit emberuk eleg. Allahn olok ane nunubam umbuk fug teg lalepma alem angginon kinangma werehon nangginoho kong telep? 7Anden si ane uruk lahiyon ariyen Allahn tem ane urukon ino leho feruk lahimu at siyag ulug nungge fahet unggum nubam umbuhu? 8It ap arimanowen nit abilit neneptuk lit, ”Siyag ane tulon ariyen fano ane inam aruhuwen siyag ane eneg turuk lamulen maniyek ulug wol neneptuk lahep,” ulug abilit neneptuk lit uruk inap arimanowen tem toho uruk ano? Ap ari hag toho uruk inap Allahn unggum unubam umbuhureg unusuk hag tehen mondabi siyahap enebuhu.
Ap obog toho Allah alukema werehon siyag ane turuk ulug haharoho imbibag ane
9Nori, nangginoho peruk lamuhuk? Ap winon apma weregma nit Yahudi ninap palimu welahe ano? Ari roho welahe fug. Yahudi inap men ununggul unuk Yahudi fuhon men obog toho arimano siyag ane turukon apma wereg ulug palimu suwesingga fam haharoho imbihi. 10#Mzm 14:1-3, 53:1-3Wene atamon fam haharoho werehon tu tot imin,
”Ap misihen oho tem perukon eleg.
11Ap misihen oho fuki roho wenggel ha fug anggeyen
Allah yami rurukon eleg.
12Ap obog toho kebunggalem fanowon embeselug un ke laruk lit
misihen oho fano ane tuk fug angge werehen it arimano fahet oho fano puk fug teg.
13 #
Mzm 5:9, 140:3 It enenggolobag fam ap waroho kilaptuk ambeg hag toho wereg.
Enembilik anggen handuhal turuk lit
enele si ane eneg uruken
enembilikmu pisanggo ayeg olokon wereg.
14 #
Mzm 10:7
Enele het-pet toho uruk lit
ahum sipuk ane eneg uruk.
15 #
Yes 59:7-8
Mep hinanggul ulug unuyug folo-folo laruk.
16Kema-kema laruk lit
ap enebe unusil inindi siyahap enebil laruk lit
17onori men mangno atuk ane fahet wenggel haruk eleg.
18 #
Mzm 36:1
Ap arimano Allah fahet enekol toho wereg eleg.”
Ari turuk ulug wene atamon fam hahareg lit wereg. 19Musa wene atamon haharoho imbibag ane Musa wene apma wereg inap fahet haharoho imbibahon ari nit nonoluk. Nit obog toho ari nonoluk angge famen iren siyag ane turuk lahe fug ulug awiya waruk inap arimano enembilik laroho welamag. Ap obog toho kinangma werehon fahet Allahn siyag peruk lit wereg. 20Musa wene apma welahe peruk inap arimano fahet siyag ane turuk inap wereg ulug wene inowen inamap turuk. Inamap turukmu ap obog toho Musa wene apma welahe peruk inap arimano unubahet Allahn fano puk fug teg.
Yesus Kristus inowen ap ininggik hele warehon lol eneptisi ulug hiyag isibag ane
21Ketiya Allahn ap ili og enebuhuk pibag ane ari Musa wene sel fil weregma inam atisi. Inam atisiyon ino fobik inam aruhu ulug wene atam haharoho imbibahon men wene atam hiyag isaruk latfag inap nabi arimanowen haharoho imbibahon hikit toho inam atisi. 22#Gal 2:16Yesus Kristus fam tem toho wenggel haruk lit wereg inap arimano tu siyag ari fano puk fug anggeyen obog toho Allahn ili og enebuhuk peruk lit wereg. 23Ap obog toho siyag ane turuk lit weregma Allahn wel eneplep angge famen wel enebuk fug teg. Allahn ap kinangmon wel eneplep angge famen it obog toho siyag ane eneg turuk lit werehen wel enebuk fug teg. 24Wel enebuk fug teg angge famen Allahn indi enesug lit wereg. Yesus Kristus inowen ap ininggik hele warehon lol eneptuk lit saplangge ili og eneptisi. 25Yesus fam tem toho wenggel haruk inap arimano Yesus amep fam Allah men mangno amuhup ulug Allahn At unduhuk fibag.#Yunani enele fam Yesus ino peti Wene Numen haharehon elma kilabeg angge ele latukon hag atisi ulug haharoho imbibag. Aben siyag ane turukon Allahn elehap tukag ulug imamen peti ele latuk angge ino fene wam amep hilili feruk latfag. Allah indi pikit teg lit aben siyag-siyag ane indam turuk latfag ane Aren imbisibahon arimano ketiya nambolma embesemin ulug Yesus unduhuk fibag. 26An nele tem toho uruk lit nindi pikit toho welahi ane fahet ketiya ap inindimu onoluk amuhuben Yesus Kristus fam wenggel harukon Allahn ili og eneptuk.
27Allahn ili og eneptisi angge famen aben nangginoho enewelwel tubat ta reg? Wel tubat ta fug teg. Nungge fahet wel tubat ta fug teg? Ap ininggik fam fano ane turukon Allahn winahuk fug anggeyen inindi fam wenggel harukon eneg fano peruk. 28Anden peruk lahiyon aru: Musa wene haharoho imbibahon ino fam turuk halug Allahn fano puhu fug. We hinindi fam wenggel harukon ari fam eneg Allahn fano puhu. 29Ninikni Allah Yahudi inap fahet eneg wereg? O pumbuk winon fahet wereg eleg? At we tem o pumbuk winon fahet oho Inikni Allah wereg. 30#Ul 6:4; Gal 3:20Allah misig inowen ambilahap paleg lit werehonen ubam wenggel haruk halug ili og eneptuk. Ambilahap paleg eleg inap arimanowen ubam wenggel haruk halug oho ili og eneptuk. 31Nori, anden uruk lahi ane ari fam Musa wene ino elehap turuk lahi ano? Eleg-o nori, Musa wene ineyap turuk lahi.
Zur Zeit ausgewählt:
ROMA 3: YLI
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
@ LAI 2018
