Efesus 2
2
Nit ninendainggen pasik warek ndak-ndak werekma, Allah nen ninilugut dinanggike wene
1Kit alebagik, Allah wene sagalogo weyak kagako lagagip eti paga, kinebe kinendainggen pasik warek ndak-ndak welagagip. 2Etanem, akoni yoma inobabut inikogat dogolik kagarigogi kagat, kagako lagagip. Esigit diluk kagako dogolik, kugi inobabut weyak mende inewe nggok mbogot abel wemangge yoma indewerek dogolik, akoni Allah wene inaʼit nen inasuk koluʼbuk mende inakla unggisikesik yogondak inakla nggagalko werek mende etnogo ane kolek welagagip o. 3Alebagik nit taʼbokogonat nen it kagarigogi ndak-ndagat kagako lagagu. Ninobabut akoni inobabut inikogat dogolik kagarigogi kagat, kagako dogolik, ninoba aganggen dagisinem weyak kagakik, ninakla ambalok weyak kagakik, kagako lagagu. Etanem, akoni inobabut inikogat dogolik kagarigogi mende ninom ndak-ndagat werekma, Allah akla agaga dagaluk, weyagat ninabigiluk welagike. 4Esigit diluk weyagat ninabigiluk welagike mende ogwe, yabunggane at obabut pano mondok nen, nggokogonat ninaʼbuwa niyasike. 5Nit weyak kagako lagagu eti paga, ninendainggen pasik ninebe warek ndak-ndak werekma, Allah nen ninaʼbuwa niyasikesik, Kristus ninom kunogo ʼbinaniluk ninomat ninilugut dinanggike. Nen, kit at obabut pano nenat ndil kinakike o. 6Ninilugut dinanggikemo, nit Kristus Yesus ninom kunik werekma, yabunggane at ninom mbogot oba nggok dogolik, it amberek ninapma pagisek dogowagaluk ninom mendinanggike o. 7At Allah esigit diluk kagakike eti, o yabunggane dogogun eti paga dogolik akoni nen,
“Allah obabut pano mondok nen ninaʼbuwa niyasike,” yiluk enggagat didisi dogowagaluk ndil ninakike eti ebe Kristus Yesus nenat ndil ninakike. 8Kit kinendainggen at oba panggot disinem, at obabut pano etnogo nen ndil kinakikemo werek eti, erlo kinenggaerek nen ndilegep ʼbuk. At te, yi mende ndi mende onggo degat wogisiligogi kak, at Allah nenat ndil kinakikemo werek o. 9Kit nen,
“Nit pano kagako lagagu paga ndil ninakike,” yiluk, kit amberek kinenggaerek nen pogorakausak mondok dek o. 10At nenat pano kagarogo ʼbinanggikemo werek o. Eti nit Kristus ninom kunik dogolik, yi mende ndi mende panorogo kagako dogowagaluk, ninobabut ngget ninat winamet dinanggike eti ebe Kristus Yesus nenat winamet dinanggikemo werek o.
At Kristus nen ninebe at enggaerek ninom omanggiat dambulogo ʼbinanggike wene
11Kit alebagik, kinebe sikmangge mende welagagip eti kinakla ebetni. It ap Yahudi mende akoni ineramen inowado inenggarlimo mende mbalinakuka mende yomenogo nen, kit pasik,
“Inowado esigit diluk mbalek dek mende,” yiluk yisi laguka. 12Etanem, Kristus ebe kinom kunik dek walegat dogolik, kinebe Israel mende dek. Ninat mendeat welagagip. Esigit diluk werekma, at Allah nen, wene it Israel mende inom wako dogolik,
“Esigit diluk kagat kinabigin,” yiluk abok yogisasike mende etnogo, kit kinonggodegat dogolik,
“Pano asigin,” yiluk kinakla ambigidegat, Allah apma unggigidek, agat oba yoma dogolik, Allah ebe kinonggodegat welagagip o. 13Alebagik, kinebe walegat welagagip mendeat, yogondak, Kristus Yesus kinom kunggigipmo, at amep wulabogo watlagike eti paga, korokogo ʼbinagakemo werek o.
14Akoni Yahudi mende inom, sikmangge mende inom, inom mbalek werekma, ndumo agorek leget negen nggok palek welagike mende, at Yesus nen dambulogo ʼbinanigogo mende etnogo ebe watlago dogolik kurli mbalek etnogo miyalogo deget diluk nen, ninebe omanggimo dambukogo ʼbinanggikemo werek o. 15At Kristus nen, ninunggulowak endaga Yahudi mende inom, sikmangge mende inom, mbere eta welagike mende, at ninom kunogo omanggiat ʼbinaniluk ninunggulowak endaga omanggiat ngget mende dambulogo ʼbinanigiluk wene Allah nen ninasuk warogo,
“Yigit diluk kagasusak, ndigit diluk kagasusak,” yiluk yoknisasikemo wene mbalek werek mende eti deget diluk, ninom kunogo ʼbinanggike o. 16At Kristus ebe o paga mendiluk wakukama watlago dogolik, Allah ninom weyak wim mbalek negen welagagu mende eti deget diyalok, ninebe pelak mende inom, pelak mende inom, omanggiat dambukogo ʼbinaniluk, Allah oba woknisek wagike o. 17-18At Yesus nen esigit diluk woknisek wagikemo, pelak mende inom, pelak mende inom, at Allah Agurengge omanggiat eti paga ninombae Allah oba unggusak erlogat kagat lagike, yiluk, Yesus ebe alebagik wagikesik,
“Kinom dambukogo ʼbinagagi o,” yiluk, wene pano wene kit sikmangge mende walegat werekma yokisigik, nit akoni Yahudi mende korogat werekma yoknisigik, wagike o. 19Esigit diluk wagike eti paga, kit kinebe sikmangge ninat mende, ap kuso mende negen welagagip etnogo, yogondak esigit diluk dek agikemo, kinebe Allah aʼburi agagisip, it kinom, at Allah aguma etoma kinaiweregat agagisip werek o. 20At Kristus Yesus ebe o andorli nggok mende negen wusabek werekma, it ap at nen inayonggo ʼbiluk laʼbiyasike mende yomenogo inom, it ap Allah wene yogisiligogi mende yomenogo inom nen, oba dukogo pal disukama, kit kinebe nit nen oba dukogo palogo ʼbinagasugumo werek o. 21Nit taʼbokogonat ninebe dombok, at Yesus ninom kunogo ʼbinaniluk nen, o sep kun-kun paligogi kak, o eti abirat ninombae Allah enggaerek pasik ago palogo ʼbinanigogo o. 22Eti negen, kit Kristus kinom kunik werekma, it amberek kinom o omanggiat Allah ago palekma Agurengge dogowagaluk, palogo ʼbinagaligogo o.
Zur Zeit ausgewählt:
Efesus 2: DNA
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
