Efesus 1
1
Keyagi warinakike wene
1Kit Allah aʼburi o Efesus nandorligogi mende kinendainggen Kristus Yesus oba panggot diluk kinom kunik werek mende, nagarlagi nirugi o. An Paulus, Allah akla ambasike paga, at Kristus Yesus nen nayonggo ʼbiluk laʼbani wagike mende etnogo nen wene yi kolal mbalogo kinoba laʼbi wagi o. 2Ninombae Allah ninewe Endaganggok Yesus Kristus imbisak inobabut pano etnogo nen, pano mende wokisigik, kinendainggen kambugut dinagagik, kagako dogowak o.
“Nit Kristus ninom kunik werekma panot ninabigogo,” yiluk yogisasike wene
3Ninewe Endaganggok Yesus Kristus ombae Allah etiat pogorako doguwok o. Nit Kristus ninom kunik werekma, at Allah nenat pano mende taʼbokogonat ninendainggen ake mbogot oba nen woknisasikemo werek. 4At Allah nenat ninebe at enggaerek ake ʼbakalok, at il oba nggaʼberek mondok dogowagaluk, mbogot agat awan walkigidek dogolik, mikninakike eti ebe at Kristus nenat mikninakike o. 5At Allah ninebe ninaʼbuwa nen, enggaerek akla nenat,
“Yesus Kristus nen, it woginakonem an naʼburi asuwak,” yiluk, paganeat nen ninebe mikogo wokninakike o. 6At obabut pano nen aʼbut endainggen kunik mende aʼbuwa kigidegat woknisasike eti pasik, nit nen,
“Iya. Allah nayuk o,” yiluk, pogorako doguwok o. 7-8Esigit diluk woknisasikemo, ebe amep wulabogo wakuka eti paga, ninonggo mbalogo ndil ninakik, nit weyak kagako lagagu mende deget diyigik, kagakike o. At Allah akla nggagalek dogolik ninebe didinanggikesik, obabut mondok pano etnogo nen, ninebe nggokogo ninaʼbuwa niyasike o. 9At enggaerek esigit diluk kagat ninabu warlok nen,
“Esigit diluk kagarinabigin eti, ebe at Kristus nen kagarinabuwak,” yiluk, wene at akla ambasike mende limago welagikesik selekma yoknisasike o. 10Wene at akla limago welagike eti ebe, yabunggane kagat lasusak oba kagat lasi wagonem, at nen yi mende ndi mende mbogot oba werek mende inom, agat oba werek mende inom, taʼbokogonat dambukogo Kristus arligat apma ʼbiyagin mende ake abok yoknisasike o. 11At Allah nen,
“Yigit diluk kagat lasuwak, ndigit diluk kagat lasuwak,” yiluk akla ambaligogo ndak-ndagat yi mende ndi mende taʼbokogonat kagakonem kagat larigogo eti paga,
“It inebe an nenggaerek naʼburi asuwak,” yiluk mikogo ʼbinanggikemo, indewerek agagu o. 12At ebe pogorako mondok werek mende etnogo, nit nen pogorako dogowagaluk, ninendainggen ebe-alep Kristus oba panggot disugu mende dombok mikogo wokninakikemo o.
13Eti kak, kit nen wene ebe wene, panot ninabigogo wene etnogo kinasuk kolkigisip, kinendainggen Kristus oba panggot disigipmo, Allah nen,
“Nagurengge wokisagin,” yiluk, abok yoknisasike ndak-ndagat,
“It an nenggaerek naʼburi o,” yiluk ilenggerlogo Agurengge wokisasike o. 14Allah nen,
“An nen esigit diluk wokisagin, yiluk abok yokisasigi mende eti yabunggane wokisagaluk, Nagurengge dirlu wokisasigisik kinebe ndilogo wokinabiginat o,” yiluk yoknisasike. Esigit diluk yoknisasike eti paga, Allah pogorako mondok dogoligogo mende etiat pogorako doguwok o.
Paulus nen Allah aʼburi o Efesus mende inake sembayan yisike wene
15Eti paga, kit kinendainggen ninewe Endaganggok Yesus oba panggot diluk, Allah aʼburi amberek taʼbokogonat inaʼbuwarogo kagarigogi mende eti, akoni amberek nen kinabok yisinem nasuk kolki o. 16Esigit diluk kolkirik nen, kit kinobabut kagarigogi eti pasik, kibitngge-yogongge togot digidek kinendaga yiluk nen Allah keyagi wako mondogat werek o. 17Kit kinake, ninewe Endaganggok Yesus Kristus ombae Allah pogorako mondok werek mende etnogo nen, kinakla mondok nggagalek mende wokisigik, at ebe dikogo didubagik nen yanggul kisigik, kagako dogowak nen yiluk, Agurengge wokisawagaluk an nen ayonggo ʼbiligogo o. 18At nenat kinakla liyat kinakonem, kit nen,
“Ninayonggo ʼbisike mende etnogo nen yabunggane panot ninabigin,” yiluk, kinakla arlenggen togo oba eberek werek mende etnogo kinilu agik, yi mende ndi mende pano mende pogorako mondok dogogun mende at aʼburi woknisagaluk nggokogo kulogo ʼbinanggike mende eti kinilu agik, 19-20at obatne werek mende etnogo nen, nit ninendainggen at oba panggot disugu mende, obatnerogo nggogat yamak niyiligogo mende kinilu agik, kagasubagik nen yiluk ayonggo ʼbiligogo o. At obatne eti paga, Kristus ebe watlagikesikmo ilugut diluk mbogot oba liyaʼbiluk, at eragalilu inggi ebengge nggok Endaganggok dogowagaluk mendisike kagat, obatnerogo yamak niyiligogo o. 21Esigit diluk mendisike eti, it pemerintah nggok mende amberek taʼbokogonat inom, inendaga nggok mende amberek taʼbokogonat inom, ineugi nggokndek amberek taʼbokogonat inom, nggokndek it amberek inapma pagisek werek mende taʼbokogonat inom, inendaganggok yogondakne werek mende inom, yabunggane dogogun mende inom, taʼbokogonat, inendaga dek mende, at Kristus arligat, Endaganggok nggogat lekogo dogowagaluk, mendisike o. 22Allah nen yi mende ndi mende mbogot oba agat oba werek mende taʼbokogonat waganogo at Kristus arligat apma ʼbiyalok, Allah aʼburi nandoko lago mende yi mende ndi mende pasik ninewe nggok Kristus at woknisasike o. 23Nit Allah aʼburi ninebe at Kristus ebeat o. Nen, yi mende ndi mende, mbogot oba agat oba werek mende taʼbokogonat akla Kristus ebe nggerlekogonat dogolik, nit Allah aʼburi at ebe negen werekma, ninakla nggerlekogonat werek o.
Zur Zeit ausgewählt:
Efesus 1: DNA
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
