1Korintus 16
16
“Allah aʼburi nen inagarlagi inirugi amberek uang ʼbiyausak,” yiluk yogisasike wene
1Yogondak kit nen uang nandorlogo kinagarlagi kinirugi Allah aʼburi amberek ʼbiyawogoluk yegep eti, wene it Allah aʼburi o Galatia mende yanggul isigi eti kak kagatno o. 2An nebe wagonem nen nandorlusak dek o. Ya pagaat hari Minggu paga kibitngge-yogongge kagako dogolik, kinebe dombok kininggimo ago kalok, nandorlogo ʼbiyalok pago dogono o. 3ʼBiyalok nen, ap wolok lugun mende kit nen,
“It erlok,” yiluk ambegep mende kalok inayonggo ʼbino. Esigit diluk inayonggo ʼbiluk werekma, an nebe witluk nen, kit nen ʼbiyegep mende eti wolok lowak nen, surat o Yerusalem laʼbigin o. 4Mende, an nebe lausak pano ago kalok, an ninomat lugun o.
Paulus nen, “Esigit diluk kagasigin,” yiluk wene nggagalogo ʼbisike wene
5An o Makedonia ligin yiluk nakla ambigirikmo, etoma lalok ya paklagik arat lalok nen, kit kinoba wisigin o. 6Kinoba witluk nen, an kit ninom ninggi mbereat dogoluk nen a? O weyak werek nggorlek ninggi amberek inomat dogoluk nen a, kit nen o an ligin ambaligogoma etoma laʼbanubagik nen yiluk yokisigi o. 7An esigit diluk o werlekmangge lagaluk lago dogolik ninggi omanggi pasik ninom dogusak, naʼit. Ninewe Endaganggok nen pano yisi kalok, an ninggi amberek inom ninom dogogun o, yiluk nakla ambaligogo. 8-9Wisik nen, o Efesus yoma akoni,
“Wene ninaʼit,” yiluk wenemuk mbaligogi mende inebe dogalegat werek mende, an nen it amberek yogisasinem wene waganusak mende dogalegat werek eti paga, yoma dogoluk hari Pentakosta arat kagat diluk nen wisigin o. 10At Timotius eti, an nen ninewe Endaganggok ake kagarigogo kak kagarigogo mende kit kinoba wisigin eti, ebe wago kalok, kit kinom ayuk dekogo dogowak nen, ebe panorogo waganino o. 11At wagonem it akoni amberek nen,
“At ebe erlok dek,” yiluk inakla kai dusak mondok dek o. At iyogoba noba wago dogolik, ninagarlagi ninirugi amberek yomenogo inom ʼbitniya wisuwagaluk inanggorlem werek eti paga, at kolak oba panorogo yamakasi dogono o.
12Ninagarlak Apolos etnogo nen, it ninagarlagi ninirugi amberek yomenogo wogisek kinoba wisuwagaluk, alep-yabungga akla nggagalko lagi mende, at yogondak ya wisusak yiluk akla ambiligogo dek o. Mende, yabunggane wisusak ambasi kalok wisiginat o.
At Paulus nen inakla nggagalkik, keyagi warinakik, yisike wene
13Kinobabut kwalogo dogolik, kinendainggen Allah oba panggot diluk, mendegat dogono o. Kinobabut abat dogolik, kinobatnerogo dogono o. 14Kit yi mende ndi mende kagasuwogoluk, akoni inebe inaʼbuwarogo kagako dogono o. 15Nagarlagi nirugi o. Wene omanggi yi kinakla nggagalik. At Stefanus aʼburi inom yomenogo inebe kinilu o. O propinsi Akhaya etoma it ndak Allah aʼburi agukasik nen, it Allah aʼburi amberek yamagiyasi doguwogoluk inendainggen oba nenat yisukasik nen yamagiyiligogi o. 16It inobabut negen kalok, it amberek it inom inobatnerogo kagako kalok, taʼbokogonat inapma unggiluk inane kologo dogono o. 17Stefanus inom, Portunatus inom, Akaikus inom, noba wagakasik, kit nen an nake kagako dogu kak, it nen pano kagarigogi eti paga, nakla arlenggen kiligogo o. 18It wagakama, an nakla pano aga kak, kit kinakla pano asigin o. Eti paga, it akoni amberek inobabut it negen mende kalok, inalon palko dogono. 19Allah aʼburi o propinsi Asia etoma ya nda nandorligogi mende yoma nen kit keyagi watkinaka o. Ap Akwila age Priska imbisak, nen, Allah aʼburi it inaguma nandorligogi mende inomat nen, ninewe Endaganggok inom kunik dogolik keyagi mondok dogalegat watkinaka o. 20Nen, ninagarlagi ninirugi o yoma mende taʼbokogonat nen keyagi watkinakaat o.
“Nit taʼbokogonat ninebe Allah aʼburi,” yiluk nen, kit-kit keyagi kinambe sarluk wat-wat yilik lano. 21An Paulus nenggaerek ninggi paga kolal mbalogo keyagi watkinaki o. 22At omanggi nen, ninewe Endaganggok endainggen kunik dek kalok, Allah nen at eti ebe alem ʼbuwak o. Mende, ninewe Endaganggok ibat eme o, yu kak, Maranata, yiluk yigi o. 23Ninewe Endaganggok Yesus obabut pano etnogo nen kinanggorlem mondok dogowak o. 24Kristus Yesus ninom kunik dogolik, kinebe taʼbokogonat kinaʼbuwa yiluk keyagi watkinaki o.
Zur Zeit ausgewählt:
1Korintus 16: DNA
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.