JUECES 8
8
Gedeón shuti runaca, Madián shuti llactata jatun mandajcunatami prezu japijushca
1Ashtahuangarin Efraín aillu runacunaca, Gedeón runataca cashnami ninajurca:
—¿Imashpata ñucanchitaca cashna rurangui? Canga, ¿madianitacunahuan macanajungapaj rijushpatachu, ñucanchitaca na cayarcangui?— nishpami, shinllita rimanajurca.
2Paicunataca, cashna nishpami tigrachirca:
—Cangunahuan chimbapurashpa ricujpica, ¿ñucaca imatata rurashcani? ¿Nachu Efraín aillu runacuna pallajushca, Abiezer shuti runapaj miraicuna cozechashcataca ashtahuan yali ali? 3Madián llactata mandaj Oreb shuti, Zeeb shuti runacunataca, Taita Diosmi cangunapaj maquipi churashca. Canguna cashna rurashcahuan chimbapurajpica, ¿ñucaca imatata rurashcani?— nircami.
Gedeón runa chashna aliguta rimajpimi, Efraín aillu runacunaca paita fiñashca cashpapash, ali tucurca.
4Gedeón runaca, paihuan pushamushca quimsa patsaj runacunandimi, Jordán yacuman shamushpa chimbanajurca. Paicunaca shaijushcacuna cashpapash, ashtahuan catishpa rinajurcallami. 5Shinamandami, Sucot pueblopi causajcunataca, cashna nirca:
—Ñucata catimunajuj gentecunamanmi, ashalla tandagutallapash carapaichi nipanimi. Paicunaca, Madián llactata jatun mandaj Zeba shuti, Zalmuna shuti runacunata catishpami ninanda shaijushca— nircami.
6Sucot shuti pueblota mandajcunaca, cashna nishpami tigrachinajurca:
—Cambaj soldadocunaman tandatallapash carangapaca, Zeba shuti, Zalmuna shuti runacunatapash, ¿ñachu cambaj maquipi charingui?— ninajurcami.
7Shina nijpimi Gedeón runaca, cashna nirca:
—Zeba shuti, Zalmuna shuti runacunatapash, Mandaj Dios ñuca maquipi churajpica cashacunahuan, jichushca pambapi tiaj racu cashacunahuanmi, cangunataca astishpa chugrichisha— nircami.
8Chai pueblomandaca, Peniel shuti pueblomanmi vichai rirca. Chaiman chayashpapash, chashnallatami nijurca. Peniel shuti pueblopi causajcunapash, Sucot shuti pueblopi causajcunashnallatami rimashpa tigrachirca. 9Shina nijpimi Gedeón runaca, Peniel shuti pueblopi causajcunatapash, cashna nishpa rimarca:
—Imapash na tucushpa aliguta tigramushpaca, cai torretami urmachisha— nircami.
10Zeba shuti, Zalmuna shuti runacunapash, Carcor shuti pambapimi carca. Paicunahuanga, chunga picha huarangashna paicunapaj soldadocunapashmi chaipi carca. Paicunaca, indi llujshimuj ladoman causaj soldadocunamanda puchushca tucui runacunami carca. Espadahuan macanajunata ali yachaj, patsaj ishcai chunga huaranga runacunami huañushca carca. 11Gedeón runaca, carpacunata shayachishpa causanajuj gentecunapaj ñandami vichai rirca. Chai carpacunaca Noba shuti, Jogbeha shuti pueblocunamandaca, indi llujshij ladomanmi carca. Chaipica, soldadocunaca na cuidanajurcachu. 12Zeba shuti, Zalmuna shuti runacunapash pacajushpa calpanajujpimi, Gedeón runaca catirca. Madián shuti llactata jatun mandaj Zeba shuti, Zalmuna shuti runacunatapash japijpimi, tucui chai soldadocunaca ninanda manllarinajurca.
13Joás runapaj churi Gedeón runaca, nara indi llujshijpillatami, chai macanajuimandaca tigramurca. 14Chaimanda tigrajushpami, Sucot shuti pueblopi causanajuj puramanda chairalla viñai shuj huambrata japishpa tucuita tapuchirca. Shina tapuchijpimi paica mandajcunapaj shutitapash, Sucot shuti pueblota mandaj rucucunapaj shutitapash escribishpa curca. Paica, canchis chunga canchis shuticunatami escribishpa curca. 15Gedeón runaca, Sucot shuti pueblopi causajcunapajman yaicushpami, cashna nirca:
—Ricuichi, Zeba shuti, Zalmuna shuti runacunapash caipimi. Cangunaca cai runacunamandami, cashna nishpa llaquichihuarcanguichi: ‘Ninanda shaijushca cambaj cai runacunaman tandatallapash carangapaca, Zeba shuti, Zalmuna shuti runacunatapash, ¿ñachu cambaj maquipi charingui?’ nircanguichimi— nircami.
16Shina nishpami Gedeón runaca, cashacunatapash, jichushca pambapi tiaj racu cashacunatapash japishpaca, chai pueblopi mandaj rucucunatapash, Sucot shuti pueblopi causajcunatapash, chai cashacunahuan astirca. 17Shinallata Peniel shuti pueblopi tiaj torreta urmachishpami, chai pueblopi causajcunatapash huañuchirca. 18Chai jipami Gedeón runaca, Zeba shuti, Zalmuna shuti runacunataca, cashna nirca:
—Tabor shuti urcupi canguna huañuchishca runacunaca, ¿imashna ñavitata charirca?— nircami.
Shina nijpimi paicunaca, cashna nishpa tigrachirca:
—Cambaj ñavishnallami carca. Paicunaca, tucuicunami jatun mandajpaj churicunashnalla carca— ninajurcami.
19Shina nijpimi Gedeón runaca, cashna nirca:
—Paicunaca, ñuca huauquicunamari carca. Ñuca mamapaj churicunami carca. ¡Mandaj Diosca causajumbachamari! Paicunata canguna na huañuchishca cajpica, ñucapash cangunataca na huañuchimanllu carcani— nircami.
20Shina nishpami Gedeón runaca, Jeter shuti paipaj punda churitaca:
—Jatari, caicunata huañuchi— nishpa mandarca.
Ashtahuangarin chairalla viñai huambraguca, espadata alichinamanda na llujchircachu. Chairalla huambragu cashpami, manllashpa na llujchi usharca. 21Chaimandami Zeba shuti, Zalmuna shuti runacunapash, Gedeondaca cashna ninajurca:
—Ñucanchitaca, canllata jatarishpa huañuchillayari. Shinlli runa cajtaca, imatapash rurajta ricushpallami yacharin— ninajurcami.
Shina nijpimi, Gedeón runaca jatarishpa, Zeba shuti, Zalmuna shuti runacunataca huañuchirca. Chai jipaca, camellocunapaj cungapi huarcushca lunashnalla juyaillacunatami japirca. 22Israelcunaca, Gedeondaca cashnami ninajurca:
—Madián shuti llacta runacunapaj maquimandaca, canmi quishpichircangui. Shina cashcamanda cambash, cambaj churipash, cambaj nietopash, ñucanchita mandaj tucupaichilla— ninajurcami.
23Ashtahuangarin Gedeón runaca, cashna nishpami tigrachirca:
—Ñucaca, cangunataca na mandashachu. Ñuca churipash, na mandangachu. Mandaj Diosllami cangunataca mandanga— nircami.
24Gedeón runaca, cashnatapashmi nirca:
—Ñucaca, caitallami mañangapaj munapani: Chai runacunata quichumushca zarcillocunatalla, tucuicuna ñucaman cuhuaichi— nircami.
(Paicunaca, ismaelitacuna cashpami, oro zarcillocunata churajushcacuna carca).
25Shina mañajpimi paicunaca:
—Ñucanchica, tucui munaihuan cupashunllami— nishpa, shuj fachata mandarca.
Chai fachapimi, quichumushca zarcillocunataca, tucuicunallata churanajurca.
26Pai mañashca chai oro zarcillocunata, chunga ishcai kilo chaupitashna pezaj oromi carca. Orota rurashca juyailla churajunacunataca, uchillacunata jatungunatapash Madián shuti llactata jatun mandajcuna apamushca morado juyailla churajunacunatapash, camellocunapaj cungamanda llujchishca juyailla huatashcacunatapash, na pezarcachu. 27Gedeón runaca, chai orohuanga efod nishcata rurachishpami, pai causajuj Ofra shuti pueblopillata alichirca. Chai pueblopimi tucui israelcunaca, chai efodtara mañagrishpa, culquimanda huainayaj huarmishna tucunajurca. Chai efodca, Gedeón runapajpash, paipaj huasi ucu purapajpash, nitijachinshna pandachingapajmi carca.
28Shinami madianitacunaca, israelcunapaj ñaupajpica ninanda llaquichi tucushpa causanajurca. Chai punllamandapacha, na ashtahuan macanajungapaj shayarircachu. Chai llactaca, Gedeón shuti runa causajui punllacunapica, chuscu chunga huatatami, casilla aliguta samajurca.
29Joás shuti runapaj churi Jerobaal nishca Gedeón runaca, cutin tigrashpami, paipaj huasipi causagrirca. 30Gedeón runaca, canchis chunga churicunatami charirca. Paica, tauca huarmicunata charishpami, paipaj miraicunata saquirca. 31Siquem shuti pueblopi charishca caishuj huarmihuambashmi, Gedeón runaca shuj churita charirca. Paitaca, Abimelec shutitami shutichirca.
32Joás runapaj churi Gedeón runaca, rucupipachami huañurca. Pai huañujpica, Ofra shuti pueblopi, paipaj taita Joás runata pambashcapillatami pambarca. Chai pueblopica, Abiezer shuti runapaj miraicunami causanajurca.
33Ashtahuangarin Gedeón runa huañushca jipaca, cashnami tucurca: Israelcunaca, cutinmi Baal shuti dioscunata catishpa, culquimanda huainayaj huarmishna tucunajurca. Paicunapaj dios cachunga, Baal-berit shuti diostami agllarca. 34Israelcunaca, paicunapaj muyundipi causanajuj paicunata tucui fiñajcunapaj maquimanda cacharichij, paicunata Mandaj Taita Diostaca na yarinajurcachu. 35Shinallata Jerobaal nishca Gedeón runa, ima alicunata israelcunaman rurashcamandaca, paipaj huasi ucu purataca na pashi ninajurcachu.
Zur Zeit ausgewählt:
JUECES 8: QUII
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Quichua Imbabura Bible © United Bible Societies, 1994.