JUECES 7
7
Gedeón shuti runami, madianitacunata mishashca
1Jerobaal nishca Gedeón shuti runaca, paipaj tucui gentecunandi, tutamandata jatarishpa rishpami, Harod shuti pugyu ladopi carpacunata shayachishpa tiajurca. Madianitacunaca, jahua ladomanmi More shuti urcu ashtahuan chai lado pugru pambapi carpacunata shayachishpa tianajurca.
2Chaipimi Mandaj Diosca, Gedeondaca cashna nirca: “Madianitacunata cangunapaj maquipi ñuca churangapaca, canhuan tandanajushca gentecunaca ashtacapachami. Paicuna mishashpaca: ‘Ñucanchi maquihuan mishashpami quishpirircanchi’ nishpami, israelcunaca ñucata fiñashpa, paicunallata alichirinajunga. 3Chaimanda cunanga, tucui gentecuna uyajta cashna nishpa villachun mandai: ‘Maijambash manllashpa chujchunajushpaca, tutamandata jatarishpa, cai Galaad urcumandallata huasiman tigraichilla’ nishpa villachun mandai” nircami.
Chai jipami, chai gente puramandaca, ishcai chunga ishcai huaranga runacuna tigrarca. Chaipica, chunga huaranga runacunallami puchurca. 4Mandaj Diosca, Gedeondaca cutinmi cashna nirca: “Gentecunaca taucacunarami. Chaimanda yacu ladoman pushailla. Chaipimi, imatalla ruranata ricuchisha. Maijandami ñuca: ‘Cai runaca, canhuan ringami’ nijpica, chai runaca canhunami ringa. Ashtahuangarin: ‘Cai runaca, na canhuan ringachu’ nijpica, chai runaca na ringachu” nircami.
5Shina nijpimi Gedeón runaca, gentecunataca yacu ladoman pusharca. Chaipimi Mandaj Diosca, Gedeondaca cashna nirca: “Maijanmi jalluhuan alcushna lambishpa yacuta ufian, chaitami shicanyachina cangui. Shinallata maijambash cungurishpa, yacuta ufiajcunatapashmi shicanyachina cangui” nircami.
6Yacuta maquihuan japishpa lambijcunaca, quimsa patsaj runacunallami carca. Tucui caishuj gentecunaca cungurishpami, yacuta ufianajurca. 7Chaimandami Mandaj Diosca, Gedeondaca cashna nirca: “Yacuta lambishpa ufiaj, cai quimsa patsaj runacunahuanmi quishpichisha. Madianitacunataca, paicunapaj maquipimi churasha. Tucui caishuj gentecunaca, paicunapaj huasiman tucuilla tigrachunlla” nircami.
8Gedeón runaca, gentecunapaj ima minishtirishcacunata paicunapaj trompetacunata saquichishpami, tucui chaishuj israelcunataca, paicunapaj carpacunaman tucuillata cacharca. Chai quimsa patsaj runacunatallami shuyachirca. Madianitacunaca, ura pugru pambamanmi carpacunata shayachishpa tianajurca.
9Chai tutatami, cashna tucurca: Mandaj Diosca, Gedeondaca cashnami nirca: “Jatarishpa, madianitacuna tianajuj carpacunaman urai rilla. Paicunataca, cambaj maquipimi churarcani. 10Chaiman urai ringapaj manllashpaca, canda servij Fura shuti runahuan paicunapaj carpacunaman urai rilla. 11Chaipica, paicuna imatalla parlanajujtami uyangui. Chaita uyashpaca, cambaj maquipash ashtahuan shinlli tucushpami, carpacunaman urai ringui” nircami.
Shina nijpimi Gedeón runaca, paita servij Fura shuti runahuan urai rishpa, macanajunacunata charishcalla tianajuj gentecunapaj carpa ladocunaman rirca. 12Chaipica madianitacuna, amalecitacuna, indi llujshimuj ladoman causanajuj gentecunaca, langosta jurucunashnami ashtacapacha jundarianajurca. Paicunapaj camellocunapash, mama cucha manñapi tiaj t'iyu alpashnami, maitapash na cuentai ushanalla ashtacapacha carca. 13Chai runacuna tianajuj ladoman Gedeón runa chayashpami, shuj runa pai muscushcata, paipaj cumbaman cashna parlajujta ñapash uyarca:
—Ricui, ñucami cashna muscurcani: Shuj cebada tanda urai calpamushpami, cai ñucanchi madianitacunapaj carpacunaman chayamurca. Chashna chayamushpaca, shuj carpapi huactarishpa, tucuilla urmachijtami muscurcani— nijurcami.
14Shina parlajpimi caishuj runaca, cashna nishpa tigrachirca:
—Caica, na yangachu canga. Caica, israelpura Joás shuti runapaj churi Gedeonbaj espadami canga. Taita Diosca, ñucanchi cai madianitacunatami, carpacunapi tucui imalla tiajcunandi, Gedeonbaj maquipi churashca— nircami.
15Muscushcatapash, chai muscui ima cajtapash parlanajujta uyashpami Gedeonga, Diosta alicachirca. Chai jipaca, israelcuna tianajuj carpacunaman tigrashpami, cashna nirca:
—Jatarichi, Mandaj Diosmi carpacunapi tianajuj madianitacunataca, ñucanchi maquipi churashca— nircami.
16Shina nishpami, chai quimsa patsaj runacunataca, quimsapi shicanyachirca. Paicunamanmi trompetacunatapash, chushaj funducunatapash, rupajuj michunda chai funducunapi churashpa tucuillaman curca. 17Chai jipaca, cashnami nirca:
—Ñucata ali ricushpa, ñuca imashna rurajunshnallata ruranguichi. Ricuichi, carpacunata shayachishca chimba ladoman ñuca chayajpimi, cangunapash ñuca imashna ruranshnallata rurana canguichi. 18Ñucapash, ñucahuan tucui rinajuj runacunapash, trompetata huacachijpica, cangunapash tucui carpa muyundicunapi trompetata huacachinguichilla. Chai jipaca: ‘¡Mandaj Diosmandapash, Gedeonmandapashmi macanajugrinchi!’ nishpa caparinguichi— nircami.
19Chaupi tutamanda cuidaj soldadocunapaj cuidana horas chayajpi, paicuna cuidai callarinajujpimi Gedeón runaca, paihuan rinajuj patsaj runacunandi, carpacunata shayachishca tianajuj ladoman chayarca. Chaiman chayashpaca, trompetata huacachishpami, maquipi charinajushca funducunatapash faquinajurca. 20Quimsapi shicanyarishpa tandanajushca runacunaca, trompetata huacachishpami, funducunatapash faquirca. Shina rurashpaca, lluqui maquipica michunda chaririaj, ali lado maquipica huacachinajuj trompetata chaririajmi: “¡Mandaj Diospaj, Gedeonbaj espadamandami macanajugrinchi!” nishpa caparinajurca. 21Paicunaca, paicuna shuyanajushca pushtupillatami, carpacunata shayachishca muyundipica, shinllitapacha tucuicuna shayanajurca. Chaita ricushpami, madianita soldadocunaca manllashpa, caparishpa tucuilla calpashpa pacajugrinajurca. 22Chai quimsa patsaj runacuna trompetata huacachingacamanmi Mandaj Diosca, tucui carpacunapi cumba puratallata caishujta, chaishujta espadacunahuan macanajuchirca. Shinamandami madianita soldadocunaca, Zerera shuti puebloman rina ñanda rishpa, Bet-sita shuti pueblocaman, shinallata Tabat shuti pueblohuan, Abel-mehola shuti pueblohuan linderocaman calpanajurca.
23Israelcunaca, Neftalí, Aser, tucui Manasés aillucunahuan tandanajushpami, madianitacunataca catinajurca. 24Gedeonga, Efraín aillupaj tucui urcumambashmi, cashna villachun villajcunata cacharca: “Cangunaca, madianitacunata tuparingapaj urai richi. Jordán yacuta chimbai ushanalla, Bet-bara shuti pushtucaman rishpa, paicuna nara chayajpillata chaipi shuyagrichi” nichunmi cacharca. Shina villajpimi, Efraín aillu runacunaca tucuicuna tandanajushpa, Jordán yacuta chimbai ushanalla, Bet-bara shuti pushtupi shuyanajurca. 25Chaipimi, madianitacunata mandaj Oreb shuti, Zeeb shuti ishcai runacunata japirca. Oreb shuti runataca, Oreb shuti jaca rumi ladopimi huañuchirca. Zeeb shuti runataca, uvasta cutana Zeeb shuti pushtu ladopimi huañuchirca. Madianitacunata huañuchingapaj catishca jipaca Oreb shuti, Zeeb shuti runacunapaj umacunata apashpami, Jordán yacu chimba ladoman, Gedeonbajman shamunajurca.
Zur Zeit ausgewählt:
JUECES 7: QUII
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Quichua Imbabura Bible © United Bible Societies, 1994.