Lûm 3
3
1Wele Juus chia ghel ɛlee ɛ te ghɛ? Ɛ́ nɛyte wel é əb yɛ ki sɛk əblee-a? 2Njuŋ lu naa ɛ jiise se ɛydio se yɛ lu wele Juus. Kɛ́ mbiye lu nɛ Feyine nè vii giɛ ə wen se ghene keghoo. 3Dî nɛ nè lòó kooy ghɛ ɛ lefɛ ghene ɛlee nè báà fo ɛytem se ten? Ghene lɛ nè buu se vii ɛytem se kenəə kɛ Feyine nè suuyen é Feyine me buu se nɛɛy kɛ əb nè kaken-a? 4Ɛngaŋ! Ghele chèmè kè lu ghel əbbuam ɛ mbi fɛn naa ɛjim, é Feyine yɛ suuy kɛn əbluuy, kɛn ka ɛ́ nyaken ɛ ŋwaale-Feyine ge:
“Wɛ̀ lóò suŋnen yɛ lu nɛ kenəə kejim kɛ wɛ̀ suuyen lu ɛ titiy;
Wɛ̀ yɛ teem ɛ ɛytiye nsak, wɛ̀ sak è yiɛ.”
5Əbjas ə wɛsene lɛ sɛ̂y kè dine kelaanen ge Feyine lu ɛ titiy, é ghɛsen suuy ge ghɛɛ? Lɛ lòó ghɛsen suuy ge Feyine baa nɛɛy ɛ titiy se make ngɛk se ghɛsen bek əbghene-a? (Mɛ kante kii nɛ̂ kine ka wele-mesoŋ.) 6Ɛngaŋ! Feyine lɛ kè lòò è jia yɛ lu ɛ titiy é əb náà sak lɛɛy ketuu ntiɛ? 7Wel ke lóò əb ko yɛ bek ge: Mɛ lɛ lòò è yɛ yia əbbuam nɛ əb sɛ́y nɛɛy nɛ əbluuy ə Feyine gwiye nɛ̀ ɛykokse se wen, ɛ́ sɛy yɛ ghame mɛ ka wele mbee-a? 8Ke loo lu dî é ghele ɛlee yɛ suuy ge: Ghɛsen yɛ nɛɛye mbee ka njuŋe gwiy. Lu kɛn kenəə kɛ ghele ne se yian ge ghɛse suuye. Feyine nɛɛy sak è mak ngɛk se ghene se kenəə nɛ̂ ghan.
Wel wɛ əb luun ɛ titiy wiy
9Lòó wel suuy gee ghɛ-ɛ? Ghɛsen ghɛ ghele Juus lu ghel ɛjuŋe ɛyshiɛ nə Feyine chia əbtum moo? Ɛngaŋ! Ke wiy dî! Mɛ kè lômen din ge wel əbjim, kene wele Juus, kene wele ketum, lu nɛ mbee ghalmen wen. 10Kɛn ka ŋwaale-Feyine suuyen ge:
“Wel wiy wɛ əb luun ɛ titiy,
wel chèmè wiy naa əbmok,
11Wel wiy wɛ əb keen əbnəə,
wel wiy wɛ əb kɛŋen se yɛ ke Feyine.
12Ghel ɛjime benmen jim se Feyine,
Ghene ɛjime, befmen,
wel wiy wɛ əb nɛɛyen kenəə kɛ ke luun kejuŋ,
wel chèmè wiy naa əbmok.
13Kenəə fəy ɛ ghene əbchio,
ke yɛ ləm ka keyuse loole ɛysɛy ɛ lefɛ kase fək wel,
kenəə kɛ ghene suuyen kejim lu əbbuam,
giɛ fəye ɛ wel əbchio ɛy yɛ tiɛnen ka əbfiŋele yio.
14Ɛychio ə ghene lu ɛylunen nɛ̀ nliŋma gese nɛ̀ ɛychɛfkee.
15Ghene lóó se yuye wel ɛ́ fiɛlé fiɛlén,
16ghene chia naa ghááy wel əbjim yio ɛylum bek ngɛk yɛ ghene nɛɛyen.
17Wel se ten nè bɛɛy ghàà yi yɛ mom ge ghele yɛ chii kejuŋ.
18Ghene báà se fane Feyin naa se nkan.”
19Ghɛsen ke ge kenəə kejim kɛ nchile dinen lu nɛ ke kume nɛ lu ghel ghɛ ɛ́ nè foon nchil se ghene, ka wel əbjime yɛ lu ɛ chichi, é wel əbjim ɛ mbi me taŋle əbchio nɛ lu se Feyine. 20Wele jia yî yɛ lu ɛ titiy ɛ ɛyshiɛ nə Feyine ge yí ka yi nɛɛyen əbnəə wɛ nchile dinen. Nchil dì giamten kɛn se yɛ din ge ghɛsen nɛɛymen mbee.
Wel lu ɛ titiy bek ɛytem yɛ əb foon se Feyine
21Ke lu ɛ leenen nɛ Feyine dinmen jii yɛ lòó wel yɛ lu ɛ titiy ɛ wen ɛyshiɛ, nɛ ɛy ki wiy kenəə se nɛɛy nɛ̀ ɛylɛme nchile. Ghɛy kenəə kɛ Ŋwaale Nchil ghene yɛ̂ ghele ntum nə Feyine nè dinen. 22Se yɛ lu ɛ titiy ɛ ɛyshiɛ nə Feyine lu bek ɛytem yɛ fó se Jesus Christ. Ghɛy ka ke luun se wel əbjim wɛ əb beemen, nɛ əmndun-ndune báà se lu. 23Ke lu dî bek ge wel əbjim lu nɛ əb nɛɛymen mbee è jia gese se jofe ka Feyine kɛŋen. 24Dî nɛ Feyine chame nɛ lu ɛysen se wel se geese liɛ wen ge əb lu ɛ titiy. Ghɛy fomɛ wɛ Feyine nè foon se ghɛsen, è chia ɛyten yɛ Jesus Christ nè tenen ghɛsen se mbee. 25Feyine nè fo Jesus Christ ka ntaŋle se mane mbeese nɛ̀ əmnduŋ mə wen, nɛ ɛy fɛle kɛn se wel wɛ əb foon ɛytem se wen. Feyine nè nɛɛy kii nɛ̂ kine se din ge Yi lu ɛ titiy ɛ jii yɛ ge ghele nè lômen se nɛɛy mbee se mbiy əb kul ɛytem, è jia mak ngɛk se ghene. 26Feyine nè nɛɛy dî se din ɛ leenen se ghele ge Yi lu ɛ titiy liɛ naa ndɛ wɛ əb foon ɛytem se Jesus Christ ge wel wɛ əb luun ɛ titiy.
27Ghɛsen lòó ɛ́ jia bo kase yɛ ghaŋse əbghun bek ge ɛ́ baa boy bek ka ɛ́ lɛmen nchil. Ghɛsen lòó jia bo kase yɛ ghaŋse əbghun nɛ lu bek ka ɛ́ boyen bek ɛytem yɛ ɛ́ foon se Jesus Christ. 28Ghɛsen ke se əbluuy ge wel lu ɛ titiy bek ka əb foon ɛytem se Jesus Christ, nɛ wiy bek nchil ka əb lɛmen. 29Feyine di wiy Feyine ghele Juus. Feyine lu sɛy Feyine ghel əbtum. 30Feyine lu femok, nɛ dine wen ge lɛɛ wele wɛ̂ titiy, wele Juus, kɛn bek ɛytem yɛ əb foon se Feyine, nɛ̀ wele ketum, ko kɛn bek ɛytem yɛ əb foon se Feyine. 31Ke lɛ lu ɛ leenen ge ɛytem yɛ fó se Feyine buusemen nchil-a? Ke wiy di! Ke sɛ̂y bo lu ge ghɛsen lóóte ghale nchil.
©CABTAL, 2012