Lûm 2
2
Feyine tenen nsak ɛ titiy
1Ke me se lu ge wɛ sake ghel se əbnəə é wɛ̀ jia nɛ̂y boy se ten, kene wɛ lu náà ndɛ. Ke lu dî bek ka wɛ̀ saken ghel ko gese nɛɛy kɛn nɛ lu əbnəə wɛ wɛ̀ saken ghene se ten. Wɛ̀ nɛɛy di fene wɛ make lòn se wɛ̂ ketuu. 2Ghɛsen ke ge Feyine nɛɛy ɛ titiy se yɛ sake ghel ghɛ ɛ́ nɛɛyen əbnəə nɛ̂ vi. 3Wɛ̀ lɛ kwaate ge lòó Feyine vəse wɛ̀-a, kene lu naa wɛ̀ ndɛ, ɛ lefɛ wɛ̀ saken ghel ghɛ ɛ́ nɛɛyen əbnəə nɛ̂ vin, ko gese nɛɛy əbghene se wɛ̀ ngeŋ-a? 4Tame wɛ̀ yɛ yɛn ge ɛytem ɛyjuŋe yɛ Feyine kiin se ghele, gese nɛ̀ jii yɛ əb koosen ɛysen, wensene, lu kenəə se lólò. Lɛ lòó wɛ̀ jia yɛn ge ɛytem ɛyjuŋe nə Feyine lu se liɛte ghɛn ge ghɛn kubsen-a? 5Se lu nɛ wɛ̀ yinmen ɛytem ə yiɛ è tɛn se kubsen. Yɛɛ ke ge lu lòn ka wɛ̀ lɛmen se ketuu ə kiɛ. Feyine yî mak lòn nɛ̂ vin se wɛ̀ ɛ kechii kɛ əb maken lòn se ghel ghɛ əb yafsen ɛytem se ghene; dii kechii kɛ Feyine yî din ge yi tenen nsakse kɛn ɛ titiy, ɛ jii yɛ sé luun ɛ ten. 6Feyine yî fo əbmakte se wel nɛ lu kɛn ɛ kenəə kɛ ŋwɛl nè nɛɛyen. 7Əb yî fo nɛ lu ɛychii yɛ ɛy jia yî mɛy se ghel ghɛ ɛ́ kulen ɛytem è se nɛɛy njuŋ, kɛŋe ge əb nɛɛy é ghene yɛ ki njuŋ, nɛ̀ ɛyvəme gese nɛ̀ ɛychii yɛ ɛykuo bɛɛyen wiy ɛ ten; 8è yafse ɛytem è jɛfle, è mak ngɛk se ghel ghɛ ɛ́ kwaaten kɛn nɛ lu ngeŋse, ghel ghɛ ɛ́ yionen wiy se yɛ nɛɛy kenəə kɛ ke luun ɛ titiy, sɛ̂y nɛɛy kɛn nɛ lu ngɛkse. 9Ghel ghɛ ghene momlen əbnəə əbbee yî yɛ yio ɛylum gese yɛne ngɛk, kɛ́ mbiye, ghele Juus, è me kumte nɛ̀ əbtume, 10é Feyine fó nɛ lu əbghaake nɛ̀ ɛyvəme gese nɛ̀ əmnyiaŋe se ghel ghɛ ɛ́ nɛɛyen kenəə kɛ ke luun kejuŋ, kɛ́ mbiye se ghele Juus, è kumte nɛ̀ əbtume. 11Ke lu dî bek ge Feyine báà se dine əmndun-ndun.
12Ghel əbtume báà se ke nchil nɛɛy mbee nɛ ɛ́ kó yi sak ghene è fo ngɛk se ghene, nɛ ghele Juus ke nchil nɛɛy mbee nɛ ɛ́ yî sak ghene è fo ngɛk se ghene ka nchile dinen. 13Wele jia yî yɛ lu ɛ titiy ghene Feyine ge yí ka yi yion kɛn yion kenəə kɛ nchile suuyen, Wele yi yɛ lu ɛ titiy ghene Feyine nɛ lu wel wɛ əb nɛɛyen kenəə kɛ nchile suuyen. 14Ghele əbtum wɛ ghene báà se ki nchil lóó ɛ́ yɛ nɛɛy kenəə kɛ nchile dinen kɛn ka ke loolen ɛ ghene tetem. Kii nɛ̂ kine lu se din ge ka ghene chèmè kiin wiy nchil dì, lu nɛ ghene ke kenəə kɛ nchile dinen. 15Ɛynɛɛye ghene dine ge kenəə kɛ nchile kɛŋen lu nɛ ɛ́ nyakmen ɛ ghene tetem, nɛ teteme ghene me dine ge ghɛy jii yɛ ke luun ɛ ten, nɛ tekwaate ghene dine ge ɛ́ sɛ lu nɛ ɛ́ jasmen moo ɛ́ bɛɛy ghàà jas-a! 16Sakghɛ wɛ mɛ fektene dine ge ɛ́ yî loo lu ɛ kechii nsak é Feyine tum Jesus Christ, é əb sak əbnəə əbjim wɛ ghele leten ɛ ghene tekwaate.
Ghele Juus ki nchil lɛme wiy
17Se ghɛn ghɛ ghele Juus, ghɛne toŋte ngeŋ ə sɛn ge ghele Juus, ghaŋse əbghun ge ɛ́ yɛkte nɛ lu ɛ nchil gese ke Feyin. 18Ghɛne suuy ge ɛ́ ke kenəə kɛ Feyine kɛŋen ge ghɛn yɛ́ nɛɛy, nɛ ghɛn lu nɛ ɛ́ yiɛkemen nchil è se ke kenəə kɛ ke luun ɛ titiy. 19Ghɛne suuy ge ghɛn lu ghel ghɛ́ dinten jii se əbnfefe, dine ɛyban se ghel ghɛ ɛ́ luun ɛ nfiine, 20lu ghel ghɛ́ tiysen əbngoo, gese dinte əbnəə se ghel ghɛ ɛ́ bɛɛy ghàà yɛ ke kenəə, kwaate ge ka ghɛn kiin nchil lu nɛ ghɛn se ke əbnəə əbjim, gese ke əbluuy. 21Ghɛn ghɛ ɛ́ dinten əbnəə se ghele, lɛ kè lòó ghɛn jia din sɛ̂y se ngeŋ ə sɛn-a? Ghɛn ghɛ ɛ́ fekten ge ghàà ghele se choŋ, ghɛn lɛ lu nɛ ɛ́ mááy əbchoŋ-a? 22Kò fekte ghɛn ge ghàà wel liɛ wiy ə wel kene lum wel, ghɛn lɛ báàmè ghɛ́ ghel-a? Kò suuy ghɛn ge ghàà ghele se kokse əmnyin, ɛ́ lɛ lɛm kefaa ɛ ɛybuu əmnyin é ghɛn vəse-a? 23Ghɛne ghaŋse əbghun ge ghɛn ke nchil, lɛ kò báà se kole ghɛn nchil, choksen Feyin-a? 24Lu kenəə kɛ ɛ́ nè nyaken ɛ ŋwaale-Feyin ge: “Əbtume choksen ɛyghele Feyin bek ghɛn.”
25Ɛynɛyte wel ka nchile dinen kè lòó ɛy yɛ lu kɛn kenəə əbliy wɛ wɛ̀ lɛmen nchil. Yɛ lu ge wɛ̀ yɛ kole nchil, é ke me yɛ lu kɛn ka ɛ́ chèmè nè báà nɛyte wɛ̀. 26Lɛ kè loo lu wele ketum wɛ ɛ́ dì báà nɛyte yɛ lɛme nchil, é Feyine jia me liɛ wen ka wel wɛ ɛ́ nɛytenmen-a? 27Əbtum wɛ ɛ́ nɛyten wiy ghene se njia əbghun, dî nɛ ghene lɛme nchile me gham ghɛn ghɛ ɛ́ kiin nchil nɛ ɛ́ gesemen nɛyte ghɛn, ghɛne jia se lɛme nchil. 28Naa se nkan lu nɛ wel di ke lòó əb jia yɛ lu nkante wele Juus kɛn ge yika ba ə vi luun wele Juus, nɛ gese wiy kɛn ka ɛ́ nè nɛyten yi. 29Nkante wele Juus lu wel wɛ ɛytem ə wene luun ɛ titiy ghene Feyine, nɛ nɛyte Keyioy ə Feyin, nɛ wiy nchil yɛ ɛ́ nyake nyaken. Ɛynkii wel nɛ̂ vi lu nɛ bente wiy ghel wen, bente Feyin wen.
©CABTAL, 2012