JUECES 5
5
Débora huarmihuan Barac runahuan cantashcami
1Chai macanacuita mishashca punllami Débora huarmihuan, Abinoampaj churi Barac runahuanca cashna cantarcacuna:
2“Israelcunata pushajcunata macanacuiman puntapi richun Mandaj Dios churashcamanta, tucui israelcunapish paicunapaj munaimanta macanacuiman llujshishcamanta, Mandaj Diostaca tucuicuna alabaichij.
3¡Uyaichij jatun mandajcuna!
¡Uyaichij, llajtata mandajcuna!
Ñucami Mandaj Diosta cantagrini.
Israelcunapaj Mandaj Diostaca cuerdayuj tocanacunapi tocashpami cantagrini.
Paica israelcunapaj Diosmi.
4Mandaj Dioslla, Seir urcumanta can llujshijpica, Edom pambamanta can rijpica, allpaca chujchurcami.
Jahua pachamantaca yacumi shuturca.
Jahua pacha p'uyumantaca tamyarcami.
5Mandaj Diospaj ñaupajpica urcucunapish chujchurcamari.
Israelcunata Mandaj Diospaj ñaupajpica, Sinaí urcupish chujchurcamari.
6Anat runapaj churi Samgar causai punllacunapish, Jael huarmi causai punllacunapish ñancunaca shitashcami saquirirca.
Chai ñanta purijcunaca, chaqui ñancunatami rijcuna carca.
7Israelca urmarcamari.
Tarpuna allpacunaca shitashcamari saquirirca.
Débora huarmi shayaringacamami chashna carca.
Israelcunapajca mama shinami shayarircani.
8Tucuicuna shujtaj dioscunata catishcamantaca.
Macanacuica pungullapi shina mana illarcachu.
40.000 israelcunapica
¿shuj escudollatapish, shuj lanzallatapish ricushcanguichijchu?
9Israelcunata mandajcuna, ñuca shunguca cancunahuanmi.
Quiquin munaimanta macanacuiman llujshijcuna ñuca shunguca cancunahuanmi.
Mandaj Diostaca alabaichij.
10Yuraj burrocunapi tiyarishca purijcunapish, llaquicunata allichijcunapish, maimanpish chaquillahuan purijcunapish Mandaj Diosta alabaichij.
11Arcoyujcuna bullacushca chingarishcataca, animalcunaman yacuta ubyachina pugyucunapi huillaichij.
Chaitaca Mandaj Dios mishachijpi mishashcata cutin cutin huillaichij.
Israelcuna mishashcataca tucui uchilla pueblocunapipish huillaichij.
Chaimi Mandaj Diospaj israelcunaca paipaj huasi punguman shamungacuna.
12Rijchariyari, jatariyari, Débora.
Rijchariyari, jatariyari, cantota cantayari.
Abinoampaj churi Barac, jatariyari.
Prezucunata pushayari.
13Tucui alli nishcacunapish rircacunami.
Mandaj Diospaj israelcunaca Mandaj Diosmanta jatun tucushcacunahuan macanacungapajmi rirca.
14Amalecpi causaj Efrainpaj aillupish shamurcacunami.
Benjaminpaj ailluta mandajpish tucui paipajcunandijmi canta catishpa shamurcacuna.
Maquirpaj ailluta mandajcunapish uriyamurcacunami.
Zabulonpaj aillupish mandana varata charijcunami shamurcacuna.
15Isacarpaj ailluta pushajcunapish Deborahuanmi rircacuna.
Isacarpaj aillupish Barac shinallatajmi rirca.
Chaquillahuan rishpami pugru pambaman chayarca.
Rubenpaj aillupurapica jatun yuyarinacuimi tiyarca.
16Rubenpaj aillu, ¿ima nishpataj oveja corralpi saquirircanguichij?
¿Oveja canlla huacashcata uyangapajchu saquirircangui?
Rubenpaj ailluca, achca jatun runacuna cashpapish manchacujcunamari.
17Galaadpi causajcunapish Jordán yacu ch'imbanijpimi saquirircacuna.
Danpaj ailluca ¿ima nishpataj barcocuna c'uchullapi carca?
Aserpaj aillupish mama cucha c'uchullapimi saquirirca.
Barcocuna shayarinallapimi carca.
18Zabulonpaj ailluca huañungapajpish rircallami.
Neftalipaj aillupish jatun urcucunaman rircallami.
19Jatun mandajcuna shamushpami macanacurcacuna.
Canaanta jatun mandajcuna shamushpami macanacurcacuna.
Meguido yacu c'uchullapi caj Taanacpimi macanacurcacuna.
Chai macanacuipica, ima cullquita mana japishpami tigrarcacuna.
20Jahua pachamanta luzerocunapish macanacurcami.
Luzerocunapish paicuna tiyanamantami Sisarahuan macanacurca.
21Cisón jatun yacu, ñaupamanta tiyaj yacu.
P'iñajcunataca p'ichajtami aparcangui.
Ñuca almalla ama manchashpa rishun.
22Caballocunapish sillucuna t'alaj t'alajmi callparcacuna.
C'ari c'ari soldadocuna tiyarishpa rijpimi, chashna uyarirca.
23Mandaj Diospaj angelca:
“Meroz llajtataca llaqui tucushca canman nichij.
Chaipi causajcunataca jatunta llaquichishcataj cachun nichij.
Paicunallatajmi Mandaj Diospaj soldadocunataca mana ayudarca.
C'ari c'ari tucushcacunahuan Mandaj Diospaj soldadocuna macanacucujpi mana ayudarcachu” nircami.
24Tucui huarmicunapurapica Jael huarmica alli nishca cachun.
Paica Ceneocunapura Heberpaj huarmimi.
Carpa huasipi caj tucui huarmicunapurapipish Jael huarmica alli nishca cachun.
25Sísara runaca yacutami mañarca, Jael huarmica lechetami curca.
Alli nishcacunaman carana tasapimi lecheta curca.
26Maquita chutashpaca ishtacatami japirca.
Alli maquihuanca, trabajajcunapaj tacana mazotami japirca.
Chaihuanca Sisarapaj umapimi tacarca.
Rinrin quinripi tacashpami, caishuj ladoman pasachirca.
27Sísara runaca Jaelpaj ñaupajpimi nanaihuan curpayaricurca.
Chashna curpayarishpaca Jaelpaj ñaupajpimi urmarca.
Pai urmashca pamballapitajmi huañurca.
28Sisarapaj mamaca, ventanaman asomarishpami, ventanata tapangapaj churashca caspicuna huashaman shayarishpaca: ¿Ima nishpashi paipaj carroca mana utca chayamun?
Macanacungapaj pai charishca alli carroca ¿ima nishpashi yalli uniyan? nishpami caparirca.
29Chaimi chaipi caj yachaisapa huarmicunapish, paipaj mamallatajpish:
30¿Manachu macanacuipi imalla japishcacunata chaupinacucunga?
Macanacuita mishajcunaca shuj shuj solteracunatachari mana cashpaca ishqui ishquitachari chaupinacucuncuna.
Tucui laya coloryuj sumaj churanacunatachari Sisaramanca cucuncuna.
Macanacuita mishashpa imallata japijcunata mandajcunamanca coloryuj churanata, ishquindij ladoman bordashca cungallinatachari cucuncuna ninacucurcacunami.
31Mandaj Dioslla, canta p'iñajcunaca tucuicuna chingarishca cachun.
Canta c'uyajcunaca achijlla inti llujshicuj shina ashtahuan achijyachicuj cachun” nishpami cantarcacuna.
Israelcunapajca, chuscu chunga huatacunatami sumaj causai tiyarca.
Zur Zeit ausgewählt:
JUECES 5: QCHI04
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Quichua Chimborazo Bible Revision 2010 © United Bible Societies, 2010.