JUECES 4
4
Deborapish, Baracpish Sisarata mishashcami
1Aod huañushca q'uipaca israelcunaca, cutinllatajmi Mandaj Diospaj ñaupajpi millaita rurai callarircacuna. 2Chaimantami Mandaj Diosca, Canaán llajtata jatun mandaj Jabinpaj maquipi churarca. Pai mandashpa tiyanaca Hazor pueblopimi carca. Paipaj soldadocunata mandajca Sísara runami carca. Paica Haroset-goim pueblopimi causarca. 3Jabín shuti mandajca, 900 fierro carrocunatami charirca. Paica israelcunataca, ishqui chunga huatacunatami jatunta llaquichishpa causarca. Chaimi israelcunaca Mandaj Diostaca caparishpa mañarcacuna.
4Chai huatacunapica israelcunataca, Débora profeta huarmimi mandacurca. Paica Lapidot runapaj huarmimi carca. 5Débora huarmica Deborapaj palmera yura nishca ucupimi tiyaj carca. Israelcunaca paicunapura p'iñacushcata Débora huarmi allichichunca chaimanmi rijcuna carca. Chaica Efrainpaj urcucunapi caj Ramá, Bet-el pueblocuna chaupipimi carca.
6Chai Débora huarmimi, Cedespi causaj Neftalí aillupuramanta caj Abinoampaj churi Baracta cayanaman cachashpa cashna nirca:
–Israelcunata Mandaj Diosca cantaca ¿manachu cashna mandarca?: Tabor urcuman rishpa cambaj gentecunata tandachi. Paicunataca Neftalipaj, Zabulonpaj aillucunamanta, 10.000 gentecunata canhuan cachun tandachi. 7Ñucaca jatun mandaj Jabinpaj soldadocunata mandaj Sisaratami Cisón jatun yacuman paipaj carrocunandij, soldadocunandij cambajman shamuchun yuyaita cugrini. Chaipimi paicunataca cambaj maquipimi churasha nishpa Mandaj Diosca ¿manachu nirca?– nircami.
8Chaimi Baracpish:
–Can ñucahuan rijpica, ñucapish rishami. Can mana ñucahuan rijpica, ñucapish mana rishachu– nirca.
9Shina nijpi Débora huarmica:
–Shinashpaca, ñucapish canhuan risha. Cai macanacuipica, Sisarataca shuj huarmipaj maquipimi Mandaj Diosca churanga. Chaimanta chai macanacuita mishashcamantaca mana canchu alli nishca saquiringui– nijpimi, Débora huarmica jatarishcahuan Barac runahuan Cedesman rirca. 10Barac runaca Cedespi Zabulonpaj, Neftalipaj aillucunamanta, 10.000 runacunata tandachishpami, macanacuiman huichiyarca. Débora huarmipish paihuanmi huichiyarca.
11Moisespaj suegro Hobab runapaj churi Heberca ceneocunapuramantami carca. Paica paicunapuramanta ch'icanyashpami, Cedes pueblo c'uchullapi caj Zaanaim pambapi tiyaj jatun yura c'uchullapi carpa huasita shayachishpa causacurca. 12Abinoampaj churi Barac runa macanacungapaj Tabor urcuman llujshishcatami, Sisaraman huillanaman chayamurca. 13Chaimantami Sísara runaca tucui paipaj carrocunata tandachirca. Paica 900 fierro carrocunandij, tucui paipaj soldadocunandijmi tandachirca. Chashna tandachishpami Haroset-goimmantaca Cisón jatun yacucama rirca.
14Débora huarmica Baractaca:
–Jatari, cai punllami Mandaj Diosca Sisarataca, cambaj maquipi churashca. Mandaj Diosca cambaj soldadocunata ñaupashcami rigrin– nijpimi Baracca, pai tandachishca 10.000 soldadocunata ñaupashca Tabor urcumanta uriyarca. 15Ña macanacungapaj shayarijpica, carropi caj soldadocunatapish, caishuj soldadocunatapishmi Baracpaj espadata manchana yuyaita Mandaj Diosca curca. Chaimi Sísara runaca paipaj carromanta uriyashcahuan chaquillahuan miticunaman callparca. 16Barac runaca, Sisarapaj soldadocunataca, carrocunandij, soldadocunandijmi, Haroset-goimcama catishpa tucuchirca. Chai punllaca Sisarapaj soldadocunaca shujllapish mana saquirishpami espadapi tucuicuna huañurcacuna.
17Sísara runaca chaquillahuan miticushpa rishpaca, ceneopuramanta caj Heberpaj huarmi Jaelpaj carpa huasipimi miticugrirca. Hazor pueblota jatun mandaj Jabinhuan ceneopuramanta caj Heber runapaj huasi ucupurahuanca mana p'iñanacushcacunachu carca. Chaimantami chaipi miticugrirca. 18Jael huarmi Sisarata tupanaman llujshishpaca:
–Ñuca amito, ama manchashpa ñuca huasiman shamupailla– nircami.
Paipaj carpa huasiman yaicujpica, Jael huarmica shuj jatun linsohuanmi pilluchishpa churarca.
19Chaipimi Sísara runaca: –Ñucami yacunaihuan cani, asha yacuta ubyachihuai– nishpa rogajpi, Jael huarmica lechehuan caj capachuta pascashpa ubyachun curca. Ña ubyajpica cutinllataj linsohuan pilluchircallami.
20Chaipimi Sísara runaca, Jael huarmitaca:
–Carpa huasi pungullapi shuyai. Maijan shamushpa: Pi caipichu nishpa canta tapujpica: Mana pi caipichu ningui– nirca.
21Sísara runaca shaicushca yallitaj dorminaihuan cashpami huañuita dormirca. Chaimi Heberpaj huarmi Jaelca carpa huasita charichina ishtacatapish, tacana mazotapish japishpa, Sisarapajman upajlla c'uchuyashpaca, rinrin jahuanijllapi sinchita tacashpa chai ishtacataca pambacama yaicuchirca. Chashnami Sísara runaca huañurca.
22Sísara runata Barac catishpa ricujpimi, Jael huarmi tupanaman llujshishpaca:
–Can mashcacushca runata shamui ricuchisha– nirca.
Barac runa chai huarmipaj huasiman yaicushpaca Sisarataca, rinrin jahuanijpi ishtacata satishca, huañushca siricujtami ricurca.
23Chashnami Mandaj Diosca Canaanta jatun mandaj Jabintaca israelcunapaj ñaupajpi jatunta llaquichishpa cumurichirca. 24Chai punllamantapachami israelcunaca ashtahuan ashtahuan yallitaj c'ari c'ari tucushpa, Canaanta jatun mandaj Jabintaca tucui chingachingacama llaquichirca.
Zur Zeit ausgewählt:
JUECES 4: QCHI04
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Quichua Chimborazo Bible Revision 2010 © United Bible Societies, 2010.