DANIEL 7
7
Shiwüh Phüyi Michih
1Babilon kiulongthsüpuh Belshazzar kam akhuhbe ching, Danielnü yapkiu ching yapde alachoki milim tüsho michihbo ngü. Jushu apinü milim ju thrüt: 2I, Danielnü, azhing ching thüning lim apung phüyinü keto ato rhumüneande I michih ching ngü, 3tüsho keto chingnü shiwüh atoto phüyi büthsüthsü akhiuk. 4Akhuhbe ju kekhüzü nangde tüsho müleang ghidükeang kihbah alakheah. Jushu, inü kheahshe, aghibo ju dukkhi, tüsho alo kheaknü ju shuhkih tüsho mihtsürü nangde jing mahnenü zhip; tüsho ju kheak mihtsürü mulong jih-a lakheah. 5Püpü mahnepü shiwüh akhiuk, ju akheahpü kuto nangde alakheah. Ju thripkhühnü zhip, tüsho amün ching ahü bolung arheangro mahsam lakheah tüsho tha, “Asürang, shih ahihdo tsühang!” 6Jushu inü kheahshe, shiwüh ju adüthsün kheak wuhnu ghidükeang phüyi kih tüsho aku phüyi lakheah; tüsho yakzan shuhpü, ju kilim jih-a lakheah. 7Jushu azhing ching inü michihbo ching shiwüh aphüyipü ngü, mihtrebe, atrebe tüsho khide amüküp lakheah. Ju yinchi hü ato lakheah tüsho adütre kamde tsühde alakheah, tüsho aningkhi ajingnü jung. Ha püpü shiwühbo kheaknü büthsü lakheah, tüsho ajuh thürü lakheah. 8Inü ajuhbo kheahde lashe, arü bolung ajuh püpü khülang anikhüh akhiuk; ju yüzahpü thsüde atan lakhi ajuh mahsam ayingnü thokhita bah. Ha juh ching ju mihtsürü mükjibo nangde mükjibo lakheah, tüsho lülüshishiyu thade mün khülang lakheah.
Lün Labuh Michih
9Inü kheahde lachoki, kiulongthsübinkiubo adangpung ching zo tüsho lün labuhnü api binkiu kheak bin, api khimmih ju phürüm nangde müyedo la, tüsho api kuyü ju alamlam hing müthsün nangde; api binkiu ju mo trukhi lakheah, tüsho lolungbe-jingbo ju mo takkhi lakheah. 10Mo ayung khülang bukde la tüsho api kinü bukkhit. Chithürü kheak chithürübonü api tankih, tüsho chithürü thürü kinü chithürü thürü api ki zhip. Mahkhappü kim tankih, tüsho hümbo khimshuh-a lakheah. 11Tümütüsho shihjuhnü lülüshishiyu asukkhi düsheak sode inü kheah. Tüsho inü kheahshe, shiwüh ju laksah, tüsho apang thsümünim tüsho motru ching bah. 12Aningkhi shiwühbo thsungkheak a arü wu lude tsoa lakheah, tüshe arü rhangdungbo akheahmünchi khülang thsungkheak lashih. 13Inü azhing michih ching kheahchoki, inü mihtsürü khülang nangde amonü mükamdobah arüde ngü. Tüsho apinü lün labuh ki arü tüsho api miki yü. 14Api kilim wu, müretah tüsho kiulongthsüpü jih-a lakheah, junangde mihtsürü alala, trükshihbo, tüsho thiyuthabonü api tankihpü lakheah. Api yakzan shuhpü ju akheam müla, hode mütsopü yakzan shuhpü, tüsho api kiulongthsüpü ju küyimkishe müthsümünimbe khülang ah.
Michihbo Thanakkhi
15I, Daniel a I me küpkhukde alakheah, tüsho I michihbonü I trede kamshih. 16Ha alala thiyuro dünkheak keokhipü ju kheak zhiprü khülang kilim I yü. Jumonü apinü ha amütsan I ki tha: 17“Harü shiwühbo atoto phüyi ju, alomi chingnü kiulongthsürü phüyi asürübah. 18Tüshe Khide Achangbuh yo amüsührübonü kiulongthsü leangkhibah tüsho lünnü lün kiulongthsü labah.”
19Jushu inü shiwüh aphüyipü dünkheak thiyuro mükheahpü kün, küpü püpürü alala kheaknü büthsüde lakhea, kihode atrebe, ahü ju yinchi tüsho amüzan ju müwayinchi, junü tsüh tüsho adütre kamde yihnak, tüsho aningkhi ajingnü jung; 20tüsho aku kheak ajuh thürü kihkhi dünkheak, tüsho püpü juh dünkheak, küpü akhiuk tüsho mahsam keamkhikhea–ju kheak mükbo tüsho lülüshishiyu thakhi mün khülang tüsho püpürü kheaknü atobe lakheah. 21Inü kheahde lachoki, ha shihjuhnü amüsührübo kheak thirithsü tüsho arü kurungkheak kuk, 22lün labuh arükhi khiungde; jushu Khide Achangbuh yo amüsührübo thsungkheak mahkhapkhi jih, tüsho amüsührübonü kiulongthsü ngüa lupü kim khiung.
23Apinü athakhi ju ha: “Shiwüh aphüyipü ju alomi kheak kiulongthsü aphüyipü labah, ju püpü kiulongthsübo alala kheaknü büthsü labah; hanü alomi athrünkhi tsühbah tüsho thrümthünakbah, tüsho adütre kamde yihthünakbah. 24Shihjuh thürü ju kiulongthsü chingnü kiulongthsürü thürü asürübah, tüsho arü dunglim püpü asürübah. Api ju akhuhrübo kheaknü büthsü labah, tüsho kiulongthsürü mahsam ayoshihbah. 25Apinü Khide Achangbuh azhihkhi yubo asukbah. Khide Achangbuh yo amüsührübo thsümüchibah tüsho kim tüsho akin yakzanbo müthripü mürangbah; tüsho api wu ching arübo kam mahsamkheak thripkhüh labah. 26Jushu mahkhapkhi labah, tüsho api wu hande atsobah, shahde athsümünimbah. 27Kiulongthsü tüsho yakzan shuhpü tüsho alomi kheak kiulongthsü ato alala Khide Achangbuh yo amüsührü mihtsürü kilim jihbah; api kiulongthsü ju akheam mülakhi kiulongthsü labah tüsho yakzanshuhrü alalanü tankihbah tüsho api ki anibah.”
28Akhekhi ha akheam. I, Daniel thsungkheak a, I lümkhinü I tode treshih, tüsho I miro pheakmulukdo kam; tüshe amütsan inü I lüm ching zo.
Zur Zeit ausgewählt:
DANIEL 7: YIMCBSI
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
