DANIEL 6
6
Daniel Kekhüzü Yam ching
1Dariusnü kiulongthsü kurungkheak kovünor 120, kiulongthsü alala ching zopü mulongkhit, 2tüsho arü kurungkheak kiuthsürü Daniel bede mahsam; junangde kiulongthsü ju kukshah mülapü thsüde harü kilim kovünorbonü mütsanmükhia jihpü lakheah. 3Daniel ha püpürü kiuthsürü tüsho kovünorbo kurungkheaknü büthsüde kam tümütüsho me atsüdak api kheak lakheah, tüsho kiulongthsüpuhnü kiulongthsü alala kurungkheak api mokhitpü lümkhi thsü. 4Jumonü kiuthsürü tüsho kovünorbonü kiulongthsü dünkheak Daniel azhihde atsangpü jing-thrümpung yimkhitpü mürang. Tüshe arünü atsangpü thsungkheak jingthrümpung yungsho athsümünim tümü müyimkhit, tümütüsho api thülünde alakheah, tüsho sheakmadukkhi yungsho athsümünim tümü api kheak müyimkhitkhukde alakheah. 5Harü mihtsürübonü tha, “Api Thrünpuh kinkhi kheak khüh yungsho, isanü ha Daniel kheak azhihde tümü müyimkhitkhuk.”
6Jumonü kiuthsürü tüsho kovünorbonü kiulongthsüpuh kilim müjimde arü tüsho tha, “ O kiulongthsüpuh Darius, kutsüpde laang! 7Kiulongthsü yo kiuthsürü alala, khiukdahkhibo tüsho kiuthsü-kovünorbo, lümthiyan-jihrü tüsho kovünorbonü kiulongthsüpuhnü thiyuzüng tüsho thiyukhüm khülang thsüshihpü mulongarihdo, junangde shepünü nü hobah thrünpuh yungsho mihtsürü ki nimung samrü dükeak ching tamkhüntamnübanü, O kiulongthsüpuh, kekhüzübo yam ching jipyukbeah. 8Kheakü, O kiulongthsüpuh, thiyukhüm hüm kheak mütsan dokihang, junangde Midiarü tüsho Persiarü yakzan yande, küpü mübahkhukbe lanü, ju mümüthrikhuk.” 9Jumonü kiulongthsüpuh Dariusnü mütsan-hüm tüsho thiyukhüm kheak mütsan dokih.
10Mütsan-hüm kheak ju dokihdo de Danielnü mükheahkheah she, apinü mutuklode api yam ching yü, küpü Jirusalem limpeang akube khiungshak ching ayinripitbo lakhea, tüsho apinü püpüki rhimokhi nangde api Thrünpuh ki tamkhüntamnüde api shijihpü nimung chingnü mahsam ki khukning. 11Arübonü arü tüsho Danielnü api Thrünpuh miki mihmüthsüm kheangde tüsho tamkhüntamnüde ngü. 12Jushu arünü kiulongthsüpuh ki yü tüsho thiyukhüm dünkheak tha, “ O kiulongthsüpuh! Khürünü khürü ki, thrünpuh yungsho mihtsürü ki nü hobah nimung samrü dükeak ching tamkhüntamnüsho, O kiulongthsüpuh, kekhüzübo yam ching jipyukbah de nünü thiyukhüm kheak mütsan müdokih de?” Kiulongthsüpuhnü alo, “Am, ju Midiarü tüsho Persiarü yakzan mümüthrikhukbe thiyukhüm lah.” 13Judüki arünü kiulongthsüpuh ki alo, “Juda chingnü ramtsorü bolung khülang, Danielnü nü ki yungsho nünü mütsan-dokhi yukhüm mani, O kiulongthsüpuh, tüshe apinü nimung ching mahsam ki tamkhüntamnüchoh.”
14Küyimki kiulongthsüpuhnü ha thakhi sokhea, api khide lümthsünüde kam. Apinü Daniel khümkhitpü lümkih, tüsho ani yüzah khiungde api khümkhitpü anihbuhnü lüpdükhi rhimoakheah. 15Jushu arünü kiulongthsüpuh ki arü tüsho api ki tha, “Mükheahang, O kiulongthsüpuh, kiulongthsüpuhnü athsükhi yukhüm yungsho yuzüng mümüthripü Midiarü tüsho Persiarü yakzan lah.”
16Judüki kiulongthsüpuhnü thiyukhüm jih, tüsho Daniel bedarübah kekhüzübo yam ching jipyuk. Kiulongthsüpuhnü Daniel ki tha, “ Nünü thülünde tankihkhi nü Thrünpuhnü nü bekhitshang!” 17Lung khülang ludarübah kekhüzüyam mün kheak hüpdo, tüsho kiulongthsüpuhnü anihbuh yingkhüm tüsho api putungrübo yingkhümnü Daniel dünkheak tümü mümüthrishihpü ju kheak amütsan yümkih. 18Jushu kiulongthsüpuhnü ayam ching yü tüsho khümkeak thsüde tsüngre hoshih; apinü tsühyungpü tümü mütsüh, asühako müla tüsho yapshede müyü.
19Jushu, ayinkhichoki, kiulongthsüpuhnü asürü tüsho niokheamde kekhüzübo yam lim yü. 20Küyimki api Daniel lapung kekhüzü-yam thüninde arükhea, apinü tripnede Daniel ki zhi, “ O Daniel, arhang Thrünpuh yamlarü, nünü thülünde tankihkhi nü Thrünpuhnü kekhüzübo chingnü nü bekhitkhuknah?” 21Danielnü kiulongthsüpuh ki tha, “ O kiulongthsüpuh, kutsüpde laang! 22I Thrünpuhnü api yunirü arüshihbah kekhüzübo mün khimdoshih, junangde arünü I muyuri, tümütüsho I api miki amülim mülade ngü; tüsho nü miki she, O kiulongthsüpuh, inü amülim tümü mürhimo.” 23Judüki kiulongthsüpuhnü khide asüh tüsho kekhüzü-yam chingnü Daniel bekhitpü thiyukhüm jih. Jumonü Daniel ju kekhüzü-yam chingnü bekhit, tüsho api kheak yurikhi tümü müngü, tümütüsho apinü api Thrünpuh kheak kin. 24Kiulongthsüpuhnü thiyukhüm jih, tüsho sherünü Daniel amülim jihkheanü bedarübah kekhüzübo yam ching jipyuk–arü, arü tsührü, tüsho arü niuberübo kekhüzübo yam abolim mukhiungyide kekhüzübonü arü kheak jukkih tüsho arü robo alala adütre kamde yihthünak.
25Judüki kiulongthsüpuh Dariusnü mihtsürü alala tüsho lomiküp lüpdükhi ching thiyutha trükshih aban kilim thrüt: “ Nüsa tsüde laang! 26I kiulongthsü ching mihtsürü alalanü Daniel Thrünpuh miki ajanbeah tüsho atrebeah de inü thiyuzüng khülang thsüchoh:
Tümüde api arhang Thrünpuh ah, lünnü lah.
Api kiulongthsü küyimkishe müthsümünim,
tüsho api yakzan shuhkhi akheam müla.
27Apinü bekhitchoh tüsho khümkhitchoh,
apinü yinmi ching tüsho alomi kheak amütsan tüsho khinthiyinbe rhimochoh;
tümüde apinü kekhüzübo wu chingnü Daniel khümkhit.”
28Jumonü hanü Persiarü Darius kiulongthsü tüsho Sairus kiulongthsü kim ching Daniel lalim tsüde kam.
D A N I E L NÜ AP I M IC H I HB O T H A N A K K H I
(7.1—12.13)
Zur Zeit ausgewählt:
DANIEL 6: YIMCBSI
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.