Zenez 3
3
Dezobeisans Zonm
1Serpan ti pli rize parmi tou bann zannimo sovaz ki SENYER Bondye ti'n kree. I ti demann sa fanm, “Eski Bondye in vreman dir: Ou pa devre manz tou bann fri lo bann pye ki dan zarden?”
2Sa fanm ti dir serpan, “Nou kapab manz bann fri lo bann pye ki dan zarden. 3Me kanta fri sa pye dibwa ki dan milye zarden, Bondye in dir: Pa manz li, pa ni tous li, sankwa ou pou mor.”
4Serpan ti dir sa fanm, “Zot pa pou mor. 5Bondye i konnen ki letan zot pou manz sa fri, zot lizye pou ouver, zot pou vin parey Bondye, e zot pou konn lebyen ek lemal.”
6Sa fanm ti war ki fri sa pye dibwa ti zoli e bon pour manze. I ti donn li lanvi manze pour li ganny konnesans. I ti pran enn e i ti manze. I ti donn osi en morso son mari ki ti obor li, e i ti manze. 7Zot lizye ti ouver, e zot ti remarke ki zot ti touni. Zot ti koud fey fig ansanm pour kouver zot.
8Dan pti labrin, zot ti antann SENYER Bondye pe pronmnen dan zarden. Zot ti al kasyet parmi bann pye dibwa pour li pa war zot. 9SENYER Bondye ti apel sa zonm, “Kote ou ete?”
10Sa zonm ti reponn, “Mon ti antann ou dan zarden, mon ti per, akoz mon ti touni. Alor, mon'n al kasyet.”
11SENYER Bondye ti demande, “Lekel ki'n dir ki ou touni? Eski ou'n manz sa fri pye dibwa ki mon ti defann zot manze?”
12Sa zonm ti reponn, “Sa fanm ki ou'n donn mwan koman konpanny, ki'n donn mwan sa fri e mon'n manze.”
13SENYER Bondye ti dir avek sa fanm, “Akoz ou'n fer sa?”
I ti reponn, “Serpan in anbet mwan e mon'n manze.”
14Alor, SENYER Bondye ti dir avek serpan:
Akoz ou'n fer sa,
ou pou ganny modi parmi tou bann zannimo.
Ou pou ranpe lo later.
Ou pou manz lapousyer tou le zour ou lavi.
15Mon pou met ostilite ant ou e sa fanm,
ant ou desandans ek son desandans:
I pou kraz ou latet e ou pou mord son talon.
16Apre, SENYER Bondye ti dir avek sa fanm,
“Mon pou ogmant ou douler lakousman.
Ou pou soufer bokou pour ganny zanfan.
Ou pou ganny atire ver ou mari,
me i pou domin lo ou.”
17Avek Adan i ti dir,
“Akoz ou'n ekout ou fanm,
ou'n manz fri sa pye dibwa ki mon ti defann ou manze,
later pou ganny modi, akoz ou.
Ou pou bezwen trimouse tou le zour ou lavi antye
pour ou fer li prodwir manze.
18I pou prodwir rons ek pikan
e ou ava manz bann plant ki pous dan laplenn.
19Ou pou bezwen trimouse pour ganny ou nouritir
ziska ki ou retourn dan lapousyer, kot ou sorti.
Annefe, ou'n ganny tire dan lapousyer, ou pou retourn dan lapousyer.”
20Adan ti apel son fanm Ev, savedir vivan, akoz i ti manman tou bann vivan lo later. 21SENYER Bondye ti fer lenz avek lapo zannimo pour Adan ek Ev e i ti abiy zot.
22Apre, SENYER Bondye ti dir, “Zonm in vin parey nou avek konnesans lebyen ek lemal. Fodre anpes li manz fri sa pye dibwa ki donn lavi, sankwa i pou viv pour touzour.”
23SENYER Bondye ti sas zonm dan Zarden Edenn pour ki i al kiltiv later kot in ganny tire. 24Apre ki i ti'n sas zonm, SENYER Bondye ti plas bann seriben#3.24 Seriben i en kategori lanz avek fonksyon spesyal. dan lantre zarden Edenn avek en lepe laflanm ki ti dous dan tou kote, pour zot gard lakse ki al kot sa pye dibwa ki donn lavi.
Zur Zeit ausgewählt:
Zenez 3: BSK
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Labib An Kreol Seselwa © Seychelles Bible Society, 2013.