Zenez 2
2
1Alor, lesyel, later ek tou sa ki ti ladan ti'n fini ganny kree. 2Setyenm zour, Bondye ti'n fini tou travay ki i ti'n fer. Apre tou travay ki i ti'n fer, i ti repoze. 3Bondye ti beni setyenm zour, e i ti fer sa zour en zour sakre, akoz sa zour, i ti repoze apre ki i ti'n fini tou travay kreasyon.
Dezyenm Listwar Kreasyon: Zarden Edenn
4Sa i lorizin lesyel ek later kan zot ti ganny kree.
Kan SENYER#2.4 Dan Ansyen Testaman Senyer i ganny ekri an let maziskil kan i deziny YHWH, non Bondye Izrael. Bondye ti kree later ek lesyel, 5ti napa okenn vezetasyon lo later. Okenn plant pa ti ankor pouse e okenn lagrenn pa ti ankor zermen. SENYER Bondye pa ti ankor anvoy lapli lo later e ti napa dimoun pour kiltiv later. 6Me ti annan sours delo ki ti monte sorti dan later pour aroz tou sirfas later.
7SENYER Bondye ti form zonm avek lapousyer later. I ti soufle en souf lavi dan son nennen e i ti vin en et vivan. 8Apre, SENYER Bondye ti plant en zarden dan Edenn, dan kote Les, e la, i ti plas sa zonm ki i ti'n formen. 9SENYER Bondye ti fer pouse tou kalite zoli pye dibwa; zot fri ti bon pour manze. Dan milye zarden, i ti plas pye dibwa ki donn lavi e pye dibwa ki donn konnesans lebyen ek lemal.#2.9 Literalman pye dibwa lavi ek pye dibwa konnesans lebyen ek lemal.
10En larivyer ti sorti Edenn pour aroz sa zarden, e i ti diviz an kat lebra. 11Premye larivyer ki ti apel Pisonn ti koul otour pei Havila, kot ti annan lor. 12Lor sa pei, ti en bon kalite; ti osi annan bann plant parfimen ek pyer presyez. 13Dezyenm larivyer ki apel Gihonn, ti koul otour pei Kous.#2.13 Pei Kous: Serten i plas li dan Mezopotami. Dapre lezot i dan Sid Lezip, Soudan oubyen Letyopi. 14Trwazyenm larivyer ti apel Tig, ki ti koul dan kote Les Asiri. Katriyenm larivyer ti apel Efrat.
15SENYER Bondye ti pran sa zonm e met li dan Zarden Edenn pour kiltiv li e pran swen avek li. 16SENYER Bondye ti donn zonm sa lord: Ou kapab manz tou fri ki dan zarden; 17me fodre pa ki ou manz fri sa pye ki donn konnesans lebyen ek lemal, akoz zour ki ou manz sa fri, ou pou mor.
18SENYER Bondye ti dir: I pa bon pour zonm reste tousel. Mon pou fer en led ki pou byen dakor avek li koman son konpannyon. 19Alor, avek later, SENYER Bondye ti form tou bann zannimo ek tou zwazo. I ti anmenn zot kot zonm pour li donn zot en non. Konmsa, tou et vivan ava port non ki zonm ava donn li. 20Zonm ti donn non tou bann zannimo domestik, bann zannimo sovaz ek bann zwazo. Me i pa ti trouv en led ki ti dakor avek li pour son konpanny.
21Alor, SENYER Bondye ti fer zonm tonm dan en profon sonmey e letan i ti pe dormi, i ti tir enn son kot e referm laser. 22Avek sa kot, SENYER Bondye ti form en fanm, e i ti anmenn li kot sa zonm. 23Sa zonm ti dir:
La aprezan sa enn ki mon lezo e mon laser.
I pou apel fanm, akoz i'n ganny tire avek zonm.
24Pour sa rezon, en zonm i kit son papa ek son manman pour atas li avek son fanm, e tou le de zot vin en sel laser.
25Sa zonm ek sa fanm ti touni, san ki zot ti onte.
Zur Zeit ausgewählt:
Zenez 2: BSK
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Labib An Kreol Seselwa © Seychelles Bible Society, 2013.