Beliebte Verse in Ro 12

Teilen

Manxaokab lajanok chi jut co beybal yetok eb yet yulyibank'inal ti'. Q'uexchajokab co nabal, yet watx' chi watx'jic'al oc co beybal junelnej. Ta axca tu' chi jut co ba, ok nachaj el juj tzet chi yochej Dios jin. A juntzan tzet chi yochej tu', watx'c'al elok, chi tzaloj Cham yuj, c'am jabok tacnakil yul sat Cham.

Ex wuẍtak, ex wanab, caw chi ok' c'ul Dios jin. Yuj wal tu', chin tewi ayex, tol che bekoc e ba yul is k'ab. Axca junok xajanbal iquis, tol chi ak'lay bay Cham. Ta chi co bekoc co ba bay axca tu', chi yal elapnok tol yet on, cax chi tzaloj c'ul Cham jin. Axca tu' is mojal chi yun joc ayilal bay.

Tzalojok on masanil tiempo, yujtol a Dios chi jaoc yipok co c'ul. Tec'an chi jut co ba yet chi jilon yail. Manchakc'al co bek co txajli.

Manchak co chaek jak'lay ayc'ay yuj junok yobtakil chi jay jiban. A ti jet, watx'okab chi jut co ba, yet watx' ayon chi jak' ayc'ay yobtakil tu'.

Watx' chi jut co camc'ulnen co ba, yujtol junxanej jayji yin Cristo. Yowalil chi jiaytek co ba junjun on, yet watx' ay jelapnok junjun on yul co sat.

Co camc'ulnelej co ba yetok acaw camc'ulal. Tzanc'al tzet man watx'ok, co yajcan elok. Axa yin tzetak yetal watx' chi jaoc co nabal.

Jak'ek jip jayji ec' yin junc'ulal yetok eb masanil.

Ex in camc'ulnebil, c'am chi je' co pakon co ba bay junok mactxel. Yowalil chi jechbanej, yet watx' munil chi yak' Dios pak bay. Yujtol yalnak Cham yul tx'an Un axca ti': Ayin ti' ay walon wet waon oc is yailal eb. Ayin ok wiec' pak bay eb, ẍi Cham Jajawil, ẍi tx'an.

C'asan chi jut co ba bay Cham Jajawil. Manokab isajok chi jut co ba bay Cham. Yinokab masanil co c'ul chi jak'on serbil Cham.

A Dios, max yak' wopiso yuj is watx'c'ulal. Yuj tu' xan chi waltok juntzan ti' ayex e masanil. C'am chi je' co naon junjun on tol ec'ban jelapnok. Yowalil yaynakilokab on co naoni, atac'ala' tzet jopiso max yak' Dios ayon junjun on, yuj chi jaoc co c'ul yin.

Ta ay mac chi yak' yobc'ulalil ayon, manchak co pakek co ba bay. Watx'okabc'al chi jut co beybal satak masanil anima.

Junc'ulalokabc'al jayjiek co masanil. Manchak jiek can co ba. Watx'okab chi jut co ba yetok eb c'am yelapnok yul sat jet animail. Manchak co naek tol caw jelan on.

Chi yalon c'apax yul tx'an Un tu' axca ti': Ta ay is wajil mac ajc'ul oc en, ak' lowok. Ta ay is takintial, ak' yuc'a'. Caytu' ok yun cakbok aj sat yuj q'uixwilal, ẍi yul tx'an Un tu'.

A mac yob chi yut c'ul ayon, aokab watx'c'ulal Dios chi co k'antek yiban, cax manokabnak yowal c'ul Dios chi co k'antek yiban, palta aokab is watx'c'ulal. Tzalojokonek yetok eb chi tzaloji. Cusokonek yetok eb chi cusi.

Colwajok on bay eb jet creyenteal, yet ay tzet caw yowalil chi oc yuj eb. Ak'omokab on posada bay eb chi ec' ayon.

A co mimanil, xiwil yetbeyom, palta tx'ok tx'okc'al yopiso junjun. Axca co mimanil tu', cayon ton tu'. Caxc'al xiwil on, palta axca tol junnej animail jayji yul is k'ab Cristo. Axca ton masanil yetbeyom co mimanil tu', junnej yayji, cayon tu', junnej jayji co masanil.