Beliebte Verse in Santiágo̱ 3

Teilen

Xómáꞌ xa̱bo̱ tsí na̱ma̱ñúú jamí nafruꞌu̱ún rí na̱ꞌkha̱ ná inuu Ana̱ꞌlóꞌ rá, rí ginii jayu tsíni̱i̱ rí xkawe̱ꞌ, tsítsa̱ñúu̱ꞌ gajmíi̱ xa̱bo̱, gamakuu̱n, májáan a̱kuíi̱n, phú nañáwíin a̱kuíi̱n juñúu̱ tsí ngíníi, gatíí rí máján nuni̱i̱, tsíraꞌwíi̱n xa̱bo̱ tsí mune̱-nga̱júu̱n jamí na̱nguá a̱jma̱ inúu̱.

Á xtáa mbáa tsí gakon rí na̱ma̱ñuu jamí nafroꞌo̱o̱ náá rí máján ma̱ꞌne ná majña̱ꞌlaꞌ dxe̱ꞌ. Gasngájmee̱ ne̱ ga̱jma̱á majñu̱u̱ rí gamakuii̱ jamí rí tsíkúxe̱-mine̱e̱ꞌ ído̱ naꞌnii̱ rí máján.

Tsí nandúún rí ma̱ju̱wá tsímáá xa̱bo̱, nu̱mbáyíi̱ rí ma̱xátsa̱ñúu̱. Asndo xómá rí nudii̱ tsígoo rí máján jaꞌnii, kajngó mune̱ xa̱bo̱ rí nandoo Ana̱ꞌlóꞌ.

Ikhaa jngó, ná ríga̱ tsixígu̱ꞌ jamí sia̱nꞌ, ikhín máꞌ ríga̱ xkujndu jamí mbá xúgíí inii rí xkawe̱ꞌ mangaa.

Ga̱jma̱á ra̱jwa̱nꞌlóꞌ nagájnuu ajngáa ná rawanlóꞌ rí nu̱ꞌne̱-mba̱a̱lóꞌ Ana̱ꞌlóꞌ Mikhuíí, xúꞌkhue̱n máꞌ rí nu̱ꞌxná-máꞌíinlóꞌ xa̱bo̱ tsí ni̱gu̱ma-ku̱mii xómá jaꞌnii Ana̱ꞌlóꞌ. Mbóó máꞌ ná rawanlóꞌ nagájnuu ajngáa rí nu̱ꞌne̱-tsakun-rámiilóꞌ xa̱bo̱ jamí ajngáa rí nu̱ꞌxná-máꞌíinlóꞌ xa̱bo̱. A̱ngui̱nꞌ, ra̱gíꞌmaa ma̱ꞌne rí xkuaꞌnii.

Rí ra̱jwa̱nꞌlóꞌ jaꞌnii xómá ri̱ꞌyu̱u̱ agu. Ka̱ma ne̱ ná xuyalóꞌ, jamí phú gíꞌdoo ne̱ tsiakhe̱ rí ma̱ꞌne ne̱ mbaꞌa inii rí ra̱máján, xúꞌkhue̱n máꞌ naꞌne-maꞌchúu ne̱ mbá xúgíí xuyalóꞌ. Ndayá ski̱yu̱u̱ꞌ ne̱ ná awúun agu rí nakha jámuu, jamí naꞌne-maꞌchúu ne̱ mbá xúgíí mbiꞌi rí juwalóꞌ.

Xómáꞌ rí ra̱jwa̱nꞌlóꞌ rá, nimbáa tsíꞌngo̱o̱ gáꞌthán-ñájuun ne̱. Mbá rí xkawe̱ꞌ rí nda̱a̱ xó ma̱wajún-ꞌthi̱ínlóꞌ ñajuun ne̱, jamí gajni̱í thana rí na̱gu̱díin xa̱bo̱ ná awúun ajngáa rí nagájnuu eꞌne ne̱.

A̱ngui̱nꞌ, ma̱xánindxa̱ꞌlaꞌ mbá xúgiáanꞌlaꞌ xa̱bo̱ tsí nusngáá, numuu rí ndu̱ya̱álaꞌ máꞌ rí phú i̱tha̱án gakhe̱ maxúdaa awan Ana̱ꞌlóꞌ ga̱jma̱á numa ikháanꞌxo̱ꞌ.