Beliebte Verse in PA'JARIANG 32

Teilen

Nakanamo anjo taua, “Teaimi Yakub arennu. Le'ba' mako a'laga siagang Allata'ala, kammayatompa siagang rupataua, nampa ikau ammeta. Lanri kammana, kamma-kamma anne a'jari arennu Israel.”

Nampa nakana anjo taua, “Lappassanga', kala'birimmi ammumba alloa.” Appialimi Yakub angkana, “Tena nakulappassangki' karaeng, punna tena kibarakkakia'.”

Mingka ia ammantangi kale-kalenna. Nania'mo sitau bura'ne battu nampa a'laga siagang Yakub sa'genna la'biring singaraka.

Le'baki anjo nakanamo Yakub, “Le'ba'ma' assibuntulu' rupa siagang Allata'ala kunampa attallasa' ija.” Lanri kammana naaremmi anjo tampaka Pniel.

Ri wattunna naasseng kalenna anjo taua angkana talammetayai ri anjo pa'laganga, nalappassangngimi pungku'na Yakub, sa'genna tassalamo poko' bongganna Yakub.

Akkuta'nammi anjo taua, angkana, “Inai arennu?” Appialimi Yakub angkana, “Yakub.”

Nakanamo Yakub, “Kipaumi inai arenTa Karaeng.” Mingka appialimi anjo taua angkana, “Tena naparallu nupakkuta'nangngang angkana inai arengku!” Nampa nabarakkaki Yakub.

Tena kusiratang langgappai pangngamaseanTa siagang tamamminraTa ri pa'mai' ia le'baka Kipa'butti mae ri nakke. Ri wattungku a'lampa allimbangi Binanga Yordan, tena apa-apa kuerang pantaranganna takkang. Kamma-kamma anne battuma' ammotere' lalang anne ruaya pammantangngang.

Sa'genna kamma-kamma anne tanakanreai turunganna Israel dageng antongkokiai poko' bongganna olo'-oloka, lanri le'ba'na nilappassangngi poko' bongganna Yakub.

Nampa appala' doammo Yakub nakana, “O, Allata'ala, Ia napakalompoa toaku Abraham, siagang manggeku Ishak, poro Kipilangngeri laloa'! IKattemi Batara assuroa' ammotere' mange ri pa'rasangangku siagang bija pammanakangku. Nampa Kijanjima' angkanaya iKatte langngatoroki sikontu-kontuna a'jari baji', untu' inakke.

Kupala' dudui ri Katte, pasalamaka' battu ri daengku Esau. Mallaka' gassingka battui mae untu' ambundukia' siagang angngancurukka' sipa'gangngang, kammayatompa bai'-bainea siagang ana'-anaka.