Beliebte Verse in Ibrani 11

Teilen

Inendainggen Allah oba panggot diluk dogoligogi eti ebe, yigit diluk. “Pano asigin,” yiluk eberogonat ambigik, “Yi mende ndi mende ninilenggen nen kigidek mendeat, eberogonat weregat o,” yiluk didigik, kagarigogi etiat o. It akoni alebagik inendainggen Allah oba esigit dilugat panggot diluk welaguka eti paga, Allah nen, “It pano,” yiluk it pasik oba kondoksek welagike.

Akoni inendainggen Allah oba panggot digidek kalok, it nen at akla arlenggen kausak mende kagasusak mondok erlok dek o. Nen, at oba wisuwogoluk kalok, “Allah eberogonat werek,” yiluk ambigik, “At ebe inilu asuwogoluk kagasugun kalok, at nen onggo ebe mende wogisaligogo,” yiluk ambigik, kagasusak o.

Allah wene paga, mbogot agat yi mende ndi mende taʼbokogonat ninilenggen kiligogi yoma, nit nen, “Ninilenggen kiligogi dek mende paga walkasikemo werek,” yiluk, ninendainggen at oba panggot diluk didusak o.

Ap Abraham, Allah nen ayonggo ʼbiluk, “Kat o omanggi inde dogonok nen yiluk wokisik nen, lano o,” yiluk abok yogokikemo, at nen, “Wene eti eberogonat,” yiluk endainggen Allah oba panggot diluk o nggoma ligin salek onggodek dogolik wagike. Wagikesik, o abok yogokikemo etoma arat wagikesik dogoligat, “O yi dek o. O ninat omanggi Allah nen yalengge walkalok, o kerlaga obatneyak mende paga palkike mende omanggi werek o,” yiluk anggorlem mondok dogolik, ago o su mende ya palogo noge yigik, nda palogo noge yigik, ap kuso negen noko lagike. Eti kak, ap Ishak inom, Yakub inom, inakla nen, “Allah nen, Esigit diluk wokisagin, yiluk abok yisike eti, nit ninomat yoknisasikemo inde asugun,” yiluk esigit dilugat noko laguka.

At ap Nuh nen, endainggen Allah oba panggot diluk, yi wene ndi wene yabunggane kagat lasigin mende Allah nen kusumbi yogokikemo ebe ilenggen kigidek mendeat ogwe, “Eberogonat kagat lasigin mende yokneke kigi,” yiluk Allah wene kologo dogolik, nggu omanggi at aʼburi inom ndil inabusak mende mberlakike. Esigit diluk mberlakikemo, Allah nen akoni wene inoba ʼbiluk inebe inakike mende, at Nuh etiat, endainggen Allah oba panggot disike eti paga, Allah nen, “At pano,” yiluk ndilkike o.

At ap Henokh endainggen Allah oba panggot diluk welagike eti paga, ebe watlatluk dek Allah nen ilugat waganggikemo, it akoni amberek nen ebe kweyakuka mende, at ebe inilenggen kigidek. At ebe Allah nen awan waganggidek werek nggorlek, “At kagako lagike mende pasik Allah akla arlenggen kasi lagike,” yiluk Allah wene paga kolal mbalek werek o.

At ap endaga Kain nen, mondok erlok dek mende Allah wogokike mende, at Habel etiat, endainggen Allah oba panggot diluk pano mende Allah wogokikemo, at Allah nen, “Habel at, obabut mot pano kigi,” yiluk yisike. Esigit diluk yisikesikmo nen, at Habel ebe watlagike mende, endainggen Allah oba panggot diluk dogolik kagakike eti paga, at nen, “An esigit diluk kagaki,” yiluk yoknisaligogo negen mondok werek o.

Nen, at Abraham ebe arlongga agikesik, age Sara ebe abirli welagike mendeat, at Abraham akla nen, “Allah nen abok yoknisasike etnogo eberogonat woknisaginat o,” yiluk endainggen Allah oba panggot diluk welagike eti paga, age Sara eyak aburla asusak amot agikemo aburla agikesik endakike.

Wagikesik, o abok yogokikemo etoma arat wagikesik dogoligat, “O yi dek o. O ninat omanggi Allah nen yalengge walkalok, o kerlaga obatneyak mende paga palkike mende omanggi werek o,” yiluk anggorlem mondok dogolik, ago o su mende ya palogo noge yigik, nda palogo noge yigik, ap kuso negen noko lagike. Eti kak, ap Ishak inom, Yakub inom, inakla nen, “Allah nen, Esigit diluk wokisagin, yiluk abok yisike eti, nit ninomat yoknisasikemo inde asugun,” yiluk esigit dilugat noko laguka.

Nen, at Musa eti ebe arat arluwe agikesik nen, endainggen Allah oba panggot diluk, men ambasike, “An ap nggok Firaun aʼbut kwe etnogo eyak negen dogusak mondok naʼit o. An nebe pano dogolik, elalma ake mende, anggilukogo weyak kagako dogusak eti naʼit. It Allah aʼburi ninom yi aik ndi aik kagat ninako dogusak pano o,” yiluk akla ambasikesik, “Yabunggane Allah nen onggo woknisigin mende werek o,” yiluk ambasikesik nen, “Yi mende ndi mende pano mende akoni o Mesir ininggimo mende yi nggok dek o,” yiluk, togot diyalok nen, “Kristus ake ninebe ʼberot ninako dogusak etiat nggok o,” yiluk ambasike. Esigit diluk ambasikesik nen dukisikesik, endainggen Allah oba panggot diluk, “Ap nggok Firaun akla agaga dagusak eti nayuk o,” yiluk akla ambigidegat, Allah ebe ninilenggen kiligogo dek mende eti ilenggen kasi dogolik negen, “Nendainggen at oba panggot digirikmo eti dukiginat o,” yiluk o Mesir togot diyalok duki wagike o.

Alebagik Allah nen Abraham yogoko dogolik, “Kat nen endago mende wika lasugun yiluk yokikigi etnogo ebe, kaʼbut Ishak yi nen endago mende nen wika lasugun mende pasik yokikigi o,” yiluk yogokike mende, yabunggane aren mbaligiluk, “Kaʼbut ebe yi an nake watnisin,” yiluk yogokike. “Watnisin,” yiluk yogokikemo, at Abraham endainggen Allah oba panggot diluk welagike eti paga, “Ishak watlasumo Allah nen yabunggane erlogat ilugut digin,” yiluk ebe warogo Allah wogisigiluk kagakike eti paga, inane dagakogo, Ishak warek mende iluk agama Abraham wagangge yiluk yusagat o.

Esigit diluk kagat lagonem, at kwe Rahab yugunengge kagako lagike mende eti nen, endainggen Allah oba panggot diluk, it ap Israel mende wim il waganggo laguka mende yomenogo inebe pano woginakike eti paga, it akoni amberek Allah wene waganusak inaʼit mende inebe mondok inako dogolik, at kwe etiat, wakidek togot disuka o.

Akoni Israel mende inendainggen esigit dilugat Allah oba panggot diluk dogolik, akoni agat werlelekmangge liligogi kak, i yenggelek endaga Merah eti Allah nen kiyal disikemo wundali waguka. Esigit diluk wundali wagukama, it akoni Mesir mende nen, “Nit esigit dilugat wundaluwok o,” yiluk wundali wagonem, i nen sebel inakike.

It akoni Israel mende esigit dilugat inendainggen Allah oba panggot diluk dogolik, o Yeriko unggul ininggi 6 hari paga walinet kasi lagukasik, ininggi omanggi paga walinet kasinem, leget ʼbak leget palek mende miyak dambuk yisike.

Duki wagikesik nen, endainggen esigit dilugat Allah oba panggot diluk dogolik, at malaikat omanggi akoni inebe warinabigogo mende nen, akoni o Mesir mende inaʼburi mangguya endago mende inako dogolik, akoni Israel mende inasunogo yiluk, domba warogo endaga Paskah nasi dogolik, amep su kambemangge dombok warik lowagaluk yogisasike.

At Yusuf nen, endainggen Allah oba panggot diluk welagike eti paga, ebe korogat watlasigiluk kagako dogolik, aʼburi Israel mende o Mesir nen dukugun mende pasik yogisigik, nen, “An nowak nggilelek yigit diluk kagatno,” yiluk yogisigik, kagakike.

At Yakub endainggen Allah oba panggot diluk welagike eti paga, ebe watlasigiluk kagako dogolik, aregerluk ilugun oba kimbit diluk Allah keyagi wako dogolik, ap inebe mbere Yusuf aʼburi yomenogo yogisasi dogolik, “Allah nen panot kinako dogowak o,” yiluk yogisasikeat.

Nen, at Ishak eti, endainggen Allah oba panggot diluk welagike eti paga aʼburi Yakub inom, Esau inom, yogisasi dogolik, “Yabunggane Allah nen panot kinako dogowak o,” yiluk yogisasike.