Beliebte Verse in Romanee 12

Teilen

As ny jean‐jee shiu hene y chummey gys y theihll shoh; agh bee‐jee er nyn gaghlaa ayns y cummey noa jeh nyn aigney, dy vod shiu prowal cre ta’n aigney shen dy Yee ta mie as booisal da, as dy slane casherick.

Ta mee guee erriu er‐y‐fa shen, vraaraghyn, liorish myghinyn Yee, dy jean shiu chebbal nyn gallinyn myr oural bio, casherick, booisal gys Jee, ta’n chirveish resoonagh eu.

Gennal ayns treishteil; surransagh ayns seaghyn; tannaghtyn kinjagh ayns padjer

Ny lhig da’n olk barriaght y gheddyn ort, agh fow barriaght er yn olk lesh jannoo mie.

Bee‐jee jeh aigney dooie yn derrey yeh gys y jeh elley lesh graih braaragh, ayns onnor dagh unnane jannoo soiagh jeh fer elley roish hene.

Lhig da graih ve fegooish foalsaght. Cur‐jee dwoaie da shen ta olk, lhiann‐jee gys shen ta mie.

My oddys eh ve, wheesh as t’ayns nyn booar, jean‐jee beaghey ayns shee rish dy chooilley ghooinney.

Charjyn ghraihagh, ny gow‐jee cooilleen ec nyn laue hene, agh ny sleaie lhig‐jee lesh corree: son te scruit, Lhiam’s kerraghey; mish nee cooilleeney, ta’n Chiarn dy ghra.

Cha nee liastey ayns obbyr; agh jeean ayns spyrryd; shirveish y Chiarn

Son, liorish y ghrayse er ny choyrt dooys, ta mee gra rish dy chooilley ghooinney ta ny vud eu, gyn dy smooinaghtyn ny syrjey jeh hene na lhisagh eh smooinaghtyn; agh dy smooinaghtyn dy sheelt, cordail rish y towse dy chredjue ta Jee er rheynn er dy chooilley ghooinney.

Ny jean‐jee olk son olk y chooilleeney da dooinney erbee. Kiare‐jee ro‐laue dy yannoo reddyn onneragh ayns shilley dy chooilley ghooinney.

Bee‐jee jeh un aigney yn derrey yeh gys y jeh elley. Ny soie‐jee nyn aigney er nheeghyn ard, agh croym‐jee gys deiney ta injil ayns stayd. Ny bee‐jee creeney ayns ny smooinaghtyn eu hene.

Shen‐y‐fa my ta dty noid accryssagh, cur da bee; my t’eh paagh, cur jough da: son liorish jannoo shoh nee oo cruinnaghey smarageyn dy aile er e chione .

Bannee‐jee adsyn ta jannoo tranlaase erriu; bannee‐jee, as ny gwee‐jee mollaght. Gow‐jee boggey mâroosyn ta goaill boggey, as jean‐jee dobberan mâroosyn ta dobberan.

Rheynn gys ymmyrch ny nooghyn ; arryltagh dy choyrt oltaghey‐bea da troailtee.

Son myr ta ain ymmodee oltyn ayns un chorp, as cha nee yn un oik t’ec dy chooilley olt: Myr shen ta shinyn, ga ymmodee, un chorp ayns Creest, as dy chooilley unnane oltyn yn derrey yeh jeh’n jeh elley.