ROMA 8
8
ROMA 8
1Yɛrɛ dɔgl-gbaak taa dood wɔ hi ɔks hi Yeesu Kristu matugo. 2Ya̧a̧nɛ, ꞋꞋMɔkil za̧a̧tigya maakdɔglꞋꞋ bɔ gi wook hin a ɔksil wɛ bɔ hi Yeesu Kristu gedu tuus zul mi tuus a ꞋꞋhinha̧a̧l hi wɔrk maakdɔglꞋꞋ du.
3Bɛt hi zulɔ woo hinyɔ Muusa maakdɔgl ɗɛ̄ɛ̄ wook gɛ anyɔ doo hɛbtdi taan tɛŋko. Bɛt yaaz waaɔ mɔɔt bɔ a waal du. Yɔ waaɔ zaa, muulɔ riitin an doo hinha̧a̧lya hɛbtdi, an gi ha̧s hinha̧a̧lɛ. Wɛɛ Bɛt mat hinha̧a̧l hi dɔgl-gbaakɔ bɔ a waaɔ bɔ Yeesu muul du yɔ wɔrɔ. 4Bɛt woo hin bɔ lab an wɛ dag gbɔnɔ wɛ woowoos rɔbɛ wɔ maakdɔglɔ bɔ ɛrɔ, wɛɛ yɔ wɛ ɛmbik an Bɛt Mɔkilɔ gig ha̧a̧ko, taa anyɔ doo hɛbtdi ha̧a̧ge.
5Wɔ hi gi waak an doo hɛbtdi, hi mɔkig hinyɔ doo hɛbtdi gig ha̧a̧ko, wɛɛ wɔ hi waak anyɔ Bɛt Mɔkilɔ ha̧a̧ge, hi mɔkig hinyɔ Bɛt Mɔkilɔ gig ha̧a̧k giya. 6Za̧a̧nyɔ gi mɔkig hinyɔ doo hɛbtdi gig ha̧a̧ko, gi wɔrɔ. Wɛɛ za̧a̧nyɔ gi mɔkig hinyɔ Bɛt Mɔkilɔ gig ha̧a̧ko, dag za̧a̧tigi hi boolumi. 7Wɔ hi mɔkig hinyɔ doo hɛbtdi ha̧a̧ge, hi gi Bɛt lɔlɔhɛ̧ɛ̧nikyaadɛ, taa an hi fɔk hinyɔ Bɛt maakdɔglɔ raa, wɛɛ taa an hi ɗɛɛ fɔk be. 8Yɔ anbɔ dood wɔ hi waak an doo hɛbtdi gi waako hí dɛ̄ɛ̄ an hi bɛs Bɛt gɛ.
9Yɛrɛ nɛya, nɛ taa waak an doo hɛbtdi gi waako, Bɛt Mɔkilɔ gi gi waak a nɛ kpoos du hi rɔbo, nɛ waak an hinyɔ ha̧a̧g giya. Za̧a̧nɔ gi taan Yeesu Kristu Mɔkilɔ gi kpoos du gɛ, taa Yeesu doo ɔnɛ. 10Kristu gi gi nɛ kpoos du, muul nɛ wɛɛ wɔrko a hinha̧a̧l dɔŋgo, wɛɛ mɔkil nɛ gi za̧a̧tili be a hinrɔbwook dɔŋgo. 11Wɛɛ gid Za̧a̧nyɔ rɛms Yeesu a wɔrkɛ teesdu Mɔkilɔ gi waak a nɛ kpoos du, Za̧a̧nyɔ rɛms Yeesu Kristu a wɔrkɛ teesdu gi wɛɛ gi gaa muul nɛ wɔrkil bɔ za̧a̧tigi hi Mɔkil yɔ gi waak a nɛ kpoos du tɛŋkɔ.
12Yɔ anbɔ, yɛ̧ɛ̧dɛ mi wɛ, hinza ɗɛ̄ɛ̄ an gi fɛ̧ɛ̧wɛ wɛ fɔ̀b hinyɔ doo hɛbtdi ha̧a̧g gɛ. 13Gid nɛ waak an hinyɔ doo hɛbtdi ha̧a̧ge, nɛ wɔrɔ. Wɛɛ gid nɛ gbɔŋk muul ɗɔkum wɔ hi Bɛt Mɔkilɔ, nɛ́ za̧a̧. 14Dood wɔ Bɛt Mɔkilɔ gihi kaŋk a gbɔnɔ rɔb du hi gi Bɛt waat sɛw. 15Wɛɛ nɛ́ dāg gbaar mɔkil an nɛ wɛɛ nɛ waa a hoob du gɛ. Nɛ dag Bɛt Mɔkilɔ yɔ gisɛ gok an wɛ el Bɛt a Aba, raakɔ a Baaba!
16Hɔɔ, Bɛt Mɔkilɔ ta̧a̧ mɔkil wɛ hi zulɔ: a wɛ gi Bɛt waato. 17Nɛ gid wɛ gi Bɛt waato, wɛ gi Bɛt rɔɔsɔ dakya ma, wɛ gi dakya ɔksi hi Yeesu Kristu; wɛɛ gid wɛ ya̧a̧ryɔ̧k hi giya, wɛ waa hi gii a gi gbɔlums du hɛw. 18Mi mɔk ya̧a̧rhant wɔ wɛ gi yɔ̧ko a ɔ̧tigi zulɛ rı̄ı̄ an hi gogsin gbɔlums yɔ gɔ gi zaa gi wɛɛ gi mitsɛ gɛ.
19Hinwɔ Bɛt kim sɛw hi kɔm hi ook Bɛt wāātɔ wɔ midigya̧ hi gbɔlumsɛ hi ha̧a̧tig gbɔɔltɔnɔ. 20Ya̧a̧nɛ waal gi a hintɔs tɛŋkɔ wɛɛdisɛ. Taa an ha̧a̧ gii hi zulɔ, Bɛt gii gbaage a hinɔ gedu. 21Yɔ anbɔ Bɛt gaa mɔkil-gbaaki: ɔ̧tza hinyɔ Bɛt kimɔ gi pidɔ, hi tuus zulɔ a tɛŋk ha̧tirgoya bɔ gig wa̧a̧k gbaarums du gedu, yɔ gɔ gi wɛɛ gi dag Bɛt wāātɔ wɔ zulya̧ tuusig gbɔlums bɔ ɔ̧nɛ.
22Yɔ anbɔ wɛ mɛɛ a yɛɛl amntɔnɔ tuur ɓɔryɔ, waal du sɛw gi hekugo, gi kosgumn kɛŋko an nis gi kɛŋk waagulik kosgumnɛ. 23Waal du gii kpɔd gɛ, wɛɛ hɛw, wɛɛ yɔ wɛ gin Bɛt Mɔkilɔ wɛ yɛɛl wɛ dag a Bɛt gaasɔ bɔ gedu; wɛɛ hɛw wɛ gi hekig wɛ kpoos du, wɛ gi oonik an Bɛt gi pidɛ gi za̧a̧s muul wɛ, gi wɛɛnɛ waatɔ ɛns hi rɔbo. 24Yɔ wɛ gbaak mɔkil wɛ a wɛ́ za̧a̧ ro wɛ́ za̧a̧. An wɛ gbaak mɔkil wɛ a hinyɔ gɔ wɛ gbɛn geha, hinɔ taa mɔkilgbaak ma; hinyɔ wɛ gbɛnko, gi an wɛ wɛɛ wɛ wāal ɓɛ ya? 25Yɛrɛ gid wɛ gbaak mɔkil wɛ a hinyɔ wɛ gbɛn gɛ hage, yɔ anbɔ, wɛ oog hi hinmɔŋki.
26Gbunɔ yɔ wɛ gi dood hɔntil gii Bɛt Mɔkilɔ gi gisɛ zaak ɗaako a wɛ hɔntil bɔ gedu; yɔ wɛ mɛ̄ɛ̄ Bɛt zɔ̧k anyɔ rii gɛ ya̧a̧nɛ. Yɔ anbɔ, Bɛt Mɔkil hi zulɔ gisɛ Bɛt zɔ̧ko hi hekil yɔ hi ɗɛɛ an gɔ hi dɔg gɛ. 27Bɛt yɔ gi seek a kpoos wɛɛdisɛ, mɛɛ hinyɔ Mɔkilɔ ha̧a̧g ɛrko. Ya̧a̧nɛ Bɛt Mɔkilɔ gi zɔ̧bsig dood wɔ hi gi Bɛt ɔnɛ anyɔ Bɛt gig ha̧a̧ko. 28Wɛ mɛɛ ɔ̧nɛ a Bɛt gi woonik hin sɛw anyɔ gi woosig dood wɔ ha̧a̧hi a ge hinrɔbo, dood wɔ elihi an hinyɔ da mɔkɔ an gi woo.
29Ya̧a̧nɛ da yɛɛl sɛ̧ɛ̧hi, da gbaahi nɛ dordi an hi fɔ waawal muutɔ hi wɛɛ an giya, an kuudu waawal gi wɛɛ hinda gbɔɔl a yɛ̧ɛ̧dɛ ɔ̧ɔ̧ kitɛ tees du. 30Wɛɛ dood wɔ Bɛt gbaahi nɛ biitir anbɔ be, wɛɛ el hii hɛw. Wɛɛ dood wɔ elihi be, ta̧a̧hi an dood riitɛ a gi muutdu, gaahi gbɔlumsɔ bɔ ya̧nɛ. 31Gi an wɛ dɔg nɔ ma a hin wɔrɔ hi gbaŋgi? Bɛt gisɛ ɗaako, bɔ gi ɓaas zulɔ a wɛ gbaŋg nɔ? 32Bɛt ā̧a̧n waaɔ mɔɔt bɔ gɛ, gaaz an gi wɔr a wɛ kal sɛw. Ri gi taa nɛ an gi gaawɛ hin sɛw hi gii gɛ?
33Bɔ gi gɛ̧ɛ̧n dood wɔ Bɛt sɛ̧ɛ̧hi dɔglɛ? Bɛt gii ta̧a̧hi an dood rɔbɛ! 34Bɔ gi matinihi dɔglɛ? Yeesu Kristu wɔrɔ. Wɔr kpɔd gɛ, wɛɛ rɛml dɔɔ a bɛtha da ɗɔɔt a Bɛt naanrɔbo, wɛɛ gisɛ Bɛt zɔ̧ko! 35Bɔ gi gɛ̧ɛ̧nɛ Kristu ha̧a̧tigɔ? Gi gi ya̧a̧rhant ya, zɛksili ya, ya̧a̧kɛtili ya, tɔs ya, ya̧a̧rums ya, hoobha̧nt lɛl ya, wɔrk ya ri? 36Hɔɔ, Bɛt ɗɛɛrwolɔ raa:
a Waar i, hi giwi gbɔŋk ɔ̧t bed a mɔ dɔŋgo. Hi giwi seek an tam wɔ gɔ hi ka̧hi a gbɛɛriklɛlɛ.
37Yɛrɛ a hin wɔrɔ lab duge sɛw, wɛ ɗɛɛ hin wɔrɔ wɛ daarihilɛl da̧a̧da̧, hi za̧a̧nyɔ ha̧a̧g hi wɛɛ tɛŋkɔ. 38Ya̧a̧nɛ, mi mɛɛ rɔbtɔnɔ: a wɔrko, zaabe za̧a̧tigi, zaabe Bɛt walɛsɛrɛ , zaabe tɛŋk gbɔlɛ zaadɛ, zaabe hinwɔ hi gi ɓɔryɔ, zaabe hinyɔ gi zaako, 39zaabe tɛŋk zaadɛ, zaabe hɔɔtigi, zaabe duki, zaabe hinza wɔ Bɛt ki̧hi sɛw, hí ɗɛ̄ɛ̄ an hi gɛ̧ɛ̧wɛ hi Bɛt ha̧a̧tigɔ yɔ fu̧u̧ a Waar wɛ Yeesu Kristu ge gɛ.
Valgt i Øjeblikket:
ROMA 8: NTD
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
Doyayo New Testament © Bible Society of Cameroon, 1991.