ROMA 9
9
ROMA 9
1Mi dɔk rɔbo. Mi gi Kristu doo ɔ̧nɛ. Kpoos mi gisim raak hi Bɛt Mɔkilɔ: mi taa ya̧a̧gɔ̧ɔ̧ko. 2Kpoos mi luutɔ, gi waak ɗɔki. 3Ya̧a̧nɛ gi ha̧a̧mi an mi wɛɛ bootya a Bɛt muutdu, mi hɛɛtin hi Kristu a yɛ̧ɛ̧dɛ mi wɔ hi gi dɔ̧ɔ̧t mi rɔb kalɛ. 4Hi gi Israhilaya waato, Bɛt wɛɛn hii an waatɔ ɛnsɛ, gaahi gbɔ-lumsɔ, ya̧a̧wɔkɔ wɔ, maakdɔglɛ, maakyɔ gɔ hi ɗɔbsinge, hi hinyɔ raa a gi woosihi.
5Hii gi yaasɛ̀ɛ wāātɔ. Kristu yɔ wɛɛ doo, fu̧u̧ a hi dɔ̧ɔ̧t du; gi gbɔɔl a hin sɛw zulha, anyɔ gi Bɛt yɔ wɛ baan faa. Aanbɔ! 6Hā̧ā̧mi an mi dɔgɔ a hinyɔ Bɛt dɔgɔ gi kɔm di tɔs gɛ. Ya̧a̧nɛ wɔ hi fu̧u̧ a Israhila dɔ̧ɔ̧t du hi taa Israhilaya waat hi sɛw. 7Wɛɛ dood wɔ hi fu̧u̧ a Abraham dɔ̧ɔ̧t du hi taa Abraham wāātɔ sɛw; Bɛt raa Abraham:
a dɔ̧ɔ̧t gɔ gi tuu a Isaaku ge ro gi wɛɛ dɔ̧ɔ̧t mɔnɛ.
8Raakɔ a wɔ hi mɔɔhi an doo hɛbtdi hi taa wɛɛk Bɛt wāāto; wāāt wɔ hi mɔɔhi an hinyɔ Bɛt da raa a be woos Abraham hi seek hii an Abraham dɔ̧ɔ̧to. 9Yɛrɛ hinyɔ Bɛt raa gɛrɛ:
a yoolɛ bé wɛɛzig lɛl anyɔ, Saratu gi dag waawalɔ.
10Hinɔ taa anbɔ kpɔd. Rebeka waatɔ wɔ eerɛ hi gin baaya̧ gbunu: gɛ baa wɛ Isaaku; 11-12anyɔ waat wɔ gɔ hi da hi mɔɔy kete, an hi woo hinrɔbo, zaabe ha̧a̧lɛ, hi wōōdir gɛ, Bɛt raa Rebeka:
a waa fu̧u̧s bɔ giigi woos waa wans bɔ woosɛ. Hinyɔ Bɛt see gi her an gi woo an hinɔ gi waa, hinɔ mid hi eltyɔ, mı̄d hi woos gɛ; hinɔ mid hi za̧a̧nyɔ gi elikhin hi ha̧a̧tig ɔ̧ɔ̧nɛ,
13anyɔ Bɛt ɗɛɛrwolɔ raa
a ha̧a̧b a Yakuba muulɛ, wɛɛ hā̧ab Esawu dɔglɔ gɛ.
14Gi an wɛ raa a nɔ? A Bɛt gi wook hinyɔ rı̄ı̄ gɛ gii ya ri? Taa nɛ anbɔ zaŋ! 15Yɔ anbɔ, wɛɛ raa Muusa:
a bé mɛɛya̧a̧r a za̧a̧nyɔ ha̧a̧b an be mɛɛsigya̧a̧r ge; be gɔ rɔb a za̧a̧nyɔ ha̧a̧b an be gɔsig rɔb ge.
16Yɔ anbɔ hinɔ ōō a doo yɔ gig ha̧a̧k ge gɛ, ōō a doo yɔ gi nɔɔk ge gɛ, gi a Za̧a̧nyɔ ha̧a̧g ya̧a̧rmɛɛk ge ro. 17Ya̧a̧nɛ Bɛt ɗɛɛrwol gi raa Waar bɔ Firawna:
a hinyɔ be gim ɗunsugo, be gim ɗunsig an be zuun tɛŋk be a mɔ muulɛ an nuŋg be gi ɗuk gi yɔ̧ɔ̧s waal sɛw.
18Yɔ anbɔ, Bɛt gi ya̧a̧rmɛɛk a za̧a̧nyɔ ha̧a̧g an gi mɛɛsigya̧a̧r ge sɛw; wɛɛ gi zulɓaasig a za̧a̧nyɔ ha̧a̧g an gi ɓatsig ge sɛw. 19Mɔ warimi: a nɛ à hinɔ gi anbɔ labɔ, Bɛt gib biglik nɔ a be gɔ hin-a̧a̧bi ma ɓɛ nɔ? Ya̧a̧nɛ, Bɛt gi ha̧a̧g hinza, bɔ gi ɗɛɛ an gi ɓaas zulɔ a gi gbaŋgi?
20Mɔɔ, doo tɔs, mɔ gi bɔ an mɔ faltinhin hi Bɛto? Gi an dɔnwɔŋk gi raa namnɛɛ bɔ wɔŋge: a nɔ mɔ wɔ̧b anbɔ ya?
21Namnɛɛ bɔ taan tɛŋk an gi woo hinyɔ ha̧a̧g sɛw hi wɔŋk hi̧i̧t bɔ kim gbunu an gi loo gi wɔm dɔn eer ya? Zaa gbun yɔ gi dɔn rɔbo, zaabɔ be, yɔ gi dɔn ha̧a̧lɛ. Nɛ dɔgl ɔɔn ma mi? 22Gi an wɛ dɔg nɔ? À ha̧a̧ Bɛto an gi zu̧u̧n nɔɔtigɔ an hi mɛɛn tɛŋkɔ be? Yɛrɛ kɔ̧ɔ̧mbɔ hi hinmɔŋkɔ gbɔɔlɛ. Mɔms dood wɔ hi rii nɛ an nɔɔtigɔ gi lɛbrihi hi wɔrɔ.
23Wɛɛ ha̧a̧g an gi gɔ wɛ mɛɛ gbɔlumsɔ gbɔɔl bɔ, wɛɛ yɔ mɛɛsɛya̧a̧r gi gɛmnsɛ an wɛ dag gbɔlumsɔ. 24Yɔ anbɔ wɛɛ dood wɔ Bɛt elɛ, ēlɛ a Yahuduya wɔ hi teesdu kpɔd gɛ, elɛ a dood dɔɔmɛ wɔ hi teesdu hɛw, 25an hinyɔ da dɔg nɛ a ya̧a̧kɛŋkɔya Hoseya ɗɛɛrwol du:
a Bɛt raa a dood wɔ hi da hi taa nɛ benɛ gɛ, be elihi an dood be, wɛɛ wɔ hi taa nɛ saam be gɛ si̧, be elihi an saam be rɔbɛ. 26A lɛlyɔ be da be raahi nɛ ge a nɛ taa dood benɛ! hi elihi a Bɛt za̧a̧til bɔ waat ɔ̧ɔ̧nɛ.
27Bɛtya̧a̧kɛŋkya bɔ Esaya be, ɓooya̧a̧
a Israhilaya wɔ hi zulha, raa: a an Israhila dɔ̧ɔ̧tya̧ kit an hɔ̧ɔ̧l a mɛmbal gbɔɔl du si̧, zaaya̧ kaasi kpɔd ro hi za̧a̧. 28Yɔ anbɔ, Waar Bɛt gi da̧a̧s dɔgl-gbaakɔ bɔ a dood waal du hi zulha nɔɔktɔnɔ.
29Anyɔ Bɛtya̧a̧kɛŋkya bɔ Esaya da raa nɛ doosɛ:
a à laaya Bɛt walɛsɛrɛ wɔ Waar ya̧ Bɛt ɔ̄sɛ dɔ̧ɔ̧t za gɛ, yɔ wɛ wɛɛ an Sodɔmaya wɔ, yɔ wɛ riitin an Gɔmɔraya wɔ.
30Gi an wɛ raa a nɔ? Dood dɔɔmɛ wɔ hi ɓɛ̄ɛ̄ nɛ gbɔnɔ an Bɛt gi ta̧a̧hi gɛ, yɛrɛ anyɔ hi ɗɔbs Yeesu , Bɛt ta̧a̧hita̧ ma. 31Wɛɛ Israhilaya yɔ hi gi kɛɛk Muusa maak-dɔglɔ fɔkɔ an gi gaahi gbɔnɔ hi wɛɛ dood riitɛ a Bɛt muutdu, hi zɛ̄m gbɔnɔ a maakdɔgl bɔ hage gɛ. 32A nɔ dɔŋgo? Hi tɛ̄b hinɔ hi ɗɔbsig gɛ, hi tɛb an hi riis Bɛt hi woosya̧ bɔ giya. Ya̧a̧nɛ hi simdɔɔ a bet dɔɔsiŋkya bɔ gi muulɛ. 33Hi bi̧i̧ hinɔ gi a Bɛt ɗɛɛrwol du
a Bɛt raa a yɛrɛ be gbaak bet dɔɔsiŋkya a Siyona, hi hɛɛl doo matigya. wɛɛ za̧a̧nyɔ gɔ gi ɗɔbsige, seem taag wa̧a̧ko.
Valgt i Øjeblikket:
ROMA 9: NTD
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
Doyayo New Testament © Bible Society of Cameroon, 1991.