Mankuma 9
9
Madyeele mateele mbila
1Madyeele matsuma makuunsi nsaamu
na matuunga nzo.
2Mo makeke bibulu, mayirika malu
na mabweeyese taabala.
3Mo maheeke bisari byabakyeetu mu kweteele baatu
mu mankoto ma bvula :
4« Mpisi wunde wadzuba, kayookolo hamaha. »
Waleele bubwo kuri bahele na madyeele :
5« Waseenu ludya byandya kintwaari na me,
waseenu lunwa malu ma nyirikiryeenu.
6Haambukeenu na biwulu sa lwaba mwooyo,
holeenu nzila ya nyukulu. »
Ngaa-dyeele na ngaa-siiku
7Wunde wuyikisa ngaa-masiiku wutaambulaa lubelu ;
wulubulaa ngaa-bubi wutaambulaa nyafukunu.
8Yaa seembe ngaa-masiiku, bukuri lo wukuberiri ;
ngo seembe ngaa-madyeele, sa kakutya.
9Ha kuri wuri na madyeele, na sa kabweese kuba ngaa-madyeele ;
yikisa wasuunguma, sa kabweese nyaabulu.
10Mbandukulu madyeele ngo kibvumi kya Yaave ;
nyaabulu bangisi ngo mbakukulu.
11Bukuri mu me, biluumbu bya ye bifundumuka ;
na mibvu mya kidziingu kya ye mitoomboko.
12Mbuti ye wuri ngaa-madyeele, lo ye ngaa-madyeele mu ye-meene ;
na mbuti ye ngaa-masiiku, ye kaka wunata mpasi.
Budzeeke buteele mbila
13Budzeeke buri bunu mukyeetu wuri na lupupu, wakiwulu na wahele kuyaaba kitotolo.
14Bwo bwadzakala ha mweelu nzo yaandi,
ha yulu kibala kiri ha kibeendu kibvuri kudzaangama kya bvula.
15Haho, buri mu kuteele minyooki-nzila mbila
miri mu kuluta.
16« Wahele na madyeele kayookolo ha. »
Bubwo kari mu kuleele kuri wunde.
17« Maampa ma kuyiba mabaanaa madzuuna ;
byandya bya kudiila mu mansweeki bibaanaa byaluwu. »
18Nde wahele kuyaaba ti, haho kibeendu kya baatu bafwa na babo bari budzeeke
wubateelaa mbila bari ku nsuku nsi ya bafwa.
Alliance Biblique du Congo 2024