Mankuma 10
10
Nkutukusulu Mankuma ma mu kidziingu kya mbeelu
1Mankuma ma Solomo.
Mwaana wamadyeele wukeembisaa taayi dyaandi ;
ngo mwaana wakiwulu wunyoongisaa nguri yaandi.
2Ndaandu yo pe mu bisweekulu bya busina bwakubakila kunsa bubi ;
kuhele kwa bubayi kukuula mu lufwa.
3Yaave katalaa ko ti wasuunguma kakolo nzala ;
nde wabasilaa manzala ma bangaa-bubi.
4Myooko mya bubolo minataa ku buwelu ;
ngo myooko misalaa mibutaa busina.
5Wukutukisaa mu ntaangu ya ntolulu byandya, mwaana walubuka ;
ngo wubwaa tolo mu ntaangu ya ntolulu byandya, mwaana wuhaanaa nsoni.
6Nsakumunu dzibwaanaa ha yulu mutu wahele na bubayi ;
ngo mu minwa mya bangaa-bubi mwasweeme kibakala.
7Mbambukulu mwooyo mu muutu wasuunguma, yihaanaa lusakumunu ;
ngo nkuumbu baatu bababi yidzimbikinaa.
8Muutu wamadyeele wutaambulaa ntumunu ;
ngo bibori bya muutu walawuka binata ku mfukusulu.
9Kidziingu kya kuhele kwebakina, kidziingu kya mpolo ;
ngo wunde wudzimbukisa manzila maandi, wuyabukinaa.
10Wunde wudzoonso mu mbwatukulu diisu, wumonisaa mpasi ;
bibori bya kiwulu binataa ku mfukusulu.
11Munwa muutu wasuunguma, nto yamwooyo ;
ngo munwa baatu bababi wufukaa kibakala.
12Kitaatu kinata mayumu ;
ngo ntiilu yifukaa lumvuki lwolunso.
13Mu bibori bya ngaa-madyeele, badzuukila nyaabulu ;
ngo luboto lwabweeye ha yulu mbisa wakiwulu.
14Bangaa-madyeele bakutukisaa nyaabulu ;
ngo mu munwa kiwulu, mfukusulu yikokosolaa.
15Busina bwa ngaa-busina, ngo kwa dyaandi munsa bvula ;
ngo mfukusulu babolo ngo buwelu bwa bo.
16Kisalu kya ngaa-kusuunguma, mu ntoono bumwooyo ;
mufutu ngaa-bubi mu ntoono masumu.
17Wunde wukebaa nyikusulu, wukweyende mu nzila ya bumwooyo ;
ngo wunde wubwoongolaa ndubukulu wuyimaa.
18Mpisi wunde wusweekaa lubelu, wuri na bibori bya mampya ;
kiwulu wupalisaa mya nsaanunu.
19Kunsa mfununu bitoolo, tungu kuhele pe ;
walubuka, wukebaa bibori bwaandi.
20Ludima lwa muutu wasuunguma, luri mufunu bunu palata dyadibwe ;
mutima bangaa-bubi wahele na mufunu.
21Bibori bya muutu wasuunguma, bidzuunisaa balaka ;
mu ntoono mutima wuri nde pe, biwulu bikwefwa.
22Lunu lusakumunu lwa Yaave, lubwookisaa busina ; kintwaari na lwo, kunyoongo kubweese kuba ko.
23Kuri kiwulu, kiri bunu kimpa mu kwesa bubi ; na madyeele mu ntoono muutu mari mbakukulu.
24Mi kwebata ngaa-bubi, mimutubukilaa ;
manzila ma wasuunguma mabaanaa makukusu.
25Kiteembu kya mvula bu kilutiri, ngaa-bubi kasii ko !
Ngaa-nsungumunu wuri na lufulu lwakinkulu.
26Bunu buri malu mansa mu miinu, mwiisi mu miisu,
bunubwo se buri mubolo ha busu bwa babo bamuheekiri.
27Kibvumi kya Yaave kibweesaa biluumbu bya mibvu ;
kasi bababi babikufikaa.
28Nsiitu basuunguma dzinataa kiminu ;
ngo nsiitu bababi dzisuka.
29Nzila Yaave ngo kisweemunu mu ntoono bahele na bumpitu-bumpyoongo ;
ngo mfukusulu kuri babo basalila bubayi.
30Muutu wasuunguma wamene kwakinkulu,
baatu bababi bakuunda ha bula ko.
31Munwa muutu wasuunguma, kimbutu kyaandi ngo madyeele ;
ngo ludimu lwa bangaa-bubi sa balutabula.
32Bibori bya muutu wasuunguma binata bweese ;
ngo munwa baatu bababi wunata nsamukunu.
Alliance Biblique du Congo 2024