Mankuma 8
8
Nteelulu mbila ya madyeele
1Buri kari madyeele mateele mbila ko ?
Kari nyaabulu yiyukisaa mbeembu ko ?
2Ha yulu mankoto ma milaandu mu teke manzila,
ha mahaambu ma manzila, madyeele mateleme.
3Mu teke myeelu,
mu myeelu mya mibvuka,
muri mampwaakisa, nde wuri mu kubikisa :
4« Kuri beenu baatu, me nyiri mu kubikisa,
mbeembu yaami kuri baala ba baatu.
5Bahele na madyeele, bakuleenu ndubukulu,
biwulu bakuleenu mu mitima.
6Yukeenu misamu miri mufunu,
me dziburi munwa waami mu kudzoonso myasuunguma.
7Bukuri ndaka yaami yiri mu kuyaabisa ngwanwa,
bibori byaami biyaabisa bubi bu nyabele me.
8Misamu myominso mipala mu munwa waami miri myasuunguma ;
kuri ntoono ti yimosi yampya bunu pele ya mawunu ko ;
9Wunde wubakula, yaari ti momanso ma me masuunguma,
kuri babo badzuukula nyaabulu, bayaari ti mari nsiisa.
10Taambuleenu nyikusulu dzaami nkani ka mboongo ko,
nyaabulu nkani ka woolo dyatsyeemese ko.
11Bukuri, madyeele mabvuri bubwe ti na miluungu.
Bitotolo byobinso byantalu, ti kimosi pe kiyelemene na mo. »
Madyeele moma
12« Me ngo madyeele, me nyatuunguma kunsa ndubukulu.
Me nyadzuukila nyaabulu na nsimunu.
13Wuri na kibvumi kya Yaave, wuri kitaatu na bubi.
Kitsimi kya kukuka, masiiku,
nzila ya kwesa mamabi na munwa wukwesalila bubi, biri kitaatu na me.
14Mandoongi na ndubukulu bya me biri.
Mbakukulu
na mpinu bya me se biri.
15Mu me, bambyaasi bari mu kwetuma,
na banzoonsi ba nyikulu bari mu kwelalama.
16Mu me, bakuutu ba nsi bari mu kwetuma,
baatu balukiinsu na balarimi bobanso bakwesalila nsungumunu.
17Me nyityaanaa, babo bantyaanaa.
Babo basaka me, sa banzuukila.
18Lukiinsu na busina biri na me,
busina bwakinkulu na nsungumunu.
19Kimbutu kya me kyakibwe kibvuri ti na woolo dibvuri kutsyeemese,
mufutu wa me bvuri ti na palata dyasoolu.
20Me nyikweyende mu nzila yansungumunu,
ha kakati dya manzila mansuungumunu.
21Mu kuha saala kuri babo batyaanaa me,
me nyiluulusaa bisweekulu bya bo mu busina.
22Yaave wanyirika tekesele mbandukulu nzila yaandi,
tekesele biyiriki byaandi byabikulu.
23Kuholosono na kidzika, me bansuusa kunu mbandukulu,
kuholosono mbandukulu nsi.
24Me bambuta mabeenge bu maba makiri mo pe,
miwiila mya maampa myaba myakiri kweluula pe.
25Tekesele mbalulu milaandu,
mankoto, me bambuta.
26Nde waba wakiri ti kubala pe butoto ti kubala pe mambasi,
ti nkono fuunda ya nsi.
27Bukari mu kukumusa mayulu, lo me nyaba haho,
bu kabasa kindyengesele ha yulu beenge.
28Bu kaba manika matuti mu kingyee-kingyee,
na waha makwa kuri miwiila myasunda.
29Bu kabasuusa mandilu ma mubu,
mpisi heki maampa mahele kusabuka mandilu,
bu kabasuusa lufulu lwa butoto.
30Lo me nyaba ha lubaansi lwaandi bunu mu bari.
Mpisi kiluumbu me nyayirika myatya mutima waandi,
lo nyikwebunga ha busu bwaandi mu mantaangu momanso,
31nyikwebunga na nsi, butoto bwaandi.
Kuholosono haho, me nyamono kiminu mu kuba ha kakati dya baatu. »
Kiminu kiri na muutu wunde wuywiila madyeele
32Na mu lu mwaana, ywiila me,
kiminu kuri babo banama manzila maami.
33Ywiililee nseembulu
na beenee bangaa-madyeele, yaa lunyaafuna ko.
34Kiminu kiri na muutu wunde, wuywiila me
wukebaa mweelu yaami mu kiluumbu ngo kiluumbu,
wukebaa nkotulu myeelu mya me.
35Bukuri, wunde wudzuukila me, dzuukiri bumwooyo,
na taamburi bweese kuri Yaave.
36Mpisi wunde wuyirika masumu, lo wuri kitaatu na me,
wukwaamisa nyutu yaandi ; wubele me, lufwa katiiriri.
Alliance Biblique du Congo 2024