Mankuma 30
30
Bitoolo bya Anguri
1Maampu bya Anguri, mwaana Yake.
Madzeenge muutu mu ntoono Ityeli, mu ntoono Ityeli na mu ntoono Ukali.
2Bukuri me bvuri budzuba na mpisi muutu,
me nyahele na madyeele ma baatu.
3Me nyahele kuyika madyeele,
me nyahele na nyaabulu ya bangisi.
4Na wunde wunwaata ku yulu, na wasundukiri ?
Na wayeki kutukisa kiteembu ha kikaayi ?
Na wunde wayeki dziinga maampa mu kinkutu ?
Na watelemese manto ma butoto momanso ?
Nkuumbu nde na ? Nkuumbu mwaana nde na ?
Ye yaari.
5Mpisi dyaleele Nzaambi diri mu nzila ;
nde kikakusulu kuri babo bakwee sweemene kuri nde.
6Yaa bweese ti dimosi ko, ha yulu maampu ma nde ;
nde kakwiisa kukuseembe, na kumonoko ti ye ngaa-mpya.
7Me bitotolo byoolo nyiri mu kuloombo kuri ye.
Yaa dika me byo ko, tekesele me nyifwa.
8Tatula me la na mamabi, na munwa mampya. Yaa mpa buwelu ko ;
yaa mpa busina se ko ; ngo mpa kwaami kikuuku kyaami kya byandya kiri mufunu kuri me.
9Bu nyukitiri, nyikwiisa kukutuna
na kuleele ti : Yaave se na ?
Bunu pele bu nyiri kunsa buwele nyikwiisa kuyiba,
na kusaana nkuumbu Nzaambi yaami.
10Yaa futukila nkutu kuri mfumu yaandi ko.
Nde kakwiisa kukubulila mpopi, na ye baka dyaambu.
11Kuri kiseendu kibulila taayi dyaandi mpopi
na kyahele kusakumuna nguri yaandi.
12Kuri kiseendu kitsima ti kiri kyatsyeemeke ha busu bwa kyo,
ngo kyahele kuyoolo maampa mu mviindu dza kyo.
13Kuri kiseendu kiri na mbeengele miisu
na kwetala bobanso mu nyafukunu.
14Kuri kiseendu kiri miinu mya kyo ngo mambeesi mamala,
mabaanga ma kyo ngo mambeesi,
mu kumina mpyolokoto bawelu,
na kubayisila mu nsi, ha kakati dya baatu.
Mankuma malandikisa
15Munturi wuri na baala boolo babakyeetu baleele ti : « Ha, Ha ! »
Kuri bitotolo bitatu kampe bina biri byayukutaa ko,
na baleele ko ti : « Bubwo bukukiri » :
16Nsi ya bafwa,
mukyeetu wakisita,
butoto buri mvula yayukitisaa mu maampa ko,
kyabina ngo mbaawu yiri yaleelaa ko ti bukukiri.
17Diisu diseyaa taayi,
na dinyaafuna ntumumunu ya nguri,
binkwaaka bya nyari sa bimutobolo miisu,
na baala ba ngo-noni. sa bamumingutina.
18Kuri bitotolo bitatu bibvuriri bubwe kuri me,
na nyahele kubibakula, kampe bina :
19Nzila ngo-noni mu yulu,
nzila nyoko ha yulu tari
nzila bwaatu ha yulu mukaanda maampa,
kyabina ngo :
Nzila wamubakala kunsa wamukyeetu.
20Bubwo buri nzila mukyeetu wakiyala.
Bu kadiiri, yaariri munwa tumi
kaleele ti : « Me nyahele kuyirika musamu wamubi. »
21Kuri bitotolo bitatu biteketese nsi,
kampe bina biri lo nsi yahele kukuunda :
22Nkutu yiri yeki mbyaasi, muutu wadzeeke wudya kwalaka
23mukyeetu wuri bahele kumutya ngo kweriri,
Nkutu yamukyeetu wudzikiri mulumi mfumu yaandi yamukyeetu.
24Ha butoto kuri bibulu bina nkati mwabyantele,
ngo biri na madyeele ha kakati dya bangaa-madyeele :
25Binoni, kaanda dyahele na makwa,
ngo bikutukisaa byandya byaaku mu ntaangu yayelemene,
26masele ma mingongo, kaanda dyahele na makwa,
batuunga manzo maaku kunsa mampwaani ma matari,
27bambambala, bahele na mbyaasi,
ngo kweyende mu mpuumbu, mu bunkete,
28bisyaala, biri lo babikweeti mu myooko,
bikotaa natee mu manzo ma bambyaasi.
29Kuri bibulu bitatu biri na nyendukulu ya bunkete, kampe bina biri :
30Nkosi ya nkanyi ha kakati dya bibulu, kabvutukaa mambisa ko ha busu bwa mpisi kiba,
31mulumi nsusu wutelemaa mu banzala, bunu pele mulumi ntaba,
kuri se kyabina ngo mbyaasi yiri ha mankula ma mukaangu bayongolo baandi.
32Mbuti, ha mambisa ma kulawuka mu butuutu-ntulu ye-meene, siiri
ye tsimini, lo sa kooko ha munwa !
33Bukuri mu kukamuna mabeene bapalisaa mabeene ma ngoombo.
Ngo bapinaa mboombo lo makila mapala,
na kubamisa kwa muutu kunataa mayumu.
Alliance Biblique du Congo 2024