Mankuma 29
29
1Muutu wunde wukubisa mutima mu ndubululu, mu ntaangu yiniyo,
wuba wakosunu, kwahele butsiina ti bumosi.
2Habaanaa basuunguma bafumini, lo baatu bakeembe ;
ngo habaanaa kinkita wutuma, lo baatu bakuuma.
3Muutu, wutyaanaa madyeele, wukeembisaa taayi dyaandi ;
ngo wukwenamaana biyala, wudziimbisaa busina bwaandi.
4Mu nsungumunu, mbyaasi katuungila nsi ;
ngo wunde wuloombo mpaku yalaka wu yibvuri, wuyibwiisaa wuyisaana.
5Muutu wuyiingukilaa mbaasi yaandi,
wumudyaanaa mbeesi nsa-nsaanda.
6Kunsa nsinunu mangisi ya kinkita, kuri mweete ;
ngo wasuunguma wufula miloolo na wukeembe.
7Wahele na bubayi yaari buungu dya bawelu ;
ngo kinkita kari mbakula nyaabulu ko.
8Baatu bangaa-munsiku batsaamunaa bula ;
ngo bangaa-madyeele badzuunisaa nkesi.
9Mbuti ngaa-madyeele wee ku muyalu wa bo na kiwulu,
sa kabaka nkesi, bunu pele kuseye, kabaka kidzuunu ko.
10Baatu bangaa-makila batyaanaa wahele na mantoono ko ;
ngo basuunguma basakaa bumwooyo bwa nde.
11Kiwulu wupalisaa fula dyaandi dyodinso ;
ngo ku mambisa ngaa-madyeele wumudzuunisaa.
12Habaanaa mukuutu wutambukila myampya,
bobanso basalaa kintwaari na nde beki bababi.
13Muwelu na mubamisi babwanikinaa :
Ngo Yaave wumonikisaa buungi mu miisu mya boboolo.
14Mbyaasi wuyalaa misamu mya bawelu kunsa ngwanwa,
wukumisaa kwakinkulu mboloko yaandi.
15Nkwaasulu na ndubululu bihaanaa madyeele ;
kituuti kyamubakala kyadziimbila wudzusaa nguri yaandi nsoni.
16Mbuti binkita bibutini, tungu se dibutini ;
basuunguma sa bamono buba mbwiilu ya bo.
17Yikisa mwaana waaku, nde sa kakuha kidzuunu,
na bikeembese mutima waaku.
18Mbuti mya ntuungulu bula myo pe, lo baatu bakwedziimbila ;
lusakumunu luri kuri muutu wukebaa mya Mukaanda mangisi.
19Baseembaa nkutu mu bitoolo ko ;
bukuri, ti hayuku wubakula, kari na mvutu yakuha ko.
20Ye wumonaa muutu wuri na mawasu ma kudzoonso,
lo yaaba ti, kubvuriri nsiitu mu kilawuku ti na mu nde.
21Wunde wusoongo mutima mubwe kuri nkutu yaandi, kuholosono bulesi,
ku manunu mupaaka nsusu, mukwaasa tibi.
22Muutu ngaa-mankesi wulutisaa mayumu ;
na mukuutu mankesi, wufunisaa tungu.
23Butuutu-ntulu bwa muutu bumukululaa ;
ngo mpeeve ya nkulukulu yinataa ku lukiinsu.
24Bakabisinaa na ngaa-kwiibi, banyaafunaa bumuutu bwa bo-meene :
Nde wuyuka mpopi yiri mu kwiisa, ngo wabisa kuyaabisa.
25Kuba na boomo bwa baatu, bunu ndebukulu mweete ;
ngo wunde wusa nsiitu mu Yaave, sa kaba wakalu.
26Baatu balaka bakwesaka kidziri kya wutuma ;
ngo kikuuku kya mpisi nde kya nsungumunu kufumuna kuri Yaave.
27Bahele na bubayi banyoongina muutu wuri na bubayi ;
binkita babakilaa basuunguma nkesi.
Alliance Biblique du Congo 2024