Mankuma 31
31
Mandoongi kuri mbyaasi
1Maampu ma Lemwele, mbyaasi, nyikusulu dzaba kumuyikisaana nguri yaandi :
2Nki nyikuleele mwaana waami ? Nki nyikuleele mwaana wa mu mwooyo waami ?
Nki nyikuleele, mwaana wa bitaasi byaami ?
3Yaa mana makwa maaku mu babakyeetu ko,
yaba watwaalusu kuri bakyeetu badziimbisaa bambyaasi.
4Kuri bambyaasi, Lemwele, kuri bambyaasi
malu mahele kuyelemene,
bumosi kuri bamfumu mu kunwa malu makolaa.
5Kuri ti bu kanwiini, dzimbikini mibatinini,
kituri buungu bwa bawelu bobanso.
6Heenee malu makolaa kuri wunde wuri mu kufwa,
malu kuri wunde wuri na ngebe ku mutima.
7Bu kanwiini, dzimbikini mpasi dza buwelu,
kabweese kubambukila dzo mwooyo ko.
8Dzoonso mu ntoono baba,
mu ntoono baala ba baatu banyaafunu bobanso.
9Dzibula munwa, na yala misamu kwahele bubayi ;
kalila buungu dya muwelu na wanyaafunu.
Nzelu mukyeetu wankanyi
10Na wunde wubaka mukyeetu wantalu ?
Nde bvuri ntalu ti na bilebete.
11Mutima mulumi waandi wasa nsiitu mu nde ;
mukyeetu wabubwo kahelelaa ndaandu ko.
12Nde kamubvutukilaa mamabi ko, ngo mana mamabwe kamuyirikilaa,
mu kidziingu kyaandi kyokinso.
13Nde wukwesakaana manzila ma kutuunga binkutu,
na wusalaa mu myooko myaandi mu kiminu.
14Nde wuri bunu mabwaatu ma matwaala ba byandya,
wutumisaa byandya byaandi kwakinkulu.
15Nde wusiimbikaa kuri bwakiri butsuku,
wuhaanaa kuri nzo yaandi,
na wusoonga manzila mabwa kusalila kuri bisari byaandi byabakyeetu.
16Nde wutsimaa mu nseke, na wuyibakaa.
Mu ndaandu ya kisalu kyaandi, nde wukunaa nseke bviinya.
17Nde wusalaa mu kwa dyodinso
wukumisaa myooko myaandi.
18Nde yaari ti ndaandu yaandi yiri yayibwete ;
mwiinda waandi kadzimaa ko butsuku.
19Wutuunga binkutu mu myooko myaandi,
na mileembu myaandi myayuku mu kisalu kikyo.
20Nde wulaambulaa kikaayi kyaandi kuri muwelu,
myooko myaandi kuri wuri na nzala.
21Nde wahele na boomo bwa kyoosi, mu ntoono nzo yaandi,
bukuri mpisi wuri mu nzo wuri na binkutu byoolo byoolo.
22Nde wuyirikaana mamvuunga,
na binkutu byaandi byantalu.
23Mulumi waandi wayabukina ha myeelu mya bvula,
habaanaa wadzakala na bakulu bababakala ba nsi.
24Tuungiri kinkutu kya ntalu,
wukiyarikiri, yirikiri musweelu, yarikiri kuri bangaa-mumbungu.
25Kwa na lukiinsu bibyo ngo binkutu byaandi ;
nde wuseye biluumbu bikwiisa.
26Nde wudzoonsaana mu madyeele,
wuri na nyikusulu dza nkwikumunu mu ludimu lwaandi.
27Na wutalaa myominso milutaana mu nzo yaandi ;
nde kadyaanaa mpa ya bubolo ko.
28Baala baandi basiimbukaa mu kumuleele ti nde ngaa-lusakumunu ;
mulumi waandi wumusiikaa.
29« Bakyeetu balaka bari bankanyi,
ngo ye mu ntalu wuri ha yulu bobanso. »
30Mbweeyulu yiwumunaa, bubwe bwa kidziri bulabukaa,
ngo mukyeetu wakusiika wunde wuri na kibvumi kya Yaave.
31Muheeneenu ndaandu ya kisalu kyaandi kya mu myooko.
Na mu myeelu mya bvula, siikeenu biyiriki byaandi !
Alliance Biblique du Congo 2024