Mankuma 28
28
1Kinkita kiyitika kwahele muutu wumulaanda ;
ngo wasuunguma wuri na nsiitu bunu dza mutwaala nkosi.
2Bula habaanaa butsaamuka, lo batumi bafunini ;
ngo kintwaari na muutu wuyuka na wuyaari, lo kuri namutunu.
3Muwelu wubamisa bambaasi bawelu, mvula yamakwa,
ha mambisa haho, bwakubakila pe mpa.
4Baatu babwoongolo Mukaanda mangisi ma Nzaambi, badumusaa kinkita ;
na bakebe Mukaanda mangisi banwaanisa bo na bo.
5Binkita byabakulaa madyeele ma kweyala ko ;
ngo basakaa Yaave babakulaa myominso.
6Muwelu wudyaatila kunsa mangisi,
bvuri bubwe ti na muutu wukwesalila manzila mateengeme, ti hayuku kisina.
7Wunde wukebaa Mukaanda mangisi wuri mwaana wuyuka ;
ngo wunde wuri na banduku bababi, wudzusaa taayi dyaandi nsoni.
8Wunde wubakila busina mu ndefusulu mboongo dza ndaandu yalaka,
wukutukisaa mu wunde wubakilaa bawelu kyaari.
9Wunde wukubisa kutu dyaandi, mu kuhele kuyuka Mukaanda mangisi,
lusaambulu lwaandi luri lwabelu.
10Wunde wuwumuna wasuunguma, sa kabwa mu bulu dyaandi ;
bari na bumuutu bataambula saala dyadibwe.
11Kisina wuri ngaa-madyeele mu nde-meene,
ngo muwelu wubakulaa, wumuyaabila.
12Habaanaana basuunguma bari mu kiminu, nkeembu yiba yalaka ;
ngo habaanaana binkita bitelemini, lo mpisi nde sweemini.
13Wunde wusweekaa masumu maandi, kabaangukaa ko ;
ngo wunde wutambukilaa na wuyekelaa mo, wubaanaa wahemusunu.
14Lusakumunu luri na muutu wunde wuri na boomo bwa mamabi, mu mantaangu momanso ;
ngo wukubisa mutima waandi wukotaana mu mpasi.
15Nkosi yiŋaŋa, ngo-mbulu yidumukina :
Bubwo buri wamubi ha busu bwa muwelu.
16Mfumu bula wahele na mbakukulu, wufunisaa ma kwaamisaa ;
wunyaafuna ndaandu wunoninaa biluumbu byaandi.
17Muutu watsyaamuna kila dya muutu, wudzumunaa natee munsa bulu dya mampeembe :
Muutu yaa kamutelemese ko.
18Wunde wukwedyaatila mu bumuutu wubvuuka ;
ngo wukwenama manzila moolo mateengeme, wubwa mu mosi mu mo.
19Wunde wusala nseke, wuyukuta mu byandya ;
ngo wukwenama myabuunu, wuyukuta mu buwelu.
20Muutu wuri na mutima wamutsiina, wabuukila mu nsakumunu ;
ngo wunde wubingukila mu kubaka busina, kahele kubwiilila maseembu ko.
21Buri bwabubwete ko mu kuba na bubayi ;
ngo mu ntoono kitsuri kya mpa, muutu wusinina mangisi.
22Ngaa-diisu dyadibi, wudzumunaa ku busina ;
wahele kuyaaba ti buwele sa bweende kuri nde.
23Wunde wulubula muutu, bvuri kutaambula bweese ha mambisa,
ti na ngaa-luyiingu.
24Mwaana wuyiba bya taayi, na wuleele kuri nguri yaandi ti,
wahele kuyirika dyadibi,
wuri nduku mutsaamini.
25Muutu wuri na nsoki lubaku, wubutisaa mayumu ;
ngo wunde wusa nsiitu mu Yaave kiminu kyaandi sa kyakuka.
26Wunde wusa nsiitu mu mutima waandi, wabeele mutima ;
ngo wukweyende mu madyeele wabvuukusu.
27Wunde wuha kuri muwelu, kahelele kitotolo ko ;
ngo wunde wutalisa busu bwaandi kukimi, wuri kunsa mpopi yamakwa.
28Habaanaana binkita bitelemini, lo mpisi nde sweemini ;
ngo habaanaana bafuukiri, lo basuunguma bafunini.
Alliance Biblique du Congo 2024