Mankuma 23
23
1Mbuti ye wuri ha taabala na mfumu,
lo yaaba na wuri ha busu bwa ye.
2Suusa mbeesi ha muwiri waaku,
mbuti ye wuri na nkwinyi.
3Yaa nyiima byandya byaandi ko :
Bibyo byandya bya lupyelu.
4Yaa holo bito ko, mu kukutukisa busina :
Hoto kwetsima.
5Buri miisu mya ye myatalusu kuri busina ?
Busiirye ko !
Bukuri bumenisinyee mapapu,
bunu ngo-noni, budumukinyee bwensyee ku yulu.
6Yaa dya byandya bya ngaa-diisu dyadibi ;
yaa suka mutima mu byandya bya nde ko.
7Bukuri nde wuri bunu buri kimuutu kyaandi. Lo wukuleeriri ti :
« Dya na nwa kwaaku » ;
kasi bitsimi byaandi bikimi mu ye.
8Ye sa wuluka kiitu kya toongo ki diiri ;
ye siiri kubakila ndaandu mu maampu mamabwe maaku ko.
9Yaa dzoonso ha makutu ma kilawuku ko ;
bukuri nde wunyaafuna mamabwe mari mu bitoolo byaaku.
10Yaa yiinga mandilu mabasiiri mu ntaangu yantama ko ;
yaa koto kunsa nseke kisaani ko.
11Bukuri wunde wumukuula wuri na mpinu,
sa kamukalila, ha busu bwa ye.
12Bvutula mutima waaku mu nyikusulu,
kutu dyaaku mu nyaabulu misamu.
13Yaa tatula maseembu kuri kituuti kyamubakala ko ;
mbuti ye kumuseembele mu nkwaasulu, lo kafwa ko.
14Bu wumuleti mu nkwaasulu,
ye kuuriri kiluunsi kya nde mu nsi ya bafwa.
Mandoongi ma taayi kuri mwaana waandi
15Mwaana waami, mbuti mutima waaku wuri na madyeele,
lo mutima wa me se, sa kakeembe.
16Bumuutu bwa me, sa bwamono kiminu,
habaanaa bibori bya ye, bikwedzoonso myasuunguma.
17Mutima waaku yaa kasukila bangaa-masumu mutima ko ;
ngo mpisi kiluumbu, kaba na kibvumi kya Yaave.
18Haho ye wuba na kidziingu kyakibwe,
na nsiitu dzaaku dziwa ko.
19Mwaana waami, ywiila me na bangaa-madyeele ;
twaalisa mutima waaku mu nzila yasuunguma.
20Yaa ba ha kakati dya binkori-malu ko,
ha kakati dya bakwesuumbula kudya.
21Bukuri wunde wukwekolo malu, na wukwedya kwalaka sa kakoto mu manyoongi ;
na tolo sa twamulwiika mayamba.
22Ywiila taayi dyaaku, wunde wakubuta ;
yaa nyaafuna nguri yaaku ko, ha kanuna.
23Baka ngwanwa, yaa wayiyarika ko, bubwo se mu madyeele, mu nyikusulu na mu nyaabulu.
24Wukeembe, wukeembe, taayi dya mwaana wuri kunsa nsungumunu ;
wunde wabuta mwaana wamadyeele wukeembe.
25Taayi dya ye sa kamono kiminu ;
nguri yaaku, yakubuta, sa kakeembe.
26Mwaana waami, ha me mutima waaku,
na miisu myaaku mitya manzila maami.
27Bukuri ngaa-buyala ngo beenge dyamusundu ;
na mukasi ŋani se bulu dyasweeteme.
28Bunu binkita, bakwekete,
bamwaakitula babakala balaka bangaa-kimpala.
Nzelu ya kinwi
29Mu ntoono na banyoongono « ngebe » na « kyaari » ?
Mu ntoono nani, mpaka ? Mu ntoono nani nyayulu ?
Mu ntoono nani maboko mabuuna ?
Mu ntoono nani bakwabula miisu ?
30Mu ntoono babo balutisaa mantaangu mu malu,
bakwiisa mu kusaangisa malu na kwebiimba.
31Yaa kyeese malu ko, mu kuhembeke kwaandi kwakubwe
ku kari mu kuha
na kufiita munsa mbasa.
32Bu nwiini, nde wutaana bunu nyoko,
bunu mpiri.
33Miisu mya ye sa mimono myanzeense,
na mutima waaku sa kadzoonso mya buwulu.
34Ye sa ba bunu muutu waneŋene ha kakati dya mubu,
bunu muutu waneŋene ha ku mambisa ma bwaatu.
35Ye sa leele ti : « Me bandemisini na bandeti kwahele kumono mpasi, na kwahele kuyaaba.
Ntaangu yi nyisiimbuka me, me nyibweese kubaandika na kuloombo mu kunwa lukimi ! »
Alliance Biblique du Congo 2024