Mankuma 22
22
1Mvuumfu mu mamabwe yibvuri ti na busina bu buukiri :
Bweese bwabubwe bubvuriri ti na woolo na mboongo.
2Kisina na muwelu babwanikinaa :
Yaave wabayirika boboolo.
3Muutu walubuka wutalilaa nsisi na wusweemaa ;
ngo muutu wabuuna, kwelabuka, na bafutaa mikanu.
4Ndaandu nkulukulu ngo kibvumi kya Yaave,
busina, lukiinsu na bumwooyo.
5Manseende na myeete biri mu nzila muutu wateengeme ;
wunde wukebe muwuumunu waandi, yelemini kusasika mu byo.
6Yikisa kituuti kyamubakala, mu nzila yi kayelemene kweende.
Ti hayuku nunini, lo kabwoongolo yo ko.
7Kisina wutumaa bawelu.
Muutu wusoombaa wubaa nkutu ya wumusoombisaa.
8Wunde wukunaa bubayi, wutolaa mpasi ;
na luboto lwa kituunsi kyaandi lubokokaa.
9Wunde wuri na kisoosi kyabweese, sa kaba wasakumunu,
bukuri nde wukabulaa muwelu mpa.
10Binga ngaa-munsiku, tumi mayumu mawa,
mpaka na lubelu sa byahoto.
11Wunde wutyaanaa mutima watsyeeme,
bibori byabweese, wubaanaa nduku mbyaasi.
12Miisu mya Yaave mikalilaa nyaabulu ;
nde wuloosaa bitoolo bisaanaa kintori.
13Mubolo wuleele ti : « Kuri nkosi ku mbasi ku.
Sa yidzusa ha kakati dya nzila ! »
14Munwa bakyeetu bakaka, mudzuumbu wasunda ;
mpisi wunde wubwiilila mpopi Yaave wusonokaa mu nde.
15Buwulu bwakaangu mu mutima kituuti kyamubakala ;
ngo nkwaasulu dza nyikusulu, yaa dzisasika la na nde ko.
16Wunde wukwaamisa muwelu, wumuhaanaa bweese bwa kuba kisina ;
ngo wunde wukabula kisina, wubweesaa kuteele buwelu mu nyutu.
Madyeele ma bitsuumbu-bitsuumbu
17Taamba kutu na ywiila ma bangaa-madyeele,
tumi mutima waaku kabaka nyaabulu yaami.
18Bukuri kiminu bu wumakebiri mu ye,
sa maba bebele na bibori byaaku.
19Mpisi heki ye sa nsiitu dzaaku mu Yaave.
Me nyikuyaabisa lolo di, ye se.
20Buri me nyasiiri kukutinina nyikusulu makuumi matatu ko,
mandoongi na nyaabulu ko,
21Mu kukuyaabisa myatswiikama, maampu mangwanwa,
mu kuri ti ye bvutula mu maampu mangwanwa kuri wunde wukuheeke ?
22Yaa holo kya kilyeebe mu bunkita ko ;
yaa kosono muwelu ha mweelu bvula ko.
23Bukuri Yaave sa kasa bunzoonsi mu ntoono bo,
na sa kahosono kidziingu kya babo babahosini na bitotolo.
24Ya yunga na mukuutu mankesi ko ;
ye wahele kuyelemene kweyende ti na mosi mu bangaa-mankesi.
25Mu kuhele kuyuka na bifu na manzila ma bo ;
lo ye lebikiri nyutu yaaku mweete.
26Yaa ba kintwaari na bakwenata mpya na kwekumbutaa ntulu,
mu kwefutila bakimi bibiimbu ko.
27Mbuti ye bwa kubvutula pe kibiimbu,
lo sa bakuholo na mbuka yiwuri waneŋekene.
28Yaa yiinga mandilu masuusiri
bakuutu ba ye ko.
29Ye wumono ngaa-bunkete mu kisalu kyaandi,
sa kateleme ha busu bwa bambyaasi ;
kari ntelemene ha busu bwa baatu babuuna ko.
Alliance Biblique du Congo 2024