Mankuma 24
24
Wamadyeele na wamubi
1Yaa nyiima bababi ko ;
yaa saka kuba kintwaari na bo ko. 2Bukuri mitima mya bo kwetsima mana mamabi,
na bibori bya bo kwedzoonso mini mya bubayi.
3Nzo, kutuunguma mu madyeele,
kutswiikama mu nyaabulu.
4Mu nyaabulu baluulusa bihekiri
mu bitotolo bwantalu na byabibwe.
5Muutu wamadyeele, wusalilaa kwa dyaandi ;
ngaa-nyaabulu wusyaamisaa kwa dyaandi.
6Bukuri ye mudziingu kusa mu madyeele mantwalusulu ;
ndulukulu yiri kunsa bahe ba mandoongi balaka.
7Madyeele mabvuri kudzaangama kuri kiwulu ;
nde katsiitsa kudzibula munwa ha mweelu bvula ko.
8Wunde wukwetsima kunsa bubi,
wuri na mvuumfu ya mukuutu mawunu.
9Bulawuku bwa muutu bumunataa ku masumu ;
ngaa-munsiku wabelu kuri baatu.
10Mbuti ye monikisi, kuhele kwa bunkiindu bwaaku, mu kiluumbu kya mpasi,
lo mpinu dza ye dzantele.
11Kuula babari badzeengele mukanu wa lufwa,
babari mu kwekoko kukudzusa.
12Mbuti ye wuleele ti : « Mono, beetu twahele kuyaaba ! »,
wunde wuteesa mitima wahele kubakula dyo ?
Wunde wukukebaana wahele kuyaaba dyo ?
Nde mbasi tsuku, bunu buri biyiriki bya mpisi nde wubvutula byo.
13Mwaana waami, dya maasi ma nyosi, bukuri mamabwe,
madzuuna ha muwiri waaku.
14Bwobumosi, baka madyeele mu ntoono bumuutu bwaaku.
Mbuti ye wumadzuukiri, kuri myamibwe ku mankula,
nsiitu dzaaku dziwa ko.
15Ye ngaa-bubi, yaa lebeke mweete mu nzo ngaa-mamabwe ko ;
yaa tsyaamina kibeendu kyaandi kya mpuumunu ko.
16Bukuri lo ngaa-mamabwe bwiiri mbala dzalaka, kunu kuteleme kateleme ;
ngo bababi kubwa munsa mpasi.
17Yaa keembe ko, mbuti mutaatu waaku bwiiri ;
ha kabwa nde, yaa mono kiminu mu mutima ko.
18Yaave kakwiisa kumono dyo mu diisu dyadibi,
na kuyebese nkesi dzaandi, dzikari kabakila mutaatu waaku.
19Yaa bakila bayiriki ba mamabi nkesi ko ;
yaa banyiima ko.
20Bukuri kuri bababi, mankula ma bo mahele kubweeye ;
mwiinda bangaa-bubi, wudzimaana.
21Mwaana waami, bvumina Yaave, na mbyaasi.
Yaa weyunga na batiiriri kwekitula byobinso ko.
22Bukuri na sisu, mpopi yibatelemini ;
na wunde yaari, bufuukila wumawu na wakaka.
Mandoongi makimi ma bangaa-madyeele
23Mamama mabweesiri kudzoonso bangaa-madyeele :
Yaa salila bubayi ko.
24Wunde wuleele kuri ngaa-bubi ti : « Ye wasuunguma »,
makaanda ma baatu bamubulila mpopi, mansi sa mamubakila nkesi.
25Ngo kuri babo bamubulila, dyadibwete kuri bo,
sa babwiila lusakumunu lwalubwete.
26Wuhaanaa mamvutu mamabwete,
wunyumbutinaa bibori.
27Saleeti bisalu bya ku mbasi,
bya ku manseke,
tumi koto mu kutuunga nzo.
28Yaa bambaangi yabuuna ya mbaasi yaaku ko ;
buri tiiri kusalila bibori byaaku mu kuwuna ?
29Yaa leele ko ti : « Me kumusa bunu bu kasiiriri me,
kitete me nyibvutula ! »
Nzelu mubolo
30Me nyayookolo ha nseke maala ya mubolo,
na ya muutu wahele na bumuutu.
31Mono kisyeri na leenge byabuuka munsa nseke,
na lupaangu lwabwa.
32Me nyatala, nyakengese, nyikusulu
dzi nyiri nyataambula ngo dzi :
33Mwaa tolo, mwaa miisu kutsunga tolo,
nziingulu myooko mu mbwiilu tolo.
34Buwelu bu kukwisikila bunu munzeense,
bufuunsi, bunu muyongolo.
Alliance Biblique du Congo 2024