Mankuma 19
19
1Bubvuriri bubwe mu kuba muwelu, wukweyende kunsa nsungumunu,
ti na kinkita wukwebulumusa myateengeme.
2Nyaabulu ha baanaa yahele mu muutu, lo bubi.
Teke-teke dyadumukusa ngwaari.
3Bulawuku bwa bumudzimbikisaa nzila yaandi,
mutima nde lo nkesi, kubakila Yaave.
4Lubaku lubweesaa banduku balaka ;
ngo muwelu wuhaambuka na mbasi yaandi.
5Mbaangi yampya yahelaa maseembu ko ;
kari mvuukulu mu myampya mi kakwesa ko.
6Balaka bakwelebe baatu balukiinsu ;
mpisi nde wuri nduku ya wunde wukwekabula.
7Muwelu wabelu kuri kaanda dyaandi,
buri buhele kubeele mu banduku baandi bamuyekele ?
Nde wubalandikina mu luyolo, ngo basii ko.
8Wunde wusaka mutima wamadyeele, wutyaanaa nyutu yaandi ;
wukebaa mbakukulu, wadzuukila mpolo.
9Mbaangi yampya yahelaa maseembu ko ;
kufwa kafwa mu myampya mi kakwesa.
10Bwahele bwabubwete kuri kiwulu mu kuba kunsa mamabwe ;
se bwahele kuyelemene kuri nkutu mu kutuma bamfumu.
11Wuri na nyukulu yayibwete, kabaka nkesi mababaka ko ;
ngo wusalilaa lukiinsu lwaandi, mu kudziimbikina myamibi.
12Nkesi dza mbyaasi dziri bunu kibakala kya nkosi ;
ngo mbweeyulu yaandi yiri bunu munoko ha yulu leenge.
13Mwaana wakiwulu wuri bunu boolo kuri taayi dyaandi ;
mayumu ma mukyeetu mari bunu wuhele kuwa mu kukuumba.
14Lo bataamburi masaala ma bataayi ;
ngo mukyeetu wuri na mutima wamubwe, wuri kikabu kya Yaave.
15Bubolo bubwiisa tolo ;
muutu wahele na kibakala wukolaa nzala.
16Wunde wubvumuna ntumunu, wubvuukisaa nyutu yaandi ;
ngo wunde wunyaafuna manzila maandi kufwa kafwa.
17Wunde wasiila muwelu ngebe, wasoomboso kuri Yaave ;
mbasi tsuku wumubvutukila kimbwanga.
18Seembe mwaana waaku, ha kiri nsiitu ;
yaa bvunguta na nkesi ko, dzi wunyiimba lufwa lwaandi.
19Wunde wumvunguka na nkesi dzamakwa, wayelemene mu kufuta mukanu.
Kuhele kumufutusa mukanu, bubwo kumusyaamisa mu kubvutukila.
20Ywiila mandoongi, taambula maseembu :
Ku manunu ye sa ba wamadyeele.
21Kuri bitsimi munsa mutima muutu ;
ngo madzeenge Yaave mayirima.
22Mi basaka kuri muutu mbweeyulu.
Bubwete mu kuba na muwelu ti na ngaa-mpya.
23Kibvumi kya Yaave, kitwaala bumwooyo.
Balutisaa butsuku mu yukutu, ngo mpopi yahele kubabwiila.
24Mubolo wulaambula kooko kwaandi munsa lukoombo,
kwahele kunata kwo ku munwa.
25Lata ngaa-munsiku, kape wahele na ndubukulu kitukiri ngaa-dyeele.
Lubula ngaa-dyeele, nde sa kabakula nyaabulu.
26Mwaana wamubi wusikisaa taayi dyaandi, na wubingaa nguri yaandi.
Wusaanaa nsoni na wunataa mpopi.
27Mwaana waami, hoto kuyuka maseembu,
mu kusasika la na bitoolo bya nyaabulu.
28Mbaangi Belyali wuseyelaa mya nsungumunu.
Bangaa-bubi bamingutinaa mya bubayi.
29Bangaa-munsiku bayirima mu dya mutsuundu ;
mbisa bilawuku yayirima mu kwaasulu.
Alliance Biblique du Congo 2024