Mankuma 18
18
1Wunde wusakaana ndaandu ya kifu wuwuungumaa ;
na haba tiiri kumubakisa, lo nde bakiri mankesi.
2Wakiwulu kamonaa kiminu mu mbakulu misamu ko,
mbuti ka mu kuyaabisa miri munsa mutima waandi ko.
3Ha kwiisa ngaa-bubi, lubelu se luri ha mambisa,
kunsa nsoni, bitari se bikwiisaa.
4Mantoono ma munwa muutu, mari na musundu bunu wa maampa ;
mukeri wamadyeele ngo muwiila maampa.
5Bwahele kuyelemene mu kululukisa ngaa-bubi,
na kubwiisa wahele na ntoono, kunsa buungu dyaandi.
6Bibori bya kiwulu bitwaalaa mayumu,
munwa waandi wusakisaa bikoti.
7Munwa kiwulu, mfukusulu yaandi ;
na bibori byaandi, mweete bumwooyo bwaandi.
8Mantoono ma mumfutukila manonokinaa luwu,
masundukaa mu bihekiri byamwooyo.
9Wunde wumonokoso bubolo mu kisalu kyaandi,
mpaangi ya mutsaamini.
10Nkuumbu Yaave ngo bvula dya kindyengesele.
Muutu wasuunguma wudzumunaa kuri nde, na lo weki ha koobvu.
11Lubaku lwa kisina, ngo bvula dya kwa dyaandi, luri bunu kibaka.
Mu bitsimi byaandi ti, bari mbakila nde ko.
12Tekesele nsamukunu, mutima muutu wudzaangukaa ;
tekesele lukiinsu, kuri nkulukulu.
13Wunde wukaalisa, tekesele kuyuka, wawuluka, na bubwo nsoni kuri nde.
14Kiluunsi kya muutu kikuundaa bubeeru ;
ngo mbuti kiluunsi kyakosoko, lo nki bimutelemese ?
15Mutima wamadyeele wubweesaa nyaabulu ;
na kutu dya ngaa-madyeele disakaa nyaabulu.
16Kikabu kya muutu kimudzibukilaa manzila,
kuri lo bakiri miswa mu kukoto muri bakuutu.
17Mpisi watete wudzoonsaa, wukalilaa nyutu ;
ngo ha kwiisa mbaasi wubari na ntoono, lo beki musakila bimbaangi.
18Nteelulu wari yiwurisaa mpaka,
na yitabulaa misamu ha kakati dya bankanyi.
19Mpaangi yi balemisini mutima, yibvuri mpasi mu kumuholo ti bvula dyatuunguma mu makwa.
Nkalikisi dziri bunu bikaangulu bya nzo mbyaasi.
20Mu busina bwa munwa, muutu kayukutisaa mwooyo waandi ;
nde wuyukutaa mu mufutu bibori byaandi.
21Lufwa na bumwooyo, biri mu lutumu lwa ludimu.
Wunde wutiiri lwo, wudyaanaa kimbutu kyaandi.
22Wunde wudzuukiri mukasi, dzukiri byabibwete.
Nde mwaataambula mbweeyulu Yaave.
23Muwelu wudzoonso mu nyayulu ;
ngo kisina mamvutu kuha ma kibakala.
24Muutu wuri na banduku, bubi kalebikiri nyutu.
Mbaasi yayibwe, bvuri ti na wa mu kaanda.
Alliance Biblique du Congo 2024