Mankuma 20
20
1Malu mahaanaa kinwa. Malu mamakwa masindaa ku lusuku.
Mpisi wunde wumakolo, lo kasii ngaa-madyeele ko.
2Nkesi dza mbyaasi dziri bunu kuŋaŋa kwa mutwaala nkosi.
Wunde wumunatisa mu nkesi, wuyirikaana masumu mu nde-meene.
3Lukiinsu lwa muutu luri mu nyebulu mayumu ;
ngo mpisi wakiwulu wululukaa mu nkesi.
4Mu ntaangu ya maala, mubolo kahataa ko ;
mu ntaangu ya ntolulu, nde wusaka ngo wahele kubaka.
5Bitsimi bya muutu kunsa mutima, biri bunu maampa masunda ;
muutu wuri na nyukulu wukwee matekaa.
6Baatu balaka basoongaa ti bo bari bababwe ;
ngo na wunde wudzuukila muutu wuri na mutima wamutsiina ?
7Wasuunguma wunamaa nzila yansungumunu ;
kiminu kuri baala baandi ku mambisa ma nde !
8Mbyaasi wadzakala ha mboloko ya kutsuundisa,
nde wubakala myominso myamibi mu kisooso.
9Na wunde wuleele ti : « Me nyasyeemisini mutima waami,
bahemisini me masumu maami » ?
10Kuba na biteesulu byoolo bya matari, na byoolo bya byeeke,
Yaave wabele bubwo.
11Kituuti kyamubakala wuyabukinaa mu biyiriki byaandi,
mbuti kiyiriki kyaandi kiri kyatsyeeme na kyasuunguma.
12Kutu diywiilaa na diisu dimonaa,
Yaave wayirika byobyoolo.
13Yaa tya tolo, mpisi ye hele kuba muwelu ;
pana miisu, na ye sa yukuta mu byandya.
14« Byabibi ! Byabibi ! », Buleele musuumbi ;
ngo bukari mu kweyende, wubula ntulu mu bikabakiri.
15Kuri woolo, kuri fundu-fundu dya miluungu,
ngo kitotolo kibvuri ntalu, bibori biri na nyaabulu.
16Muholo na kinkutu, bukuri nde buriri ntulu mu kubele kibiimbu kya munzeense ;
muloombo kiti, mu mukyeetu wanzeense.
17Mpa ya kubakila mu mampya yibaana yadzuuna ;
ha mambisa, munwa wuluulaa mu masengele ma matari.
18Bitaasi bitswiikimaa mu mandoongi.
Sa mudziingu, bu tangumisi madyeele ma kuluuluka.
19Wusaana kintori wuri ngaa-mumfutukila ;
yaa weba na wuri na bibori mwaasi ko.
20Mpisi wunde wunyaafuna taayi na nguri,
mwiinda waandi sa kadzima, kunsa mampimbisi.
21Saala dya kubakila kunu mbandukulu mu mawasu,
dyabaana dyasakumuna ko ku manunu.
22Yaa leele ko ti me bubi nyibvutula ;
sa nsiitu mu Yaave, nde wukubvuukisa.
23Yaave katyaanaa ko matari moolo ma mampya ma kiteesulu.
Mu bubwo biteesulu byampya, biri byabibwe ko.
24Yaave wutwaalisaa bitaki bya muutu ;
dyaburi muutu katsiisa kubakila nzila yaandi ?
25Mweete wuri, kuri muutu mu kuleele mu yuyulu ti : « Kyangisi »,
heki ha mambisa ma makatiiri kuyirika, kotiri mu kutsima.
26Mbyaasi ya madyeele wusukisaa bababi.
Nde wuyookisaa muluungu ha yulu bo.
27Muwuumunu muutu ngo mwiinda Yaave,
wukwetsatsimina bitsuungu byobinso bya mu muutu.
28Mbweeyulu mutima na ngwanwa bikalaa mbyaasi ;
mbweeyulu yisyaamisaa mboloko yaandi.
29Lukiinsu lwa bituuti byababakala ngo mpinu dza bo ;
mbweyusulu kuri bakulu bababakala ngo bamvu.
30Maboko ma musundu mari biloongo kuri bubi ;
nkwaasulu dza ha yulu bubi dzituula mu bihekiri bya muutu.
Alliance Biblique du Congo 2024