Mankuma 17
17
1Bubvuriri bubwete mu kudya kikwasa kyankatu kunsa kidzuunu,
ti na nzo yaluula mu bikabu bya mayumu.
2Kisari kyalubuka, kari mpeelu kooko kuri mwaana, wukwemudzusa nsoni ko.
Nde wuri na kibari kya saala dyaandi, hansa bampaangi baandi.
3Palata na woolo byatsyeemese mu mbaawu ;
ngo Yaave wukengisaa mitima.
4Wunde wusaa bunkita, wutaambaa kutu mu mamabi madzoonsaa bibori.
Ngaa-mpya se wutaambaa kutu kuri ludimu lukwetsyaamuna.
5Wunde wuseyaa muwelu, wutukaa wamuyirika ;
wunde wumonaa kiminu mu mpasi dza mbaasi lo bahele kumuseembe ko.
6Lukoongolo lwa bakulu bababakala ngo bateekulu ;
lukiinsu lwa baala ngo bataayi baaku.
7Nzoonsulu dzibvuriri bubwe, dzahele kuyelemene kuri kilawuku ;
na mya mampya kuri muutu walukiinsu.
8Bimbwanga biri tari dyantalu ha miisu mya bana byo ;
mpisi ku bakweende, bakoobaangukaa.
9Wunde wufukaa lumvuki wusakaa ntiilu ;
wunde wubaambulaa mwooyo mu lumvuki, wuhaambulaa batilisina.
10Nseembulu dzibvuri kumonokoso ndaandu kuri muutu ngaa-madyeele,
ti nkama nkwaasulu dzi baleti kilawuku.
11Kinkita kwesaka kunu kutungukila ;
ngo sa bamuheekele munati-mikeensu wahele na ngebe.
12Bubvuriri bubwete mu kubwaana ngo yidziimbisiri baala,
ti muutu wahele na madyeele, waluula mu bulawuki.
13Mpisi wunde wubvutulaa mamabwe mu mamabi,
mpopi yiri nsasikila na nzo yaandi ko.
14Wubuula mukamu, ngo wubaandikaa mayumu,
ngo tekesele mayumu mabaandika, lo sasika kwaaku.
15Wunde wululukisa wabwa buungu, na wunde wubwiisa waluluka,
boboolo bari babelu kuri Yaave.
16Nkya mufunu mu mboongo dziri mu myooko mya kilawuku ?
Haho mu kubaka madyeele ? Ngo wahele na mutima !
17Nguri nduku wutyaanaa mu mantaangu momanso.
Mpaangi ya mukaanda yabutuka mu kukabula mpasi.
18Muutu wakiwulu wutaambulaa kubele kibiimbu kya ŋani.
19Wunde wutyaanaa mayumu, wutyaanaa se mayumu.
Wunde wusiimbilaa kidzibuku kyaandi, wusakaa mfukusulu.
20Ngaa-mutima wa makooti, kari dzukukila myamibwe ko.
Ngaa-makele kubwa munsa kwaanyi.
21Wunde wubuta dzeeke, dzini ngebe kaba na dzo.
Taayi dya kilawuku, katsiisa kumono kiminu ko.
22Mutima wakiminu kiloongo kyakibwe ;
minyoongi mikanisa miyisi.
23Wamubi wutaambulaa nzyaayi malu mu nsweeki,
mpisi bahele kulalama bunu buyelemini.
24Madyeele mari ha busu bwa wunde wuri na nyukulu ;
miisu mya kiwulu kwetalila kwa sukulu butoto.
25Mwaana wakiwulu wubakisaa taayi dyaandi ngebe
na manyoongi kuri nguri.
26Buri bwabubwete ko mu kubelese wahele na ntoono,
kulata wa lukiinsu se dyahele kukwelesene na nsungumunu.
27Wunde wubisa kudzoonso, wuri na nyaabulu ;
wunde wuri na mpeeve yadzuuna wuri ngaa-kuswaasisa.
28Habaana dzeeke wawura, lo weki wamonokono ti ngaa-madyeele.
Wunde wukaanga munwa waandi, wumonokinaa muswasikisi.
Alliance Biblique du Congo 2024