Mankuma 16
16
Yaave wuri na beetu mu kidziingu kya mpisi kiluumbu
1Muutu wusaa bitaasi ;
ngo mvutu yifuminaa kuri Yaave.
2Manzila momanso ma muutu mari masuunguma ha busu bwaandi ;
ngo Yaave wuteesaa mitima.
3Yekele bisalu byaaku kuri Yaave,
tumi bitaasi bya ye biyirima.
4Mpisi kyayirika Yaave kiri na mufunu ;
ti hayuku bangaa-bubi bari na mufunu mu kiluumbu kya mpasi dzaaku.
5Yaave wabele mutima wa masiiku ;
mu ngwanwa ndulukulu yo pe kuri nde.
6Mu mbweeyulu na mu ngwanwa, lumvuki luri lwahemesunu.
Mu ntoono kibvumi kya Yaave, batekele mamabi mbisa.
7Yaave, kamanaa kutaambula manzila ma muutu,
lo suusiri nyukusunu ha kakati dya bataatu baandi na nde.
8Bubvuriri bubwe mu kuba na byantele,
ti na mu kuba kunsa mbuukulu ya byalaka mu manzila mahele kusuunguma.
9Mutima muutu wusa bitaasi, ngo Yaave wutswiikisa byo.
Mu mitariri bambyaasi
10Mbikululu dziri mu munwa mbyaasi.
Mu munwa waandi, mwahele bubayi mu nsundusulu.
11Kiteesulu na myooko myaandi biri bya Yaave ;
byobinso bi basalilaa, biri ha kifunda, bya nde se.
12Bambyaasi babelaa nyirukulu mamabi,
bukuri mboloko bayikumisaa mu nsungumunu.
13Bibori bidzoonso mya nsungumunu, byabweeye kuri bambyaasi.
Batyaanaa wunde wudzoonsaa myasuunguma.
14Nkesi dza mbyaasi, ngo mukeensu lufwa.
Muutu wamadyeele, wumudzuunisaana.
15Mweetunu ku kidziri kya mbyaasi,
ngo bumwooyo. Mbweeyulu mutima waandi yiri bunu mvula yadzuuna.
Kidziingu kya kintwaari na lukiinsu
16Bubvuriri bubwete mu kusaka madyeele ti na woolo,
nyaabulu ti na palata.
17Nzila ya baatu basuunguma, ngo kutekele mamabi mbisa,
kukebe kidziingu kyaandi, ngo kuhololo bunkete bwa nzila yaandi.
18Masiiku manata kwaanyi,
na butuuti ntulu, mbwiilu.
19Bubvuriri bubwete mu kudzakala kintwaari na bawelu,
ti na mu kukaba ndaandu ya mudziingu, kintwaari na bangaa-masiiku.
20Wunde walubuka mu ntoono maampu,
wudzuukilaa byabibwete. Wunde wusa nsiitu mu Yaave, wuyaaba bunu buri kiminu.
21Ngaa-madyeele bamuteelaa ti ngaa-nyaabulu.
Maampu ma bundeembu mabweesaa nyukulu.
22Ndubukulu yihaana kuri wunde wuri na yo, mukeri wamwooyo.
Bilawuku kubaseembele mu bulawuki bwa bo-meene.
23Mutima ngaa-madyeele, wulubulaa munwa waandi ;
na ha yulu bibori byaandi nde wubweesaa nyukulu.
24Mantoono ma kiminu mari bunu maasi ma nyosi,
bundeembu bwa ndaka ngo butsiina bwa miyisi.
25Ha busu bwa muutu, kuri nzila yasuunguma ;
ngo ku manunu, nzila yalufwa.
26Musoongo kisari wusalaa mu nde,
bukuri nzala ya munwa yimubamisa.
27Muutu Belyali wuyirikaa kwaanyi,
mu yulu bibori byaandi bunu mbaawu yikweluluka.
28Muutu wahele kutsiituka wubutusaa mpaka ;
wunde wukwefutukila bambaasi, wunataa mpambukusu ha kakati dya batilisina.
29Muutu wuri na kituunsi, wuwuunaa mbaasi yaandi,
Wumunataa mu nzila yayibi.
30Wunde wukaanga miisu mu kutaasila mya mpasi,
wutatika nto kibori, lo mwaayirika mamabi.
31Lukoongolo lwa bukiinsu, ngo bamvu.
Lukoongolo lulwo, balubakaa mu nzila yansungumunu.
32Ngaa-mutima wamunene bvuri bubwete ti na nkanyi.
Wunde wahele na mutima kinsukulu, bvuri ti na wunde wukwee bwiisa bvula.
33Bafuula suku mu nzala kuyaaba,
ngo nzeengulu dzodzinso dzifumunaa kuri Yaave.
Alliance Biblique du Congo 2024